VaLevi 11
11
Tusitu vakulya na ava vakujeneka kulya
(Kwi 14:3-21)
1Shukulu Kalunga wendekele kuli Mosesa na Alone ngwendi, 2“Lekeni vanu vaIsalele ngwendi, mwasa kulya kasitu woshe wa asi 3uje wakutyangunuka vimbemba, co lalo muka-kulekula nakuseka. 4Oloni akati ka vaje vaka-kulekula nakuseka nambe vakutyangunuka vimbemba, kesi mukalye kamelo, omwo ikeye akalekula nakuseka oloni katyangunukile vimbemba, kesi wakujela, 5na lisheha omwo ikeye akalekula nakuseka oloni katyangunukile vimbemba, kesi wakujela kuli yeni embwe, 6nambe kalumba omwo ikeye akalekula nakuseka, oloni katyangunukile vimbemba. Co ava kesi vakujela kuli yeni embwe. 7Co kesi mulye ngulu omwo ikeye kesi wakujela embwe, ikeye ni watyangunuka vimbemba, oloni kesi kulekula nakuseka. 8Kesi mulye tusitu ava nambe kukwata a mitunu yavo ya kutsa embwe, vakevo kesi vakujela embwe.
9“Co mwasa kulya nkala muyati wa isi vaje vali mu mema a kalunga nambe mu vindonga vaje vali na matendo na mavanda. 10Oloni voshe vakuyoya mu mema vaje kuvesi na matendo na mavanda kumwapandele kuvalya, 11vapwe va vunyengwe kuli yeni. Kumwapandele kuvalya omwo kesi vakujela, nambe kukwata a mitunu yavo ya kutsa. 12Co kumwapandele kulya woshe uje wakala mu mema uje kesi na matendo na mavanda, wapwa wa vunyengwe kuli yeni. 13Co tuzila ava vakevo vanapu va vunyengwe akati keni, kesi muvalye, vakevo ava, ngonga, na linkungulu,#11:13 NGONGA...NDIMANDIMA: Kuvazivuka mwamuvwa mazina a tuzila vamo mu mavesi 13-19. 14liselele, na kacuvwi, na cungu, 15na likuvi, na likololo, 16na inavilanda, na mwimbi, 17na kanyange-nyange, na limenekela, 18na limbondo, na lyaanda, 19na pekokeni, na ndimandima.
20“Co tulongolo voshe vali na mambava kesi vakujela embwe, 21kuvanga vaje vali na mendi akujombozoka nawo. 22Mwasa kulya vimbimba mikumbi, na tujenje, na tushenya, 23oloni vakwavo voshe vaje vavandondo vaje vali na mambava, co lalo vakulikoka vapwa vakujeneka kujela, va vunyengwe.
24“Co woshe uje akakwata a mitunu ya tusitu ava va kutsa akapwa wakujeneka kujela noo ku cingwezi, 25tusitu voshe va vimbemba, kuvanga vimbemba vyavo vyakutyangunuka, vaka-kulekula nakuseka, 26co na tusitu voshe vaje va mendi awana va vituto. 27Woshe uje akambata mitunu yavo ya kutsa napande kukusha vuzalo vwendi, 28oloni akapwa wakujeneka kujela, noo ku cingwezi.
29“Co n̄olo, na muku, na kangongwe, na citombwe, 30na liku, na citatu, na musanga, na congono vanapu vakujeneka kujela. 31Woshe uje akwata a mitunu yavo ya kutsa akapwa wakujeneka kujela noo ku cingwezi. 32Co nga mitunu yavo ya kutsa iwila a cuma cimo, cikapwa cakujeneka kujela. Eci cinakundama ku vivala vyoshe vya viti, nambe nanga, nambe cilambu, nambe cikeleya, nambe kuvacipangesa mu ngila ika indi ika, cikapwa cakujeneka kujela. Co cije cuma vakacimbwitike mu mema, oloni cikapwa cakujeneka kujela noo ku cingwezi. 33Co nga mitunu yavo iwila mu ndeo ya vuma, co vyuma vyoshe vije vilimo vikapwa vyakujeneka kujela, munapande kuyitsiya ije ndeo. 34Co nga vyakulya vyoshe vije vivakali vili mu ndeo, oloni anandwekela mema akutunda a mitunu ya kutsa, kuvyajelele, co cuma coshe civakanwa ca muje mu ndeo kucajelele. 35A cuma coshe aje awila mitunu ya kutsa kucajelele, nambe liko lya vuma lyakushonga lyakutelekela nambe liko likwavo lya vuma lyakushonga lyakwocela, valivujule. 36Oloni nga kavwelu-vwelu nambe lisima lili na mema amangi anga vyakujela, oloni cuma coshe cikakwata a mitunu yavo ya kutsa cikapwa cakujeneka kujela. 37Nga mutunu umo uwila a vimbuto vije vanakunu, vimbuto vije anga vikapwa vyakujela. 38Oloni nga vije vimbuto vyakujaveka mu mema, co mutunu umo uwilao, vije vimbuto vikapwa vyakujeneka kujela.
39“Nga cimuna umo wakulya atsa, co woshe amukwata akapwa wakujeneka kujela noo ku cingwezi. 40Co nga munu umo alya ku situ ya uje cimuna wa kutsa, napande kukusha vuzalo vwendi, oloni ikeye akapwa wakujeneka kujela noo ku cingwezi.
41“Co kumwapandele kulya tusitu vaje vakulikoka asi, 42nambe vakulikoka, nambe vakwenda na mendi awana, nambe vali na mendi amangi, vanapu vakujeneka kujela. 43Kesi mulijwalese yeni vavenya akulya cuma cimo cakulikoka asi. 44#VaLe 19:2; 1 Pet 1:16 Yange njapwa Kalunga Njambi yeni, co munapande kulinyunga mupwe vaka-kujela, omwo yange njapwa wakujela. 45Yange njapwa Kalunga uje wamitundisile mu lifuti lya Ingito ngeci njipwe Njambi yeni. Munapande kupwa vakujela omo yange njapwa wakujela.
46“Ngecivene, eli linapu lishiko lya tusitu, na tuzila, na voshe vaje vakala mu ndonga, na voshe vaje valinakulikoka asi. 47Munapande kunyanyama mukunongonona akati kaava vakujela na ava vakujeneka kujela, akati ka tusitu vaje munapande kulya na vaje kumwapandele kulya.”
Currently Selected:
VaLevi 11: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
