Isaya 57
57
Vahisa tumponya twa Isalele
1Vaka-vushunga valinakuvakokangeya nakuvatsiya, oloni naumo wai ombako mbunge. Vuvi vulinakuvapekumwina kulyala. 2Vaje venda mu vushunga vawana kwoloka, nakuhwima omo vatsa.
3Ijeni kuno vakumisompe, yeni vaka-vuvi! Yeni munapu mumolika na vimbanda, na vaka-vupangala, na vikwizi. 4Veyajo mulinakushendumuna? Yeni vaka-makuli iyajo mulinakufweya? 5Mulinakulemesa vinjambi va tumponya nakulingila vupangala mwisi ya miti yeni yakujela. Mulinakukombelela vana veni mu manzenzengoma a mamanya kuyehi na muna ndonga. 6Mulinakwambatako mamanya akuseneta, co mulinakuwalemesa ngwe vinjambi. Muketilako vinyu kupwa vin̄ombelo nakuvatwalela n̄ombelo ya vimbuto vya vinona. Kuma munayongola ngweni njasa kuvwaelela nevi vyoshe ndi? 7Mukai ku minkinda yailaja mukukombelela vin̄ombelo nakulingilako vupangala. 8Mukatumbika vifwa vya vinjambi va vaka-kujeneka kukulaela kuzengeleka myela yeni yakama yakulala. Mukunjivyana yange, munafukula vulili vweni, co munalalao na vaka-cizemo ceni, vaje munafwete ngeci mulale navo. Co munakutisa mashungu eni a vulili vweni. 9Mukavwava mazi amavwa akunika lwengo, co muya nakulemesa njambi Moleki. Muya nakushakezeka vinjambi ngeci muvalemese, mutuma tunganda noku-noku, nameme ku vukalo vwa vatsi. 10Mulinakuliyandesa yeni vavenya nakushakezeka vinjambi veka, oloni kumwesi kujuka. Muyongola ngweni tumponya tweni vamyana nzili, ngeci kumwesi kuzeya.
11Shukulu Kalunga alinakwendeka ngwendi, “Vinjambi mukajo ava valinakumizivisa lyova, ngeci mulinakwendeka makuli nakunjivala ivya? Munalikela kunjisingimika omwo njinoloka simbu yakama ndi? 12Mulinakuyongola ngweni evi mulinakulinga vinapu vyavivwa, oloni yange njikamizivisa shwamwa a vilinga vyeni, co tumponya tweni kuvakamikwasa. 13Omo mutambeka ngeci vamikwase, eceleni tumponya tweni tumyamene! Lihunzi likavapekumuna! Oloni vaje vakulaela muli yange vakayoya mu lifuti, co vakanjilemesa mu Njuvo yange.”
Cikulaeso ca Njambi cakukwasa nakukangwisa
14Shukulu Kalunga alinakwendeka ngwendi, “Eceleni vanu vange veluke kuli yange. Tundiseni mingowa mu ngila ya vanu vange! Sheveni tapalo nakuyivwaesela cimweja!
15“Yange Njambi wa Akamwa ya Vyoshe, na Njambi wakujela, uje wayoya myaka yoshe. Yange njayoya akamwa na ku mutambela wakujela, oloni njayoya lalo na vanu vaje valikeesa nakutenguluka, ngeci njiindule kusimpa kwavo na cinyangavili cavo. 16Njaanene vanu vange mwonyo, co kunjikavahisa lalo nambe kuvaluvalesa myaka yoshe embwe. 17Njaluvalele navo omwo vuvi vwavo na muuka wavo, ngeci njavahisile nakuvaseza, omwo vakaluwisile vimbunge vyavo nakuya mu vingila vyavo.
18“Njamwene muvalingile, oloni njikavakangwisa, co njikavatwamenena nakuvakwasa, njikazembeleka vaje valinakulila. 19#Efe 2:17 Njikana kwoloka kuli voshe vaje vali muyehi na vaje vali kulyala! Njikakangwisa vanu vange. 20Vaka-vuvi vanapu ngwe mema a kalunga aje kuwesi kukendama, aje mankimba awo kuwesi kulikela kungwanjanga, akanene mazilo na lindova.” 21#Isa 48:22 Shukulu Kalunga alinakwendeka ngwendi, “Kukwesi kuhwima kuli vaka-vuvi.”
The Bible in Mbunda ©The Bible Society of Zambia, 2006