Maako 1
1
Muyati wa Yunda na Simyoni vakwata Andonimbezeki
1Munima ya kutsa kwa Yoshwa, vanu va Isalele vehwile Shukulu Kalunga ngwavo, “Muyati uka unapande kupwa wakulivanga kuya nakulwisa vaKanana?”
2Co Shukulu Kalunga wavakumbulwile ngwendi, “Muyati wa Yunda ukewo uya akulivanga, omo yange njinakundika lifuti mu mavoko avo.”
3Co vanu va muyati wa Yunda vendekele kuli vanu va muyati wa Simyoni ngwavo, “Tuyeni amolika netu, mu lifuti lije livanatwana, tukalwise vaKanana. Asinoni tukaya amolika neni mu lifuti lije livanamyana.” Ngecivene, vanu va muyati wa Simyoni vaile navo. 4Omo Yunda waile mukulwa nzita, co Shukulu Kalunga wavahyanesele nakuvana moko yakufungulula vaKanana, na vaPeleze, co vafungulwile vanalume 10,000 ku Mbezeke. 5Vawanene Andonimbezeki kuje, co vamulwisile. 6Co watewele, oloni vamushekele, co vamukwatele, nakumuvatozola manyetete a ku mavoko, na ku mendi. 7Co Andonimbezeki wendekele ngwendi, “Vimyene vakupwa 70 njavavatozwele manyetete a ku mavoko na ku mendi, vakevo vakele nakunona-nona vungululu vwa vyakulya mwisi ya mesa yange. Co ololo Njambi nanjilingi ngwe muje munjavalingile yange.” Co vamutwalele ku Yelusalema kuje kwakatsililile.
Muyati wa Yunda vafungulula Yelusalema na Hevelone
8Co vanu va Yunda valwisile Yelusalema nakuyifungulula. Vatapele vanu vamwo na mikwale, co venyekele nganda na tuhya. 9Co munima yevi, vatwaleleo nakulwisa vaKanana vaje vakele mu lifuti lya malundu, na mu mambo ya mu mbwela, na mu lifuti lya ku vushelumukilo vwa malundu. 10Co vaile nakulwisa vaKanana vaje vakele mu nganda ya Hevelone, laja Hevelone vaitumbwile ngwavo Kilyate Alemba. Co kuje vakafungulwile vikota vya Sheshai, na Ahimene, na Talemai.
Otenyele afungulula nganda ya Ndembile
(Yos 15:13-19)
11Co kutunda aje, vanu va Yunda vaile nakulwisa nganda ya Ndembile, a simbu ije vaitumbwile Kilyate Sefele. 12Co umo wavo, uje vatumbwile Kalembi, wendekele ngwendi, “Njikashombwesa munange Akesa kuli munalume uje akafungulula Kilyate Sefele.” 13Asinoni Otenyele, muna Kenaze ndolome ya Kalembi, ikeye waifungulwile, ngecivene, Kalembi washombwesele munendi Akesa kuli Otenyele. 14A litangwa lya ciwano ca vulo, Otenyele wasindiiye Akesa#1:14 OTENYELE WASINDIIYE AKESA: Kenga Yoshwa 15:18. ngeci alombe lihya kuli ishe, co Akesa washulukile a cimulu cendi, co Kalembi wamwihwile ngwendi, “Vikajo ushaka?” 15Akesa wamukumbulwile ngwendi, “Njishaka munjane masima a mema a tuvwelu-vwelu, omwo lifuti lije munanjana lyapwa lyakuma.” Ngecivene, Kalembi wamwanene masima a tuvwelu-vwelu a ku cava nawa a ku shango.
