VaLevi 14
14
Kulijelesa omo munu nakanguka ku mishongo ya a cikonde yakulitambwisa
1Shukulu Kalunga wendekele kuli Mosesa ngwendi, 2#Mat 8:4; Mak 1:44; Luk 5:14; 17:14 “Eli likelyo lishiko lyakujelesa munu uje nakanguka ku mushongo wa a cikonde wakulitambwisa. A litangwa lije vakamutumbula ngwavo najele, co vakamunene kuli muka-kukombelela, 3co muka-kukombelela akamutwale anja ya cilombo nakumwilula. Nga ikeye mwa vushunga nakanguka ku mushongo wendi, 4co muka-kukombelela akashike ngeci anene tuzila vavali vakulya, amo na kaciti ka kendale,#14:4 KENDALE: Muti wakulifwa na mushombo. na mukole wakuvenga, na cishamo ca hisope.#14:4 HISOPE: Liputa lyakulifwa na lunembwe. 5Asinoni muka-kukombelela akashike ngeci vatsiile kazila umo mu lilonga lya vuma muje muli mema amavwa a mu lisima lya kavwelu-vwelu. 6Co akanone kazila mukwavo nakumumbwitika amolika na kaciti ka kendale, na mukole wakuvenga, na hisope, mu maninga akazila uje ivanatsii. 7Co akashamwine aje maninga visimbu vitanu na vivali ali uje munu ivanajelesa ku mushongo wendi wa a cikonde wakulitambwisa, asinoni akamutumbule ngwendi najele. Co ikeye akecela uje kazila wa mwonyo ngeci aliile mwoshe-imwoshe. 8Co uje munu akakushe vuzalo vwendi, co akateule vin̄ambu vyendi vyoshe, co akajwele. Asinoni akapwa wakujela. Co akakovele mu cilombo, oloni napande kukala anja ya mbalaka yendi matangwa atanu na avali. 9Co a litangwa lyamucitanu na avali akateule lalo ku mutwe wendi, na munjezi wendi, na vikuku vyendi, na maka oshe aa muvila wendi aje asaleleo. Akakushe vuzalo vwendi, co ajwele. Asinoni akapwa wakujela.
10“A litangwa lyamucitanu na atatu akanene majamba a vana va vimanga vavali, na muna manga umo wa lwavo wa mwaka umo vaje kuvesi na kapenga, na makilo atatu a vunga vwavuvwa vwakuseneta, na mazi a olive na litambelo lya lita lya mazi a olive. 11Co muka-kukombelela akatwale uje munu, amolika na n̄ombelo yendi, ku cikolo ca Mbalaka Mwakuliwanena. 12Asinoni muka-kukombelela akambateo umo lijamba a vaje vana va vimanga nakumukombelela kupwa n̄ombelo ya kuliilwisila, amolika na lita ya litambelo lya mazi. Co akavikombelele kupwa n̄ombelo ya kuliilwisila. Co akavyane kuli Shukulu Kalunga kupwa vwana vwavuvwa vwa muka-kukombelela. 13Co akatsiile uje muna manga ku mutambela wakujela kuje vakatsiila vimuna va vin̄ombelo vya a vuvi, na vin̄ombelo vya kwenyeka, napande kulinga eci omwo n̄ombelo ya kuliilwisila inalifu na n̄ombelo ya a vuvi, evi vyapwa vya muka-kukombelela. Vyapwa vyakujela. 14Co muka-kukombelela akanoneko maninga amo a muna manga nakuwaka ku shongo-shongo ya litwi lyendi lya cilyo, na ku mulavo wa linyetete lya ku livoko lyendi lya cilyo, co na ku linasha lya linyetete lya ku lindi lyendi lya cilyo lya uje munalume ivakatumbula kupwa wakujela. 15Asinoni muka-kukombelela akanoneko mazi amo a olive nakuwetila mu mbanda ya livoko lyendi vavenya lya cimoshwe, 16co akambwitike mulavo wa livoko lyendi lya cilyo muje mu mazi, co akashamwine amo visimbu vitanu na vivali kuje ku mesho a Shukulu Kalunga. 17Co akanoneko mazi amo a mu mbanda ya livoko lyendi, na maninga amo a muna manga, nakuwakwita ku shongo-shongo ya litwi lyendi lya cilyo, na ku mulavo wa linyetete lya ku livoko lyendi lya cilyo, na ku linasha lya linyetete lya ku lindi lyendi lya cilyo lya uje munu ivakatumbula kupwa wakujela. 18Co akaake aje mazi oshe anasala mu mbanda ya livoko lyendi a mutwe wa uje munu ivakajelesa. Co mu ngila eyi muka-kukombelela akamwambesa ku mesho a Shukulu Kalunga.
