Yoshwa 12
12
Vimyene vafungulwile Mosesa
1Vanu va Isalele vafungulwile nakutambula lifuti lya mu ngangela musambwa ya Ndonga ya Yondau, kutunda ku Cana ca Alenone nakulamata ku Cana ca Yondau nakweta ku kunto ku Munkinda wa Helemone. Co vakevo vafungulwile vimyene vavali. 2Umo wapwile Sihone, mwene wa vaAmoli uje washwanene ku Heshevone. Ku vushwana vwendi wakumbasaneneko na litambelo lya Ngilyande, kutunda ku nginga ya Aloele na ku Cana ca Ndonga ya Alenone na ku nganda ili mukati ka cana, nakweta ku Ndonga ya Njavoke, eyi ikeyo nginga ya vaAmoni, 3na Cana ca Yondau kutunda ku Lishali lya Ngalileya mu ngangela ya Mbete Njeshimote ku mbwela ya Lishali Lya Kutsa, co nginga yaile na ku vushelumukilo vwa Munkinda wa Pisenga.
4Co vaIsalele vafungulwile lalo Mwene Onge wa ku Mbashane, uje wasaleleo ku muyati wa vaLefaime. Ikeye washwanene ku Ashetalote na Endeleyi. 5#Kul 21:21-35; Kwi 2:26; 3:11 Co ku vumwene vwendi wakumbasaneneko Munkinda wa Helemone, na Saleka, na Mbashane yoshe nakweta ku vinginga vya Ngeshule, na Maka, na litambelo lya Ngilyande, nakweta ku nginga ya Sihone mwene wa ku Heshevone.
6 #
Kul 32:33; Kwi 3:12 Vimyene ava vavali wavafungulwile Mosesa na vanu va Isalele. Mosesa ngamba ya Shukulu Kalunga waanene lifuti lyavo ku miyati ya Luvena na Ngande na litambelo lya muyati wa Manase, kupwa vushwana vwavo.
Vimyene vafungulwile Yoshwa
7Yoshwa na vanu va Isalele vafungulwile vimyene voshe vaje vakele mu kangombe ka yambi ya Yondau, kutunda ku Mbalengande mu cana ca Lembanone nakweta ku Munkinda wa Halake mu mbwela kuyehi na Endome. Yoshwa wapangezelele lifuti eli akati ka miyati ya Isalele kupwa vushwana vwavo ngwe ku miyati yavo. 8Co wavapangezelele lifuti lya malundu, na lifuti lya ku vushelumukilo vwa malundu mu kangombe ka yambi, na cana ca Yondau na kuje ku vushelumukilo vwa malundu, na kuje kwakungulumuka mu ngangela, amo na lifuti lyakuma lya mu mbwela. Lifuti eli likelyo lyapwile lya vaHiti, na vaAmoli, na vaKanana, na vaPelezi, na vaHivi, na vaNjevushi. 9Vanu va Isalele vafungulwile vimyene va vinganda evi, Yeliko, na Ayi (kuyehi na Mbetele), 10na Yelusalema, na Hevelone, 11na Njalemute, na Lakishe, 12na Engelone, na Ngezele, 13na Ndembile, na Ngendele, 14na Holame, na Alande, 15na Limbena, na Andulame, 16na Makenda, na Mbetele, 17na Tapuwa, na Hefele, 18na Afeke, na Lashalone, 19na Mandone, na Hazole, 20na Shimelone, na Melone, na Akeshafe, 21na Taanake, na Mengindo, 22na Kendeshe, na Njokename (mu Kalemele), 23na Ndole (ku cikuma ca mema a kalunga), na Ngoime (mu Ngalileya), 24na Tileza. Vimyene voshe vapwile makumi atatu na umo.
The Bible in Mbunda ©The Bible Society of Zambia, 2006