Yoshwa 19
19
Mutambela uvaanene kuli Simyoni
1Mutambela wamucivali vawanene ku vatekulwila va Simyoni. Mutambela wavo wakele mukati ka livu livaanene ku muyati wa Yunda. 2Kukumbasanako na Mbeleshemba, na Shemba, na Molanda, 3na Hazale, na Shuwale, na Mbala, na Ezeme, 4na Eletolande, na Mbetule, na Holema, 5na Zikelange, na Mbete Malekambote, na Hazale Susa, 6na Mbete Lembaote, na Shaluhene. Vyapwile vinganda likumi na vitatu, amolika na vinganda vije vyavizengelekele.
7Co kwakele lalo Aine, na Limone, na Etale, na Ashane. Vyapwile vinganda viwana, amolika na vinganda vije vyavizengelekele, 8#1 Miz 4:28-33 kukumbasanako na vinganda vyoshe vije vyazengelekele vinganda evi kweta na ku Mbalate Mbele ikeyo Lama, mu mbwela. Eli likelyo livu livatambwile vatekulwila va Simyoni kupwa vushwana vwavo. 9Lifuti lije livaanene Yunda lyapwile lyakama manene kutuvakana mulyapandele kupwa, co mutambela umo vawanene kuli vatekulwila va Simyoni.
Mutambela uvaanene kuli Zembuloni
10Mutambela wamucitatu vawanene kuli vatekulwila va Zembuloni. Livu livavaanene lyetele na ku Salinde. 11Kutunda kuje nginga yakengeselele mu kangombe ka yambi ku Maleale, kweta na ku Ndambeshete, na ku muna ndonga mu ngangela ya ku Njokename. 12Co ku mutambela ukwavo wa Salinde nginga yakengeselele mu ngangela ku nginga ya Kiselote Tambole, asinoni yakengeselele lalo ku Ndambelate, co yetele ku Njafiya. 13Co yaile mu ngangela kutunda kuje kweta ku Ngate Hefele, na ku Etekazine, co yatengulukile kukenga ku Neya ku ngila yakuya ku Limone. 14Co ku kunto lalo nginga yatengulukile kukenga ku Hanatone, co yahwililile ku Cana ca Ifetahele. 15Co yakumbasaneneko Katate, na Nahalale, na Shimelone, na Indala, na Mbetelehema. Vyapwile vinganda likumi na vivali, amolika na vinganda vije vyavizengelekele. 16Co vinganda evi na membo avyo vyakele mu livu lya vatekulwila va Zembuloni livatambwile kupwa vushwana vwavo.
Mutambela uvaanene kuli Isakale
17Mutambela wamuciwana vawanene kuli vatekulwila va Isakale. 18Co mutambela wavo wakumbasaneneko Njezelele, na Kesulote, na Shuneme, 19na Hafalaime, na Shione, na Anahalate, 20na Lambite, na Kishiyone, na Embeze, 21na Lemete, na Enganime, na Enehanda, na Mbetepazeze. 22Co nginga lalo yetele ku Tambole, na Shahazuma, na Mbete Shemeshe, co yahwililile ku Ndonga ya Yondau. Kukumbasanako vinganda likumi na vitanu na imo amolika na vinganda vije vyavizengelekele. 23Vinganda evi na membo avyo vyakele mu livu lya vatekulwila va Isakale livatambwile kupwa vushwana vwavo.