19“Asinoni muka-kukombelela akakombelela n̄ombelo ya a vuvi, nakwambesa uje munu ivakajelesa. Munima yevi, akatsiye uje cimuna wa n̄ombelo ya kwenyeka, 20nakuyikombelela a mutula amo na mulambu wa vimbuto vya vinona. Mu ngila eyi muka-kukombelela akalinga cilika cakujelesa, co uje munalume akapwa wakujela. 21Nga uje munu napu kautu, kasa kunena vyoshe evi, co akanene lika muna manga umo wa lijamba kupwa n̄ombelo ya kuliilwisila mukumujelesa. Ikeyo ikapwa n̄ombelo ya kuliilwisila, vwana vwavuvwa kuli Shukulu Kalunga kupwa vwa muka-kukombelela. Ikeye akanene lika kilo imo ya vunga vwakutsingasana na mazi a olive, kupwa mulambu wa vimbuto vya vinona, na litambelo lya lita lya mazi a olive. 22Co lalo akanene tutela vavali, nambe mayembe vavali. Umo apwe wa n̄ombelo ya a vuvi, co mukwavo apwe wa n̄ombelo ya kwenyeka. 23A litangwa lyamucitanu na atatu lya kumujelesa, co akavinene kuli muka-kukombelela ku cikolo ca Mbalaka. 24Co muka-kukombelela akatwale muna manga, na mazi a olive, co akavyane kuli Shukulu Kalunga kupwa vwana vwavuvwa vwa muka-kukombelela. 25Co akatsiye uje muna manga, nakunonako maninga amo nakuwakwita ku shongo-shongo ya litwi lya cilyo lya uje munu, na ku mulavo wa linyetete lya livoko lyendi lya ku cilyo, na ku linasha lya linyetete lya ku lindi lyendi lya cilyo. 26Co muka-kukombelela aketile mazi amo mu mbanda ya livoko lyendi vavenya lya cimoshwe, 27na mulavo wendi wa ku livoko lya cilyo, akashamwine amo maninga visimbu vitanu na vivali kuje ku mesho a Shukulu Kalunga. 28Co akaake mazi amo a mitambela ije vene anakele maninga a n̄ombelo ya kuliilwisila, ku shongo-shongo ya litwi lya cilyo lya uje munalume, na ku mulavo wa linyetete lya ku livoko lyendi lya cilyo, na ku linasha lya linyetete lya ku lindi lyendi lya cilyo. 29Co aje mazi anasala mu mbanda ya livoko lyendi akaake a mutwe wa uje munalume, co mu ngila eyi akaambesa ku mesho a Shukulu Kalunga uje munu ivakajelesa. 30Asinoni akakombelele umo wa tutela nambe mayembe 31kupwa n̄ombelo ya a vuvi, co mukwavo kupwa n̄ombelo ya kwenyeka, amo na mulambu wa vimbuto vya vinona. Co mu ngila eyi muka-kukombelela akaambesa uje munu ivakajelesa ku mesho a Shukulu Kalunga. 32Eli likelyo lishiko kuli munalume uje ali na mushongo wa a cikonde wakulitambwisa, uje kasa kuwana vin̄ombelo vije vivashaka akujelesa kwendi.”
