Isaya 38
38
Mushongo wa Mwene Hezekiya nakwinduka kwendi
(2 Vim 20:1-11; 2 Miz 32:24-26)
1A matangwa aje Mwene Hezekiya wavinjile, co washakele kutsa. Isaya muka-kwimanena muna Amoze waileko nakumumona, co wendekele kuli ikeye ngwendi, “Shukulu Kalunga nendeka ngwendi vwaesa mwamuvwa vyuma vyoshe, omwo kuwinduka embwe. Utsa.”
2Hezekiya wakengesele cihanga cendi ku civumbe, co walombelele ngwendi, 3“Shukulu Kalunga, anuka ngeci yange njakupangela nakukulaela na kulongwa, simbu yoshe njinakele nakulinga vije viwashakele ngeci njivilinge.” Co walilile manene.
4Asinoni Shukulu Kalunga washikile Isaya 5kwilukila kuli Hezekiya nakumuleka ngwendi, “Yange Kalunga, Njambi ya kukulwila yove Ndaviti, njinazivi lilombelo lyove, co njamono misozi yove, njakutava kuyoya myaka likumi na itanu. 6Njikakwamena yove na nganda eyi ya Yelusalema kuli mwene wa Asilya, co yange njikanyunga nganda eyi simbu yoshe.”
7Isaya wakumbulwile ngwendi, “Shukulu Kalunga akakwana cimweso cakumwesa ngeci ikeye akanyunga cikulaeso cendi. 8A vindendelo vyatungile Mwene Ahaze, Shukulu Kalunga akelwisa munzinze munima manambo likumi.” Co munzinze welukile munima manambo likumi.
9Omwo Hezekiya wendukile ku mushongo wendi, co wasonekele mwaso ou wakushangazala.
10Njayongwele ngeci njikaya ku vukalo vwa vatsi,
omwo vanatepulula matangwa
akuyoya kwange mu simbu ino.
11Njayongwele ngeci muno mu kaye ka vaka-kuyoya,
kunjikasa lalo kumona Shukulu Kalunga,
nambe munu woshe uje alinakuyoya.
12Mwonyo wange vauvatwisilile,
co wahwile ngwe mbalaka omo vanayeteka,
ngwe nanga yakuteta ku mukundwilo.
Njayongwele ngeci Njambi namanesa mwonyo wange.
13Omwo mushongo,
co njatetele vutsiki vwoshe,
njazivile ngwe ndumba alinakupokozola
vitsiya vyange.
Njayongwele ngeci Njambi
namanesa mwonyo wange.
14Lijwi lyange lyapwile lyalindondo nakuzeya,
co njalinyengele ngwe katela.
Mesho ange ajukile nakukenga kuli yove.
Shukulu Kalunga,
njamene ku tuyando twoshe otu.
15Vatijo njasa kwendeka?
Shukulu Kalunga nalingi ngacije.
Mbunge yange ilinakuvavala, co kunjasa kulala.
16Shukulu Kalunga,
njikayoyela ali yove,
njiyoyela ali yove lika. Njikangwise,
co njitave ngeci njiyoye.
17Vusiwa vwange vukemuka kwoloka.
Amena mwonyo wange ku vushonde vwoshe,
unjisambese ku vuvi vwange vwoshe.
18Naumo wai ali mu vukalo vwa vatsi
asa kukushangazala.
Vatsi kuvasa kukulaela kulongwa kwove.
19Kuvanga vaka-kuyoya lika
vakevo vakushangazala,
ngwe munjili nakukushangazala yange ololo.
Visemi valeka vana vavo mukwafwa kulongwa kwove.
20Shukulu Kalunga, unanjikangwisa,
tukaimba tulyalya nakwimba myaso
yakukushangazala,
tukaimba myaso yakukushangazala
mu Njuvo yove matangwa oshe akuyoya kwetu.
21Isaya walekele mwene alameke mukamango wa mikuyu a lizimbo ngeci akanguke.
22Asinoni Mwene Hezekiya wendekele ngwendi, “Cizivukiso mukajo cikanjimwesa ngeci njikasa lalo kuya ku Njuvo ya Shukulu Kalunga?”
The Bible in Mbunda ©The Bible Society of Zambia, 2006