Isaya 28
28
Kunangula a vumwene vwa ku kunto
1Vumwene vwa Isalele vunanyongo! Vumwene vwavwo vulinakuhwa ngwe cilongo ca vishani cili ku mitwe ya vantwama vamwo vaka-kupenda. Mitwe yavo ya kulyalesa vanaivwavesa mwamuvwa mazi akunika lwengo lwaluvwa, oloni vanalala, vanapende vwala. 2Shukulu Kalunga ali na munu uje muka-nzili manene nakutakama nalivwaesela cimweja kuvalwisa, uje akaija ngwe nyonzi ya mamanya, ngwe nyonzi ya lihunzi lyakama, ngwe mema a livazi lya muta wakama, aje ashulisa lifuti lyoshe. 3Muka-kupenda woshe wa mu Efalime alyalesela a Samaliya, oloni vakainyongesa. 4Vumwene vwa vantwama vaka-kulyalesa vukahwa njwa ngwe vushuka vwakulivanga vwa miti ya mikuyu vavuvuya nakuvulya vwasi-vwasi omo vuhya.
5A litangwa lije Shukulu Kalunga Muka-nzili yoshe akapwa cilongo ca vumpau kuli vanu vendi vaje vanasalao. 6Akana mana a vushunga kuli maako, nakumona ngeci vanu vendi vasa kwamena vinganda vyavo ku vitozi.
Isaya na vaka-kwimanena vakupenda va mu Yunda
7Vaka-kwimanena na vaka-kukombelela vanapende, co valinakutalyangela. Vananu manene vinyu na vwala, vatalyangela nakujeneka kuzivuka vivalinga. Vaka-kwimanena na vaka-kukombelela vanapende manene ngeci vanonwa kuzivisisa vimona vyanavamwesa Njambi, nakusompa mwamuvwa milonga ije ivalinakuvanenela. 8Vimesa vyavo vyoshe vinashulu vishanjo na mazilo, kukwesi mutambela unasalao wai wakwonwa mazilo.
9Valinakulinyenga ali yange ngwavo, “Iyajo yakalongesa mana? Iyajo yakalongesa majwi endi? Vilongesa vyendi vinafwila lika vanike, vaje vanashumuka ku mavele! 10Ali nakweseka ku tulongesa lilaka na lilaka, mukana na mukana, cilongesa na cilongesa.”
11 #
1 Koli 14:21
Njambi akendeka na vanu vendi na majwi eka na ndaka ije kumukazivuka mukumilongesa cilongesa. 12Namihwimisa muvavoshe nakumyana kwoloka, oloni yeni mwavyanene kumutolilila. 13Ngecivene, ololo Shukulu Kalunga akamilongesa lilaka na lilaka, mukana na mukana, cilongesa na cilongesa. Co mukatanozoka nakuwila kunima. Mukavulumuka na kutsa mu mweto, co vakamipwisa mu vinzinda.
Limanya lya mu mbango lya Siyone
14Ngecivene, tolilileni lijwi lya Shukulu Kalunga yeni vaka-kulyalesa mulinakushwana mu Yelusalema. 15Kuma munayongola ngweni mwalikwata vusamba na kutsa, co munete akulizivasana na lifuti lya vukalo vwa vatsi? Omwo vikajo mukulaela mu makuli eni ngeci amyamene ku vukalu na ku livazi lyakama? 16#Mya 118:22-23; Lom 9:33; 10:11; 1 Pet 2:6 Ngecivene, Shukulu Kalunga wa Akamwa ya Vyoshe nendeka ngwendi, “Kengeni, njikajala luvula lwakukola mu Siyone. Lukelwo vene limanya lya mu mbango lije vaneseka kupwa lya vushunga, naumo wai uje akulaela mulikelyo ivakazivisa shwamwa. 17Vushunga vukapwa seteko ya mukana wa luvula, kasingimiko kakapwa mukole wa lumana.”
Nyonzi ya mamanya ikakomba makuli oshe amwajendamena, livazi likanyongesa vuvando vweni. 18Cikumiiyo mwalikumiiye na kutsa cikahwa, co lizivasano mwalizivasanene na lifuti lya vukalo vwa vatsi vakalitundisa. Co vukalu vwa mankimba akungwanjanga akamikupula. 19Mutondo na mutondo, mutanya na vutsiki livazi lyakujujwisa likamyungumuna. Co lijwi limo na limo lyakutunda kuli Njambi likaminenela lyova! 20Mukapwa ngwe munu uje vasoneka mu livulu lya visimo, munu uje wesekele kulala a vulili vwavwihi oloni wonwene kutandavala, na lipai lyendi lalo lyapwile lyalindondo ngeci kasele kulishetula. 21#Yos 10:10-12; 2 Sam 5:20; 1 Miz 14:11 Shukulu Kalunga akalwa ngwe mwalwile a Munkinda wa Pelazime na mu Cimbongo ca Ngimbiyone, oloni a simbu eyi Shukulu Kalunga akalinga cuma cakukomokesa, kesi ngwe muje mumunayongola yeni embwe.
22Ngecivene, kesi mushendumune, kutewa mukakala mu vukalu vwakama manene kutuvakana kunima. Njinazivi vutumbe vwa Shukulu Kalunga Muka-nzili yoshe vwakunyongesa kaye koshe.
Mana a Njambi
23Tolilileni vije njili na kwendeka, co akeni vimbunge ku vije vinjimileka. 24Kukwesi ndimi alima ngoco mahya endi kujeneka kukunamo. 25Omo napupulula laja masinde, co akuna vimbuto vya vindungu, na ndile, na kumine. Akuna tiliku na mbale ya maumwa mu mikana, co ku shongo ya mahya endi akunako vimbuto vyeka lalo. 26Azivuka kupanga vipangi vyendi, omwo Njambi ikeye wamulongeselevyo. 27Ndimi kesi kupangesa mbweti yakulema akupupa ndile nambe kumine, oloni akapangesa viti vyavyehu vyamweseko. 28Ndimi kesi kuviisa tiliku akuyipupa-pupa, oloni azivuka muje muvakaijungwila omo etisao livalo lya litemba kutsena vinona. 29Mana oshe awa atunda kuli Shukulu Kalunga Muka nzili yoshe. Matumbe oshe akalingi Njambi apwa akushungama, co simbu yoshe apwa amavwa.
The Bible in Mbunda ©The Bible Society of Zambia, 2006