Yoshwa 22
22
Yoshwa atuma miyati ya mu ngangela kwiluka kwimbo
1Asinoni Yoshwa wakungulwile vanu va miyati ya Luvena na Ngande, na litambelo lya Manase wa mu Ngangela. 2#Kul 32:20-32; Yos 1:12-15 Co wendekele kuli vakevo ngwendi, “Munanyungu vyuma vyoshe vije Mosesa ngamba ya Shukulu Kalunga wamishikile kulinga, co munononoka mashiko ange oshe aje njamishikile. 3Co simbu yoshe eyi kumwalyangunukile na vandolome veni vaIsalele. Oloni munanyungu mashiko a Shukulu Kalunga Njambi yeni nakuwononoka. 4Co ololo, Shukulu Kalunga Njambi yeni naana kwoloka kuli vandolome veni vaIsalele ngwe muje mwamikulaesele. Ngecivene, ilukeni kwimbo ku lifuti lije limwalombele kupwa vushwana vweni, lifuti lya mu ngangela ya Yondau, lije lyamyanene Mosesa ngamba ya Shukulu Kalunga. 5Mwa vushunga ononokeni mashiko aje amishikile Mosesa ngamba ya Shukulu Kalunga ngeci munapande kuzema Shukulu Kalunga Njambi yeni, nakulinga cizango cendi, nakwononoka mashiko endi, na kukakateya kuli ikeye, nakumupangela na vimbunge vyeni vyoshe na myonyo yeni yoshe.” 6Ngecivene, Yoshwa wavavezikisile, co velukile ku membo avo.
7Co capwile ngeci, litambelo limo lya muyati wa Manase, Mosesa wavaanene vushwana vwavo mu Mbashane mu ngangela ya Yondau, oloni ku litambelo likwavo Yoshwa wavaanene vushwana akati ka vandolome vavo mu kangombe ka yambi ya Yondau. Co omo Yoshwa wavelwisile ku membo avo, wavavezikisile. 8Wendekele kuli vakevo ngwendi, “Mulinakwiluka ku membo eni na vufuko vwavungi, na vimuna vavangi, na siliva, na ngolinde, na vunengu, na vutale, na vuzalo vwavungi, co lipangezeleni na vandolome veni vije mwapukwile kuli vitozi veni.”
9Ngecivene, vanu va miyati ya Luvena, na Ngande, na litambelo lya muyati wa Manase wa mu Ngangela ya Yondau velukile ku membo avo. Vasezele vanu va Isalele ku Shilo mu lifuti lya Kanana, co vaile ku lifuti lyavo lya Ngilyande, lije livatambwile ngwe muje mwavashikile Shukulu Kalunga ali Mosesa.
Mutula wa ku Yondau
10Omo miyati ya Luvena, na Ngande, na litambelo lya Manase vaje vakele mu ngangela vetele ku Ngelilote, vakele vene ku mutambela wa mu kangombe ka yambi ya Yondau, co vatungile mutula wauvwa wakama ku ngenge ya Ndonga ya Yondau. 11Co vaje vanu va Isalele vasaleleo vavalekele ngwavo, “Vanu va miyati ya Luvena, na Ngande, na litambelo lya Manase wa mu Ngangela vanatungu mutula ku Ngelilote, ku mutambela wetu wa ku Yondau.” 12Omo vanu va Isalele vazivile vyuma evi, co mbunga yoshe valikungulwilile amo ku Shilo kuya nakulwa nzita na miyati ya mu ngangela.
13Co vanu va Isalele vatumine Finehase muna Elyazale muka-kukombelela kuli vanu va miyati ya Luvena, na Ngande na litambelo lya Manase wa mu Ngangela mu lifuti lya Ngilyande. 14Vantwama likumi vaile amo na Finehase, umo na umo wemanenene miyati ya vanu va Isalele ya mu kangombe ka yambi, co umo na umo wapwile mukulunu wa naanga ya vikota vya vaIsalele. 15Vezile ku lifuti lya Ngilyande, kuli vanu va Luvena, na Ngande, na litambelo lya Manase wa mu Ngangela, vendekeleleko mbunga yoshe ya Shukulu Kalunga ngwavo, 16#Kwi 12:13-14 “Omwo vikajo munalingila vuvi vwa ngacije kuli Njambi ya Isalele? Munatengulukila Shukulu Kalunga akuvyana kumukava akulitungila mutula ou yeni vavenya! 17#Kul 25:1-9 Anukeni vuvi vwa ku Peole kuma vwapwile vwavundondo kuli yetu omo Shukulu Kalunga watuhisile na mushongo ndi? Anga na lelo lino kanda tulijelese ku vukevwo, kuma vuje vuvi kuvwapwilemo ndi? 18Na ololo mulinakuvyana kumukava? Nga yeni mutengulukila Shukulu Kalunga ku litangwa lya lelo, co imene akaluvala na mbunga yoshe ya Isalele. 19Nga lifuti lyeni kulyajelele kulemeselamo, co javukileni mu lifuti lya Shukulu Kalunga, muje muli Mbalaka yendi. Co lombeni mutambela umo akati ketu. Oloni kesi mutengulukile Shukulu Kalunga nambe kututengulukila yetu akulitungila mutula kukumbasana ku mutula wa Shukulu Kalunga Njambi yetu. 20#Yos 7:1-26 Anukeni Akane muna Zela wavyanene kwononoka lishiko a vyuma vije vyakukundika, ngeci vukalu vwezile a mbunga yoshe ya Isalele. Co Akane, kesi ikeye lika wanyongele a vuvi vwendi embwe.”