Kuhyana kwa miyati ya vanu va Yunda na Mbenjemani
16Vatekulwila va ishemweno ya Mosesa, wa kaKeni, valamatele na vanu va Yunda kutunda ku Yeliko, nganda ya mashakavale, nakweta mu lifuti lya mambo mu mbwela ku Alande mu Yunda. Co kuje vakatungile mukati ka vaAmaleke. 17Co vanu va Yunda vaile amo na vanu va muyati wa Simyoni, vakalwisile vaKanana, vaje vakele mu nganda ya Zafete. Vainyongesele njwa, co ije nganda vailukile lizina lya Holema.#1:17 HOLEMA: Mu ciHevelu lizina eli lyalumbunuka ngwalyo, kunyongesa. 18Vanu va muyati wa Yunda vafungulwile lalo Ngaza na mutambela wayo, na Ashekelone na mutambela wayo, na Ekelone na mutambela wayo. 19Shukulu Kalunga wakele amo na vanu va muyati wa Yunda, co vafungulwile lifuti lya malundu, oloni kuvashekelemo vanu vaje vakele mu vyana, omwo vakele na matemba a vikuvo. 20Co Hevelone vayanene kuli Kalembi, ngwe muje mwashikile Mosesa, uje washekelemo vikota vitatu vyakutunda kuli vaAnake. 21#Yos 15:63; 2 Sam 5:6; 1 Miz 11:4 Oloni vanu va muyati wa Mbenjemani kuvashekele vaNjevushi vaje vakele mu Yelusalema, co vaNjevushi na lelo lino valinakukala akati ka vanu va Mbenjemani.
Vanu va miyati ya Efalime na Manase vafungulula Mbetele
22Vanu va miyati ya Efalime na Manase vaile mukulwisa nganda ya Mbetele, co Shukulu Kalunga wakele amo navo. 23Co vatumine vanu vakanenge nganda ya Mbetele. Laja lizina lya nganda lyapwile Luze, 24co vaje vaka-kunenga vamwene munu alinakutunda mu nganda, co vendekele kuli ikeye ngwavo, “Tumwese kwakukovelela mu nganda, co tukakulinga mwamuvwa.” 25Ngecivene, wavamwesele, co vanu va Efalime na Manase vatsiile vanu voshe va mu nganda, oloni vasezeleo uje munalume lika na naanga yendi yoshe. 26Cooni uje munalume waile ku lifuti lya vaHiti, kuje wakatungile nganda, co wailukile lizina lya Luze, na lelo lino vene likelyo lizina lyayo.
Vanu vaje vavonwele kusheka vaIsalele
27Oloni vanu va muyati wa Manase kuvashekele vaje vanu vakele mu vinganda vya Mbete Shane, na Tanake, na Ndole, na Imbelyame, na Mengindo, na membo aje azengelekele vinganda vije, oloni vaKanana vasele kukala muje. 28#Yos 17:11-13 Co capwile ngeci, omo vaIsalele vakele oni na nzili, vasindiiye vaKanana kuvapangela vipangi, oloni kuvavashekelemo. 29#Yos 16:10 Co vanu va muyati wa Efalime kuvashekele vaKanana vaje vakele mu nganda ya Ngezele, oloni vaKanana vatwaleleo kukala amo navo muje.
30Co vanu va muyati wa Zembuloni kuvashekele vaKanana vaje vakele mu vinganda vya Kitelone, na Nahalale, co vaKanana vatwaleleo kukala amo navo muje, vavasindiiye kuvapangela vipangi.
31Vanu va muyati wa Ashele kuvashekele vaKanana vaje vakele mu vinganda vya Ako, na Sindone, na Ahelambe, na Akezimbe, na Helemba, na Afeke, na Lehombe. 32Co vanu va muyati wa Ashele vakele akati ka vaKanana vavenya lifuti, omwo vakevo kuvavashekelemo.
33Co vanu va muyati wa Nafetali kuvashekele vaje vanu vakele mu vinganda vya Mbete Shemeshe, na Mbete Anate. Vanu va Nafetali vakele akati ka vaKanana vavenya lifuti, oloni vavasindiiye kuvapangela vipangi.
34VaAmoli vashekelele vanu va Ndani mu lifuti lya malundu, co kuvatavele kushelumuka ku cana. 35Co vaAmoli vakele vene ku Munkinda wa Helese, na mu vinganda vya Ainjalone, na Shalembime, nameme ngoco nzili ya vaEfalime, na vaManase yavatuvakanene, co vavasindiiye ngeci vavapangele vipangi.
36Co ku kunto ya Sela, nginga ya vaEndome#1:36 VAENDOME: Mu ciHevelu ngwavo, VaAmoli. yetile mukati ka Ngila ya Akelambime.
The Bible in Mbunda ©The Bible Society of Zambia, 2006