Yona 4
4
Kuluvala kwa Yona na mema ku mbunge a Njambi
1Oloni cuma eci kucavwaelelesele Yona, co waluvalele. 2#Kut 34:6 Co walombelele kuli Shukulu Kalunga ngwendi, “Yove Shukulu Kalunga, kuma omu kesi mukemwo munjendekele omo njakele kwimbo lyetu? Evi vikevyo vinjatewelele vwasi-vwasi ku Tashishi! Omwo njazivukile ngeci yove wapwa u Njambi wa ngozi na mema ku mbunge, kuwesi kuluvala vwasi, visimbu vyoshe u muka-kutetela na cizemo cije kucesi kutenguluka, simbu yoshe watava kutengulula viyongola vyove kujeneka kunyanyamesa. 3Ngecivene, ololo, Shukulu Kalunga, tambula mwonyo wange. Mwamuvwa kuli yange kutsa kutuvakana kuyoya.” 4Co Shukulu Kalunga wamukumbulwile ngwendi, “Kuma cinakupande kuluvala ndi?” 5Co Yona watuukile anja ya nganda watumbamene asi ku mutambela wa mu ngangela. Co watungile lipapela lyendi nakutumbama mwisi ya munzinze walyo, mukuvandamena vika vikalingiwa mu Nenevayi. 6Asinoni Shukulu Kalunga Njambi wamenesele mono ngeci Yona akale mu munzinze avwaelele. Co Yona wavwaelelele manene na ije mono. 7Oloni alikaki a mungulungengu, Njambi washikile likoloto kulenda ije mono, co yajujwamene.
8Co omo litangwa lyatuukile, Njambi watumine lihunzi lya mu ngangela lyakushaluka. Ngecivene, Yona washakele kulezumuka ku ntwima ya litanya lije lyamutwililile mu mutwe wendi. Co walombelele ngeci atse kutuvakana kuyoya.
9Oloni Njambi wendekele kuli Yona ngwendi, “Kuma cinakupande kuluvala a mono eyi ndi?” Co Yona wamukumbulwile ngwendi, “Mwamuvwa kuli yange kuluvala nameme vene kutsa.” 10Shukulu Kalunga wendekele kuli Yona ngwendi, “Eyi mono yakolele a vutsiki vumolika, co alikaki yomine, nacimo cai walingile a ikeyo. Co yove lalo kuwayimenesele nambe kuyongozola, oloni yove unayizivila ku mbunge kuvavala. 11Kuma yange kunjasa kuzivila mema ku mbunge Nenevayi, nganda ije yakama, muje muli vanu vanatuvakana 120,000 vaje kuvazivuka vuvwa na vuvi, amo na vimuna vavangi ndi?”
Currently Selected:
Yona 4: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
