Yunda 1
1
1 #
Mat 13:55; Mak 6:3 Mukanda wakutunda kuli Yunda, ngamba ya Yesu Kilistu, ikeye lalo ndolome ya Yakomba.
Kuli vaje vavanasana kuli Njambi, vaje vayoya mu cizemo ca Njambi Tate namukunyunga kwa Yesu Kilistu.
2Mema ku mbunge na kwoloka na cizemo vipwe vyeni museteko yakushula.
Valongisi va makuli
3Vasamba vange, njalingile ngwe munjinasela mukumisonekela akwovoka kuje tunalipangezela, omo njawanene ngeci mwamuvwa kumisonekela ololo nakumitakamesa kutwalao kulwila kukulaela kuje Njambi wanenene lumo kuli vanu vendi voshe. 4Omwo vanu vamo vaka-kujeneka kukulaela vanakovela mu vushweke akati ketu, vanu vaje vaka-kutengulula lijwi a kutetela kwa Njambi ngeci valisambese vakevo vavenya mu mashungu avo amavi, co vanavyana Yesu Kilistu, Shukulu yetu na Mwene yetu. Ku san̄ulu Visoneka vyambulwile cihiso cije civanatambula.
5 #
Kut 12:51
Nameme mwazivuka vyuma vyoshe evi, oloni njishaka kumyanukisa vati Shukulu Kalunga#5 SHUKULU KALUNGA: Kunungulula kumo ngwavo, Yesu, lijwi mu ciNgiliki linalifu mumo na lijwi ngwavo Yoshwa. wovwele vanu va Isalele kutunda mu lifuti lya Ingito, oloni munima yevi wanyongesele vaje kuvakulaelele. #Kul 14:29-30 6Anukeni tungelo vaje kuvanyungile myela yavo na moko yavo, oloni vasezele mwela wavo, vanavakutiiya na malyenge a myaka yoshe mu lisusulungu lya kwisi, kuje kwanavanyungila Njasmbi noo ku Litangwa lije lyakama omo vakavahisa. 7#Kus 19:1-24 Anukeni Sondoma na Ngomola, na vinganda vije vyateleko, vije vanu vamwo valingile ngwe muje muvalingile vaje tungelo mukulikundika ku vilinga vya vupangala na mu mashungu amavi, vayanda na n̄avava ya cihiso ca tuhya ca myaka yoshe kupwa kunangula kwa mutanya mwelu kuli voshe.
8Mu ngila eyi vene lalo, vanu ava vakala na vimona vije vikavatwamenena ngeci valinge vuvi ku mivila yavo vavenya, vakayengula moko ya Njambi, co vakashaula vaje vaka-vumpau vali akamwa. 9#Ndan 10:13,21; 12:1 Nameme uje kangelo wakama Mingeli kacilingile eci. Mukulikanangana kwendi na Liyavola, omo valizungilile muvila wa Mosesa, Mingeli kashukile kwendeka kuli Liyavola na majwi akumushaula, oloni wendekele kuli ikeye ngwendi, “Mwene akuvindike!” #Kuj 12:7 #Kwi 34:6 #Zak 3:2 10Oloni vanu ava vakalwisa na majwi akushaula vyuma vije kuvazivuka, co vyuma vije vavizivuka na citaku-taku ngwe tusitu, vikevyo vije vivanyongesa. 11Luvinda ali vakevo! Omwo vanakavangeya ngila ya Kaini. Co vanalyana vakevo vavenya ku lilaku-laku lya vimbongo, ngwe mwalingile Mbalame. Vanatengulukila ngwe mwatengulukilile Kola, co ngwe ikeye na vakevo lalo vanavanyongesa. 12Ava vanu vakevo vanafu ngwe vitanukiso mu viwano vyeni vya cizemo omo valya neni kujeneka shwamwa. Vashakezeka lika vyavo vavenya. Vanafu ngwe mashelwa akupekumuka lika na lihunzi oloni kuwesi kunena nyonzi. Vanafu ngwe miti kuyesi kwima vushuka, nambe mu simbu ya nyangao, miti ije ivanatukula na mizi yayo inapu ya kutsa vene. 13Vanafu ngwe mankimba a mema a kalunga, co vilinga vyavo vya shwamwa vilinakusholoka ngwe lifulu lya a mema. Vanafu ngwe vingongonosi yakwendangana ngoco, vaje Njambi navatulikila mwela mu lisusulungu lyakuzivala vwii muje vakakala myaka yoshe.
14 #
Kus 5:18,21-24 Inoke lalo uje wapwile wamucitanu na umo#14 WAMUCITANU NA UMO: Nambala eyi inawezelelako nambala yakulivanga na nambala ya mamaneselelo mu mukana wa mazina atanu na limo kutunda kuli Andama nakweta kuli Inoke. ku vatekulwila va Andama, uje ku san̄ulu wambulwile vuka-kwimanena ali vakevo, co wendekele ngwendi, “Kengeni, Mwene akaija na makulukazi a tungelo twendi, 15mukusompa voshe, mukuhisa vanu voshe vanalingi vilinga vyakushaula Njambi naa majwi avo oshe amavi akushaula Njambi avamwendekele aje kuvapandele kuwendeka kuli ikeye.”
16Vanu ava simbu yoshe vaka-kungunguta nakwana mulonga vakwavo, vakakavangeya mashungu avo amavi, vaka-kulishasha nakwendeka majwi a kulyalesa kuli vakwavo ngeci vapange vizango vyavo.
Kunangula na vilongesa
17Oloni yeni munapande kwanuka, vasamba vange, vika vamilekele miluwa a simbu ya kunima vya Mwene yetu Yesu Kilistu. 18#2 Pet 3:3 Vendekele kuli yeni ngwavo, “A matangwa akukotoka, vanu vakasholoka vaje vakamishendumuna, vanu vaje vakakavangeya mashungu avo amavi.” 19Vanu ava vaka-kunena kaangu, vaje vakakava mashungu avo a vunu, kuvesi na Munzinzime embwe. 20Oloni yeni vasamba vange, koleseni mukukulaela kweni kwakujela. Co lombeleni nzili ya Munzinzime Wakujela, 21kaleni mu cizemo ca Njambi, omo muvandamena kwija kwa Mwene yetu Yesu Kilistu a mema ku mbunge endi mukumyana mwonyo wa myaka yoshe.
22Zivileni mema ku mbunge vaje vali na vimata, 23ameneni vakwavo mukuvokola mu liko, co vakwavo vazivileniko mema ku mbunge amo na lyova, oloni kesi muzeme vuzalo vwavo, vuje vunavihya laja na mashungu avo amavi.
Lilombelo lyakushangazala
24Co ololo kuli uje asa kuminyunga kutewa mutanuka, nakuminena nakujolela ku vumpau vwendi kujeneka mulonga, 25kuli Njambi umolika Muyoyesi wetu, ali Yesu Kilistu Mwene yetu, kukale vumpau na vukama na nzili na moko kutunda ku myaka ya ku san̄ulu na kulelo lino na ku myaka na myaka! Ewa.
The Bible in Mbunda ©The Bible Society of Zambia, 2006