Hoziya 14
14
Hoziya emanena Isalele
1Yeni vanu va mu Isalele, ilukeni kuli Shukulu Kalunga Njambi yeni. Vuvi vweni vunamitanukisa nakumiwisa. 2Ilukeni kuli Shukulu Kalunga, co taveni lilombelo eli kupwa n̄ombelo yeni kuli ikeye, “Tusambese ku vuvi vwetu vwoshe, nakutambula lilombelo lyetu, co yetu tukakushangazala ngwe muje twakukulaesele. 3Vaka-Asilya kuvasa kutwamena, nameme tuvalu twa nzita kuvasa kutwamenena. Kutukendeka lalo ku tumponya twetu ngwetu, ‘Yeni munapu Njambi yetu’ embwe. Yove Shukulu Kalunga, ukazivila mema ku mbunge vaje kuvesi noku kweka vasa kuya.”
Shukulu Kalunga akulaesa mwonyo wauha kuli Isalele
4Shukulu Kalunga alinakwendeka ngwendi,
“Njikelwisa lalo vanu vange kuli yange vavenya.
Njikavazema na mbunge yange yoshe,
vukalu vwange ali vakevo vunahu.
5Njikakala amo na vanu va mu Isalele
ngwe nyonzi mu lifuti lyakuma.
Vakashamuna ngwe vishani,
co vakakola mbe ngwe mizi
ya miti ya ku Lembanone.
6Vakapwa ngwe kukola kwa minango,
vakapwa vavavwa ngwe miti ya olive.
Co vakanika lwengo lwaluvwa
ngwe miti ya kendale ya ku Lembanone.
7Vakakala kuli yange mu kwoloka.
Co vakakola ngwe vimbuto,
nakutuma manene ngwe mukolovozi
wa vushuka vwa vinyu.
Co vakapwa vaka-lutsimo ngwe vinyu
vya ku Lembanone.
8Vanu va mu Isalele kuvakalemesa lalo
tumponya embwe.
Njikakumbulula malombelo avo
nakuvanyunga mwamuvwa.
Njikavana munzinze,
ngwe muti uje kuwesi kutotomoka maputa awo,
yange njapwa nji nsina ya vivezikiso vyavo vyoshe.”
Mamaneselelo a visoneka
9Voshe vaje vaka-kunyanyama vazivuke vije vivanasoneka muno, nakuvinyunga mu mbunge. Vingila vya Shukulu Kalunga vyapwa vya vushunga, vaka-vushunga vayoya mu vikevyo, oloni vaka-vuvi vatanuka nakuwa omwo vavivyana.
Currently Selected:
Hoziya 14: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006