Hoziya 11
11
Cizemo ca Njambi kuli vanu vendi vaka-kutengulukila
1 #
Kut 4:22; Mat 2:15 Shukulu Kalunga alinakwendeka ngwendi,
“Omo Isalele wapwile mwanike,
njamuzemene,
tunde a simbu ije watundile mu Ingito,
co njamutumbwile ngwange munange.
2Nameme yange njamusanene
oloni ikeye watundile kuli yange.
Vanu vange vakombelelele kuli Mbale,
co venyekelele insense ku tumponya.
3Oloni njalongesele Isalele kwenda.
Njambatele vanu vange mu mavoko ange,
oloni kuvasele kunanguka ngeci
yange njavalelele embwe.
4Njavashwenyesele kuli yange na cizemo cange.
Njavajundwile nakuvaka a nulo yange,
njakulamene nakuvalisa.
5“Oloni vavyanene kwiluka kuli yange, ngecivene, vanapande kwilukila lalo ku Ingito, ngeci vaAsilya vakavashwane. 6Co nzita ikanyongesa vinganda vyavo nakusiwula vikolo vya nganda. Nzita ikanyongesa vanu vange, omwo valinakulinga vije vivayongola vakevo vavenya ngwavo vinapu vyavivwa. 7Valambelela ngeci vatunde kuli yange. Vakalilila kuli yange omwo mandauluwa ije ili ali vakevo, oloni naumo wai akavatundisayo.
8 #
Kwi 29:23
“Vatijo njasa kukwecelela, Isalele?
Vatijo njasa kukumbila kuti?
Kuma njasa kuminyongesa ngwe munjanyongesele
Andema ndi?
Nambe kumipangesa ngwe munjapangesele
Zemboime ndi?
Mbunge yange kuyikanjitavesa kucilinga!
Cizemo cange kuli yeni cinapu cakama manene.
9Kunjikaminyanyamesa akuluvala kwange embwe,
kunjikasa kunyongesa Isalele lalo embwe.
Omwo yange Njapwa nji Njambi,
kesi ngwe nji munu embwe.
Yange, Njapwa Wakujela njili amo neni.
Co kunjikaija lalo kuli yeni
mukuluvala embwe.
10“Vanu vange vakanjikava omo njikaana ngwe ndumba. Co vakazambula kwija kuli yange kutunda ku kangombe ka yambi. 11Vakaija kutunda ku Ingito ngwe tuzila, vakatunda ku Asilya ngwe mayembe. Co njikavanena ku membo avo lalo. Munjinendeka yange Kalunga.”
Isalele na Yunda vavahisa
12Shukulu Kalunga alinakwendeka ngwendi, “Vanu va mu Isalele vananjizengeleka na makuli nakukwisa, co vanu va mu Yunda valinakunjitengulukila yange Njambi wa kulongwa nakujela.
The Bible in Mbunda ©The Bible Society of Zambia, 2006