Yoshwa 3
3
Vanu va Isalele vajavuka Ndonga ya Yondau
1Yoshwa na vanu va Isalele voshe vendukile mutondo-tondo, vatundile mu cilombo ca ku Mungongo, vaile ku Yondau, vatungile cilombo cavo kuje, vavandamenene ngeci vajavuke. 2Omo kuneti matangwa atatu vantwama vetile mu cilombo 3valekele vanu ngwavo, “Omo mukamona vaLevi vaka-kukombelela vanambata Cikasa ca Cikumiiyo ca Shukulu Kalunga Njambi yeni, co mukakatuka nakutunda mu mwela uno ngeci muvakave. 4Vakamimwesa ngila imukaya omo kanda mucikalemo muno. Oloni kesi mushwenye kuyehi na Cikasa ca Cikumiiyo, mukashondoloka nakuseza lyaana lyakama munima yaco.”
5Yoshwa walekele vanu ngwendi, “Lijeleseni, omwo imene Shukulu Kalunga akalinga vikomoweso akati keni.” 6Asinoni Yoshwa walekele vaka-kukombelela ngwendi, “Ambateni Cikasa ca Cikumiiyo mutwame kulutwe lwa vanu.” Co valingile ngwe muje mwavalekele.
7Asinoni Shukulu Kalunga wendekele kuli Yoshwa ngwendi, “Ku litangwa lya lelo njikakupwisa uwakama ku mesho a vanu voshe va Isalele ngeci vazivuke ngwavo ngwe muje munjakele na Mosesa mukemwo lalo munjikakala nove. 8Leka vaka-kukombelela ava vanambata Cikasa ca Cikumiiyo ngwove omo veta ku ngenge ya ndonga, vanapande kwimana ku ngenge ya ndonga mu mema.”
9Asinoni Yoshwa wendekele kuli vanu va Isalele ngwendi, “Ijeni kuno mutolilile evi vyendeka Shukulu Kalunga Njambi yeni. 10Co mukazivuka ngeci Njambi wakuyoya ali akati keni ngwe omo mulinakuya kulutwe, mwa vushunga vene ikeye akasheka vaKanana, na vaHiti, na vaHivi, na vaPelezi, na vaNgilengashi, na vaAmoli, na vaNjevushi. 11Kengeni, Cikasa ca Cikumiiyo ca Shukulu Kalunga wa ano asi oshe cikajavuka Ndonga ya Yondau nakuya kulutwe lweni. 12Ololo anguleni vanalume likumi na vavali, ku muyati umo na umo wa Isalele. 13Omo vaka-kukombelela vaje vanambata Cikasa ca Cikumiiyo ca Shukulu Kalunga wa ano asi oshe, vakalyata mendi avo mu mema, co mema a mu Yondau akemana, mema aje atunda ku cava akemana mutumbo ku mutambela umo.”
14Ngecivene, omo vanu vatundile mu cilombo cavo, vajavukile Ndonga ya Yondau, co vaka-kukombelela vaje vambatele Cikasa ca Cikumiiyo vatwamene kulutwe lwa vanu. 15Yapwile simbu ya kuteja omo Ndonga ya Yondau yajalelele.
Co omo vaka-kukombelela, vaje vambatele Cikasa ca Cikumiiyo vetele ku ngenge ya ndonga, co valyatele mu mema, 16co mema aje atundile ku cava emanene mutumbo ku mutambela umo, ku Andama, nganda ije ili kuyehi na Zalatane. Mema aje ayile ku shango ku Lishali lya Kutsa omine cau, co vanu vajavukilile kuyehi na Yeliko. 17Omo vanu vendele a livu lyakuma, co vaka-kukombelela, vaje vambatele Cikasa ca Cikumiiyo, vemanene lwii a livu lyakuma akati ka Ndonga ya Yondau noo vanu voshe vanajavuka.
Currently Selected:
Yoshwa 3: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
