Yoshwa 9
9
VaNgimbiyone vakwisa Yoshwa
1Omo vimyene voshe va mu kangombe ka yambi ya Yondau vazivile ngeci vaIsalele vanahyana, co voshe vaje vakele mu lifuti lya malundu, na mu lifuti lya ku vushelumukilo vwa malundu, na vaje vakele ku ngenge ya Lishali lya Menditelenyani, kutwala ku kunto ya Lembanone, vimyene va vaHiti, na vaAmoli, na vaKanana, na vaPelezi, na vaHivi, na vaNjevushi, 2voshe valikungulwile amo kulwisa Yoshwa na vaIsalele.
3Oloni omo vanu va ku Ngimbiyone, vaje vapwile vaHivi, vazivile vije vyalingile Yoshwa ku Yeliko na ku Ayi, co 4vayongwele kukwisa Yoshwa. Valongekeyeye vyakulya a vimulu vavo mu vinjeke vyalaja vyakuvola, na vinjeke vya vinyu vya vilambu vyalaja vyakulamazeka vitopeko.#9:4 VITOPEKO: Vikevyo vikamba. 5Vazalele vuzalo vwakutavozoka, na vin̄aku vyakutavozoka vije vivalamazekele vitopeko. Vambatele makende akuminina naa akuvola, co vaile. 6Ngecivene, vaile kuli Yoshwa ku cilombo ku Ngilingale vendekele kuli ikeye na kuli vanalume va vaIsalele ngwavo, “Yetu tutunda ku lifuti lya kulyala. Tushaka tulikumiiye cikumiiyo neni.”
7 #
Kut 23:32; 34:12; Kwi 7:2 Oloni vanalume va vaIsalele vavakumbulwile ngwavo, “Omwo vikajo tulikumiiya cikumiiyo neni? Alumo yeni mwatunga muyehi netu.”
8Co vakevo vendekele kuli Yoshwa ngwavo, “Yetu twaliiti kuli yove.”
Oloni Yoshwa wavehwile ngwendi, “Yeni veyajo? Co lalo mwatundu kulijo?”
9Vamukumbulwile ngwavo, “Shukulu, tutunda ku lifuti lya kulyala. Omwo tunazivi vya Shukulu Kalunga Njambi yeni, co twazivile lutsimo lwendi a vyuma vyoshe vije vyalingile mu Ingito, 10#Kul 21:21-35 na vyoshe vije vyalingile kuli vimyene vavali va vaAmoli vaje vakele mu ngangela ya Yondau, Mwene Sihone wa ku Heshevone, na Mwene Onge wa ku Mbashane, uje wakele mu Ashetalote. 11Co vantwama vetu na vanu voshe vaje vanatungu mu lifuti lyetu vatulekele kwambata vyakulya vya vungenzi ngeci twakuliwane neni, nakumileka ngeci yetu tunaliiti kuli yeni, co tumilomba kulikumiiya cikumiiyo netu. 12Kenga makende etu, omo twatundile kwimbo nawo, apwile akushaluka. Oloni kenga! Ololo anominina nakuvola, 13na vinjeke evi vya vinyu vya vilambu, vitwashulisile vyapwile vyaviha, oloni kenga! Vinatavozoka. Vuzalo vwetu na vin̄aku vinatsila mu vungenzi ovu vwakama ngeci.”
14Co vanalume va vaIsalele vatambwile vyakulya vyavo vimo,#9:14 VATAMBWILE VYAKULYA VYAVO VIMO: Akutambula vyakulya vyavo capwile cimweso ca cikumiiyo. oloni kuvehwile cizango ca Shukulu Kalunga. 15Asinoni Yoshwa walikumiiye cikumiiyo navo, co vavatavele kutunga navo. Ngecivene, vantwama va mbunga ya Isalele vakolesele cikumiiyo cavo na cisingo.
16Omo matangwa atatu etile kutunda aje valikumiiye cikumiiyo navo, co vaIsalele vanangukile ngeci kuma vaje vanu vatungile muyehi navo. 17Ngecivene, vanu va Isalele vakatukile, co omo kuneti matangwa atatu vetele ku vinganda vije vivatungile vaje vanu, vinganda vyavo vyapwile, Ngimbiyone, na Kefila, na Mbelote, na Kilyate Njelime. 18Oloni vaIsalele kuvasele kuvatsiya embwe, omwo vantwama vavo valikumiiye cikumiiyo ca cisingo navo mu lizina lya Shukulu Kalunga Njambi ya Isalele. Co vanu voshe valinyengelele kuli vantwama a cuma eci, 19oloni vantwama vavakumbulwile ngwavo, “Tunalingi laja cikumiiyo ca cisingo amo navo mu lizina lya Shukulu Kalunga Njambi ya Isalele. Cooni kutwasa kuvalinga lalo cuma cimo embwe. 20Tunapande tuvece vayoye omwo a cikumiiyo cetu ca cisingo. Nga tuvavulumuna, co Njambi akatuhisa. 21Tuveceni vayoye, oloni vapwe vaka-kutucavela vitale nakututekwila mema.” Omu mukemwo muvayongwele vantwama.
22Asinoni Yoshwa washikile ngeci vanene vanu va ku Ngimbiyone kuli ikeye, co wavehwile ngwendi, “Vikajo mwatukwisilile nakutuleka ngweni mwatundu kulyala, kuma mwatunga muno vene? 23Ngecivene, munapu vakusinga, vanu veni simbu yoshe vakapwa vindungo, vaka-kucava vitale nakutekula mema a mu Mwela Wakujela wa Njambi yange.”
24Co vamukumbulwile ngwavo, “Mukemwo mutunalingi shukulu omwo vatulekele mwa vushunga vene Shukulu Kalunga Njambi yeni washikile ngamba yendi Mosesa kumyana lifuti lyoshe eli nakutsiya nakunyongesa vanu voshe valimo ngwe omo mulinakuya kulutwe. Twalingile eci omwo twakele na lyova manene ali yeni, co twakele lalo na lyova lya myonyo yetu. 25Ololo tuli mu mavoko ove, linga kuli yetu vyoshe vije viwunayongola kupwa vyavivwa.” 26Ngecivene, omu mukemwo mwalingile Yoshwa, wavanyungile katavele ngeci vanu va Isalele vavatsiye. 27Oloni a litangwa lije vene Yoshwa wavapwisile vindungo, vaka-kucava vitale nakutekwila mema vanu va Isalele nawa a ku mutula wa Shukulu Kalunga. Na lelo lino vacili nakulinga ngacije ku mutambela uje waangwile Shukulu Kalunga kumulemeselako.
The Bible in Mbunda ©The Bible Society of Zambia, 2006