Ngalatiya 1
1
1Mukanda wakutunda kuli Paulu, muluwa kesi wakusana ku cizango ca vanu nambe kwitilila muli munu umo, oloni ali Yesu Kilistu na Njambi Tate, uje wamusangwile ku vatsi. 2Vakwetu voshe njilinavo kuno tulinakutuma viindu ku vikungulukilo vya mu Ngalatiya ngwetu,
3Njambi Tatetu na Mwene yetu Yesu Kilistu vamyane kutetela na kwoloka.
4Uje walyecele ikeye vavenya omwo vuvi vwetu, ngeci atwamene ku simbu ino yaivi, ngwe ku cizango ca Njambi Tatetu, 5vumpau vukale kuli Njambi ku myaka yoshe! Ewa.
Muzimbu umo
6Njakomoka kuli yeni! Mu simbu yaindondo yeni voshe munatundu kuli uje wamisanene na kutetela kwa Kilistu,#1:6 NA KUTETELA KWA KILISTU: Kunungulula kumo ngwavo, na kutetela kwendi. co munatava ku muzimbu weka lalo. 7Mwa vushunga, kukwesi “muzimbu weka,” oloni njilinakwendeka ngeci omwo kuli vamo vanu valinakumitanganesa vashaka kutengulula muzimbu wa Kilistu. 8Oloni nameme yetu nambe kangelo wakutunda mwilu nga ambulula kuli yeni muzimbu weka kesi uje utwamyambulwilile, co ikeye apwe wakusingiwa! 9Ngwe tunendeka laja, co na ololo njicili nakwendekamo lalo ngwange, nga munu umo akambulula kuli yeni muzimbu weka kesi uje utwamyambulwilile, co ikeye apwe wakusingiwa!
10Kuma eci cimwesa ngwe njilinakushaka vanu ngeci vanjishangale ndi Njambi? Indi njishaka kuvwaelelesa vanu ku vimbunge? Nga yange njilinakushaka kuvwaelelesa vanu, kunjapandele kupwa ngamba ya Kilistu.
Paulu mwapwile muluwa
11Njilinakumileka, vakwetu ngwange, muzimbu njilinakwambulula kuwapwile wakutunda kuli vanu embwe. 12Kunjautambwile kuli munu umo, nambe munu naumo wai wanjilongeselewo. Oloni vavenya Yesu Kilistu ikeye wanjishololwelewo.
13 #
Vil 8:3; 22:4-5; 26:9-11 Vamileka laja munjafwile omo njakundamene ku futisi ya vuYunda, muje munjayandesele cikungulukilo ca Njambi kujeneka mema ku mbunge, co njesekele na nzili yange yoshe ngeci njicinyongese. 14#Vil 22:3 Njahyanene vakwetu vamo va vaYunda vaje twakolelele amo omwo njanyanyamene manene ku futisi ya vuYunda, co njalikundikile manene ku vilika vya vakukulwila vetu.
15 #
Vil 9:3-6; 22:6-10; 26:13-18 Oloni Njambi mu kutetela kwendi wanjangwile omo kanda njisemuke, co wanjisanene mukumupangela. Co omo wayongwele 16kusholola Munendi kuli yange, ngeci njambulule Vin̄anda Vyavivwa kuli vaje kesi vaYunda, kunjaile kuli munu umo mukunjinangula embwe, 17nambe kunjaile ku Yelusalema mukumona vaje vapwile miluwa simbu kanda yange. Oloni njaile ku Alambiya, co njelukile ku Ndamasiku. 18#Vil 9:26-30 Kwetile myaka itatu, co njaile ku Yelusalema kukaziva muzimbu kuli Petulu, co njatumbamane nendi visimano vivali. 19Oloni kunjamwene miluwa veka kuvanga Yakomba,#1:19 OLONI KUNJAMWENE MILUWA VEKA KUVANGA YAKOMBA: Nambe, oloni kunjamwene miluwa veka, munu weka unjamwene wapwile Yakomba. ndolome ya Mwene.
20Evi vinjinasoneka vinapu vya vushunga. Njambi azivuka ngeci kunjendeka makuli!
21Asinoni njaile ku mafuti a ku Silya na Silisha. 22Co a simbu ije vanu va mu vikungulukilo vya mu Yunda kuvazivukile cihanga cange. 23Vazivile lika ngwavo, “Uje wakele nakutuyandesa ololo alinakwambulula kukulaela kuje kwashakele kunyongesa!” 24Co vashangazalele Njambi omwo yange.
The Bible in Mbunda ©The Bible Society of Zambia, 2006