Mbundu-mbundu ya mu vinjuvo
33Co Shukulu Kalunga wendekele kuli Mosesa na Alone ngwendi, 34“Lekeni vaIsalele ngweni, omo munakovela laja mu lifuti lya Kanana lije linjikamyana kupwa vushwana vweni, co nga munu umo akamona ngeci Shukulu Kalunga naaka mbundu-mbundu mu njuvo yendi, 35napande kuya nakuleka muka-kukombelela. 36Co muka-kukombelela akashika kutuwisa vivala vyoshe mu njuvo simbu kanda aciye nakwilula mbundu-mbundu, kutewa vyuma vyoshe vya mu njuvo vakavitumbula vyakujeneka kujela. Asinoni akaya ku njuvo 37nakwilula mbundu-mbundu. Nga mavala ayo avushompo nambe akuvenguluka, aje aliwisa civumbe, 38co uje muka-kukombelela akatuuka muje mu njuvo nakuyishoka a matangwa atanu na avali. 39Co a litangwa lyamucitanu na avali akeluka lalo nakuyilula. Nga mbundu-mbundu inatuminamo, 40co akashika kutundisa mamanya aje ali na mbundu-mbundu ngeci vawombile ku mutambela uje wakujeneka kujela anja ya nganda. 41Co munima yevi napande kumona ngeci civumbe coshe ca mukati ka njuvo vacipale, cooni livu lyamwo vakalyumbile ku mutambela uje wakujeneka kujela anja ya nganda. 42Co mamanya eka vanapande kuwapangesa kwingisa mu mutambela wa mamanya aje vanatundisile, co vanapande kusalimba vije vivumbe mweka lalo.
43“Nga ije mbundu-mbundu icisholoka lalo muje mu njuvo omo vanatundisa laja mamanya, na njuvo vanaipala nakuyisalimba, 44co muka-kukombelela akayako nakumonako. Nga ije mbundu-mbundu inatumu, co ije njuvo kuyajelele. 45Vanapande kuyisiwula, na mamanya ayo, na viti vyayo, na livu lije vaisalimbisile. Vyoshe vanapande kuvitwala anja ya nganda ku mutambela wakujeneka kujela. 46Munu woshe akovela muje mu njuvo oku vanaishoko, akapwa wakujeneka kujela noo ku cingwezi, 47co munu woshe alalamo, nambe kulila mu njuvo ije, napande kukusha vuzalo vwendi.
48“Nga muka-kukombelela aija nakumonako, ije mbundu-mbundu kuyasholokele omo ije njuvo vanaisalimba laja, co akatumbula ije njuvo ngwendi inajele omo mbundu-mbundu inahumo njwa. 49Co akujelesa ije njuvo, ikeye akambata tuzila vavali, na tuviti twa kendale, na mukole wakuvenga, na cishamo ca hisope. 50Co akatsiilao kazila umo akamwa ya mema amavwa a lisima lya kavwelu-vwelu ali mu lilonga lya vuma. 51Asinoni akanone tuviti tuje twa kendale, na hisope, na mukole wakuvenga, na kazila wa mwonyo, co akavimbwitike mu maninga akazila uje ivanatsiile, na mu mema aje amavwa. Co akashamwine a njuvo visimbu vitanu na vivali. 52Mu ngila eyi vene akajelesa ije njuvo na maninga a kazila, na mema aje amavwa, na kazila wa mwonyo, na tuviti twa kendale, na hisope, na mukole wakuvenga. 53Asinoni ikeye akecela uje kazila wa mwonyo ngeci aliile mwoshe-imwoshe. Co mu ngila eyi akalinge cilika cakujelesa ije njuvo, co ikapwa yakujela.
54“Eli likelyo lishiko lya a mishongo ya a cikonde yakulitambwisa, 55ngeci mwa vimbandu, na mazimbo, 56nambe vipapi, co na a mbundu-mbundu ya a vuzalo nambe ya mu vinjuvo. 57Lishiko eli lisholola cuma cimo omo cinajeneka kujela nomwo cinajele.”
Currently Selected:
VaLevi 14: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
