Maako 3
3
Miyati ya vanu vaje vasalele mu lifuti ngeci veseke vaIsalele
1Ngecivene, Shukulu Kalunga wasezele miyati ya vnu vamo mu lifuti ngeci veseke vaIsalele, vaje kuvalwile nzita na vaKanana. 2Ikeye walingile eci, ngeci alongese cisemwa na cisemwa ca vaIsalele kulwa nzita, vunene vene kuli vaje kuvalwile nzita ku simbu ya laja. 3Vaje vasalele mu lifuti vakevo vimyene vaje vatanu va vaFilisitiya, na vaKanana voshe, na vaSindoniya, na vaHivi, vaje vakele mu Minkinda ya Lembanone kutunda ku Munkinda wa Mbale Helemone nakweta ku Ngila ya Hamate. 4Vavasezeleo mukweseka vaIsalele, mukumona nga vononoka mashiko a Shukulu Kalunga aje aanene vakukulwila vavo ali Mosesa. 5Ngecivene, vaIsalele vatungile akati ka vaKanana, na vaHiti, na vaAmoli, na vaPeleze, na vaHivi, na vaNjevushi. 6Co valyambatelele navo, nakulemesa vinjambi vavo.
Otenyele
7Co vanu vaIsalele valingile vuvi ku mesho a Shukulu Kalunga, vevalele Shukulu Kalunga Njambi yavo, nakulemesa tumponya twa vaMbale na Ashela. 8Ngecivene, Shukulu Kalunga waluvalele na vaIsalele, co wavakundikile ku mavoko a Mwene Kushane Lishataime wa ku Mesopotamya, co vapwile vinzinda vendi myaka itanu na itatu. 9Asinoni vaIsalele valililile kuli Shukulu Kalunga, co Shukulu Kalunga wavatuminine muyoyesi uje wavayoyesele. Lizina lyendi Otenyele, muna Kenaze shongo ya Kalembi. 10Munzinzime wa Njambi wezile ali ikeye, co wapwile lyaako lya vaIsalele. Otenyele waile ku nzita, co Shukulu Kalunga wakundikile Mwene Kushane Lishataime wa ku Mesopotamya ku mavoko endi. 11Co mu lifuti mwakele kwoloka myaka makumi awana, asinoni Otenyele watsile.
Ehunde
12Co vanu va Isalele valingile lalo vuvi ku mesho a Shukulu Kalunga. Omwo eci, Shukulu Kalunga waanene nzili kuli Mwene Engilone wa ku Mowavi, co wafungulwile vaIsalele. 13Co Engilone walipandakanene na vaAmoni, na vaAmaleke, co vafungulwile vaIsalele nakutambula Yeliko, nganda ya mashakaVaLe 14Co vaIsalele vapwile vindungo kuli Engilone myaka likumi na itanu na itatu.
15Asinoni vaIsalele valililile lalo kuli Shukulu Kalunga, co Shukulu Kalunga wavatuminine munalume ngeci avamene. Lizina lyendi Ehunde, munalume muka-cimoshwe, uje wapwile muna Ngela, wa ku muyati wa Mbenjemani. Ali ikeye vanu va Isalele vatumine milambu kuli Mwene Engilone wa vaMowavi. 16Co Ehunde wafulile moko ya mukwale ya vuvela kuvali, co vulaja vwayo yapwile masentimita 50, co waikutiiye ku nyonga yendi ku livoko lya cilyo kwisi ya vuzalo vwendi. 17Asinoni watwalele milambu kuli Engilone mwene wa vaMowavi, uje wapwile munalume wakununa manene. 18Omo Ehunde naana laja milambu kuli ikeye, co walekele vaje vanu vambatele ije milambu kwiluka kwimbo. 19Oloni Ehunde omo wetele ku mamanya akushonga aje akele kuyehi na Ngilingale, co welukile kunima kuli Engilone wendekele ngwendi, “Shukulu, njili na lijwi lya mu vushweke nove.”
Ngecivene, mwene washikile vangamba vendi ngwendi, “Tusezeni etu lika!” Co voshe vatuukilemo.
20Ngecivene, mwene watumbamene endi lika mu njuvo yendi mu mulili wa kwilu wakutonola, co Ehunde wakovelelemo wendekele ngwendi, “Njili na lijwi nove linatundu kuli Njambi.” Co mwene wemanene. 21Co na livoko lyendi lya cimoshwe, Ehunde washomwene mukwale, kuutundisa ku mutambela wa nyonga yendi ya ku cilyo kwisi ya vuzalo vwendi, wativile mu lifu lya mwene. 22Co mukwale woshe wakovelelemo na cikundo cawo coshe, co mazi acifwikile. Ehunde kaushomwene lalo mu lifu lya mwene, mukwale wasakamenene mu lifu lya mwene, co watuukilile kunima. 23Asinoni Ehunde watuukile anja, co washokele mapito a ku njuvo ya kwilu kunima yendi, waapatele, 24co waile. Omwo nai laja, vangamba vezile, oloni vawanene mapito akupata, vakevo vayongwele ngeci mwene ali mukati acili nakulivwaesa. 25Co vavandamenene simbu yakama ngwe muvaselele, oloni omwo mwene kashokolwele ku cikolo, vanonele sapi nakushokololako. Co muje vamwene shukulu yavo nalala asi natsi.
26Simbu vacivandamena, Ehunde watewele. Wakatuvakanene mamanya akushonga, co watewelele ku Seila. 27Omo wetele mu lifuti lya malundu lya Efalime, co wembile lupembo mukusana vanu va Isalele mukulwa nzita, asinoni ikeye wavatwamenenene nakushelumuka kutunda ku lifuti lya malundu. 28Co wavalekele ngwendi, “Njikaveni! Omwo Shukulu Kalunga nakundika vitozi veni vaMowavi ku mavoko eni.” Ngecivene, vashelumukile nakukava Ehunde nakukafungulula mwela uje kuje kwakele vaMowavi, kuje kwakujavukila Yondau, co kuvatavele munu umo wa ku vaMowavi kujavuka ndonga. 29Co a litangwa lije vatsiile mashwalale va vaMowavi vakapwa 10,000 va nzili nakutakama, naumo wai wasaleleo. 30Co a litangwa lije vaIsalele vafungulwile vaMowavi, co mu lifuti mwakele kwoloka myaka makumi atanu na atatu.
Shamengale
31Munima ya Ehunde kwezile Shamengale muna Anate. Na ikeye lalo wapwile ntwama ya vaIsalele, akutsiya vaFilisitiya vakupwa 600 na citi cakutimwisa vingombe.
The Bible in Mbunda ©The Bible Society of Zambia, 2006