Mutambela uvaanene kuli Ashele
24Mutambela wamucitanu vawanene kuli vatekulwila va Ashele. 25Co mutambela wavo wakumbasaneneko Helekate, na Hali, na Mbetene, na Akeshafe, 26na Alame Meleke, na Amande, na Mishale. Co mu kangombe ka yambi nginga yetele ku Kalemele, na ku Shihole Limbenate. 27Co nginga yakengeselele mu ngangela, yaketele ku Mbetendangone, co yetele ku Zembuloni, na ku Cana ca Ifetahele a ngila ya ku kunto ku Mbetemeke, na ku Neyele. Co yaile ku kunto kweta ku Kambule, 28na Embelone, na Lehombe, na Hamone, na Kana, kweta na ku Sindone. 29Asinoni nginga yatengulukilile ku Lama, co yetele ku nganda ya cimpaka ya Tile, asinoni yatengulukilile ku Hosa, co yahwililile ku Lishali lya Menditelenyani. Kukumbasanako Mahalambe, na Akezimbe, 30na Umema, na Afeke, na Lehombe. Vyapwile vinganda makumi avali na vivali, amolika na vinganda vije vyavizengelekele. 31Vinganda evi na membo avyo vyakele mu mutambela wa lifuti lya vatekulwila va Ashele livatambwile kupwa vushwana vwavo.
Mutambela uvaanene kuli Nafetali
32Mutambela wamucitanu naumo vawanene kuli vatekulwila va Nafetali. 33Nginga yawo yatundile ku Hefele ku muti wa Oke mu Zananime, nakweta ku Andaminekembe, na ku Njaminiya, na ku Lakume, co yahwililile mu Ndonga ya Yondau. 34Co nginga yatengulukilile mu kangombe ka yambi ku Azenote Tambole, kutunda kuje yetele ku Hukoke, co yetele lalo ku mutambela wa Zembuloni ku mbwela, co mutambela wa Ashele wakele mu kangombe ka yambi, co Yondau yakele mu ngangela. 35Co vinganda vya vimpaka vyapwile, Zindime, na Zele, na Hamate, na Lakate, na Kinelete, 36na Andama, na Lama, na Hazole, 37na Kendeshe, na Endeleyi, na Enehazole, 38na Ilone, na Mingendalele, na Holeme, na Mbetenate, na Mbete Shemeshe. Vyapwile vinganda likumi na vitanu na viwana, amolika na vinganda vije vyavizengelekele. 39Vinganda evi na membo avyo vyakele mu livu lya vatekulwila va Nafetali livatambwile kupwa vushwana vwavo.
Mutambela uvaanene kuli Ndani
40Mutambela wamucitanu na ivali vawanene vatekulwila va Ndani. 41Mutambela wavo wakumbasaneneko Zola, na Eshetawole, na Ileshemeshe, 42na Shalembime, na Ainjalone, na Itela, 43na Elone, na Timena, na Ekelone, 44na Eleteke, na Ngimbetone, na Mbalate, 45na Njehunde, na Mbenembelake, na Ngatelimone, 46na Menjalekone, na Lakone, kweta na ku mutambela uje wazengelekele Yopa. 47#Maa 18:27-29 Omo vanu va Ndani vonwele kutambula livu lyavo, co vaile nakulwisa Laishe, co vaifungulwile, vatsiile vanu vamwo, co vatambwile livu lije. Ngecivene, vatungile muje nakutengulula lizina lya nganda ya Laishe ngwavo Ndani, vailukile lizina lya kukulwila yavo Ndani. 48Vinganda evi na membo avyo vyakele mu livu lya vatekulwila va Ndani livatambwile kupwa vushwana vwavo.
Mutambela wakumanesela uvaanene kuli Yoshwa
49Omo vanu va Isalele vamanesele kupangezela livu, co vaanene Yoshwa muna Nune mutambela umo wa livu kupwa vushwana vwendi. 50Ngwe muje mwashikile Shukulu Kalunga, vamwanene nganda ije yalombele, Timenate Sela, mu lifuti lya malundu lya Efalime. Co ikeye watungililemo nganda nakutumbama muje.
51Co Elyazale muka-kukombelela, na Yoshwa muna Nune, na vantwama va vikota vya miyati ya Isalele vaanene mitambela eyi ya livu mukwihula kuli Shukulu Kalunga akuta n̄ela ku Shilo, valingile vyoshe evi ku cikolo ca Mbalaka Mwakuliwanena. Co mu ngila eyi vamanesele kupangezela livu.
The Bible in Mbunda ©The Bible Society of Zambia, 2006