21Asinoni vanu va muyati wa Luvena, na Ngande, na litambelo lya Manase wa mu Ngangela vakumbulwile vakulunu va naanga ya miyati ya Isalele va mu kangombe ka yambi ngwavo, 22“Muka-nzili yoshe wapwa Njambi! Ikeye wapwa Shukulu Kalunga! Muka-nzili umolika ikeye Njambi! Ikeye Shukulu Kalunga! Ikeye nazivuka omwo vikajo tunalingi eci, co netu lalo tushaka yeni muzivuke eci! Nga yetu tunatengulukila Shukulu Kalunga nakujeneka kumwononoka, co kesi mututave tuyoye lelo embwe! 23Nga kutwononokele Shukulu Kalunga nakulitungila mutula wetu mukukombelelao vin̄ombelo vya kwenyeka nambe vin̄ombelo vya vimbuto, nambe vin̄ombelo vya kulitombola, co eceleni vavenya Shukulu Kalunga atuhise. 24Embwe! Yetu twalingile eci omwo twakele na lyova ngwetu kulutwe vatekulwila veni vakendeka kuli vatekulwila vetu ngwavo, ‘Yeni vikajo mulinga na Shukulu Kalunga Njambi ya vaIsalele? 25Ikeye watavwile Ndonga ya Yondau kuyipwisa nginga akati ketu neni vanu va Luvena na Ngande. Kumwesi na mutambela muli Shukulu Kalunga.’ Ngecivene, alumo vatekulwila veni vakavindika vatekulwila vetu kulemesa Shukulu Kalunga. 26Ngecivene, twatungile mutula, kesi wakwenyekela vin̄ombelo nambe wakukombelela embwe, 27oloni ukapwa mutula wa vukaleo akati ketu neni, na akati ka visemwa vije vikaija kulutwe, ngeci tukalemese Shukulu Kalunga kulutwe lwa Mbalaka yendi yakujela na vin̄ombelo vyetu vya kwenyeka, na vin̄ombelo vyetu vya kulitombola. Ngeci kulutwe vatekulwila veni kesi vakendeke kuli vatekulwila vetu ngwavo, ‘Yeni kumwesi na vushwana muli Shukulu Kalunga!’ 28Eci capwile ciyongo cetu, nga eci cikalingiwa, co vatekulwila vetu vakendeka ngwavo, ‘Kengeni, vakukulwila vetu vatungile mutula wakulifwa na mutula wa Shukulu Kalunga. Ukewo kuwapwile wakwenyekela vin̄ombelo nambe kukombelelao embwe, oloni wapwile wa vukaleo akati ka vanu vetu na vanu veni.’ 29Ciye kulyala netu kutengulukila Shukulu Kalunga nambe kulikela kumukava akutunga mutula wakwenyekela vin̄ombelo nambe vin̄ombelo vya vimbuto nambe kukombelelao. Yetu kutwapandele lalo kutunga mutula weka kutuvakana mutula wa Shukulu Kalunga Njambi yetu uje unemana kulutwe lwa Mbalaka Mwakuliwanena.”
30Omo Finehase muka-kukombelela, na vantwama likumi va mbunga vakevo vene vakulunu va vikota vya vaIsalele va mu kangombe ka yambi vaje vakele amo nendi, vazivile majwi aje vendekele vanu va miyati ya Luvena, na Ngande na litambelo lya Manase wa mu Ngangela, co vavwaelelele manene. 31Co Finehase, muna Elyazale muka-kukombelela, wendekele kuli vakevo ngwendi, “Litangwa lya lelo tunazivuka ngeci kuma Shukulu Kalunga ali amo netu. Omwo kumwamutengulukilile embwe, ngecivene, munamena vanu va Isalele ku cihiso ca Shukulu Kalunga.”
32Asinoni Finehase muna Elyazale muka-kukombelela, na vantwama vasezele vanu va Luvena, na Ngande mu lifuti lya Ngilyande, co velukile ku Kanana kuli vanu va Isalele, co vatwalele vukaleo kuli vakevo. 33Co vaIsalele vavwaelelele manene nakushangazala Njambi. Co vakevo kuvendekele lalo vyakuya ku nzita nakulwisa lifuti muje muvatungile vanu va Luvena na Ngande.
34Co vanu va Luvena, na Ngande vendekele ngwavo, “Mutula ou unapu vukaleo kuli yetu voshe ngeci Shukulu Kalunga napu Njambi.” Ngecivene, vaulukile lizina lyawo ngwavo, “Vukaleo.”
The Bible in Mbunda ©The Bible Society of Zambia, 2006