Kutuuka 40
40
Kushimbika nakukundika Mbalaka Mwakuliwanena
1Shukulu Kalunga wendekele kuli Mosesa ngwendi, 2“A litangwa lyakulivanga ku ngonde yakulivanga, shimbika Mbalaka Mwakuliwanena. 3Akamo Cikasa ca Cikumiiyo muje muli Mashiko Likumi, co fwikako livamba kulutwe lwaco. 4Kovelesamo mesa, akao vivala vyayo, asinoni kovelesamo citumbikilo ca vindeya nakwimikao vindeya. 5Aka mutula wa ngolinde wakwenyekela insense yakunika lwengo lwaluvwa kulutwe lwa Cikasa ca Cikumiiyo, co shukika livamba ku cikolo ca Mbalaka. 6Co aka mutula wa milambu ya kwenyeka kulutwe lwa Mbalaka. 7Aka mbashiya yakujwelela akati ka Mbalaka na mutula, ishulise mema. 8Tungilako cipango cakuzengulwisa Mbalaka nakushukikako livamba ku cikolo.
9“Asinoni vwavesa Mbalaka na vivala vyayo vyoshe na mazi akuvwava nakuvikundika ngeci vipwe vyakujela. 10Co ukavwavesa lalo mutula na vivala vyawo vyoshe nakuvikundika, ngeci vyoshe vipwe vyakujela. 11Co lalo, mu ngila eyi vene, jelesa mbashiya yakujwelela na lisanda lyayo.
12“Asinoni nena Alone na vana vendi ku cikolo ca Mbalaka, ngeci uvajwelese na mema. 13Zika Alone vuzalo vwakujela, mukundike oku umuvwavesa, ngeci anjipangele kupwa muka-kukombelela. 14Nena lalo vana vendi uvazike visanya. 15Asinoni vavwavese, ngwe muunavwavesa ishavo, ngeci vanjipangele kupwa vaka-kukombelela. Kuvwavesa oku kukavapwisa vaka-kukombelela ku visemwa vyavo vyoshe vya kulutwe.”
16Mosesa walingile vyuma vyoshe ngwe muje mwamushikile Shukulu Kalunga. 17Co a litangwa lyakulivanga ku ngonde yakulivanga mu mwaka wamucivali omo vanatundu laja mu Ingito, vashimbikile Mbalaka Mwakuliwanena. 18Ngecivene, Mosesa waakele masanda ayo, nakwimika vivuliko vyayo, wavikwatesele na mambanze avyo, co wemikile lalo vimanda vyayo. 19Co wajangumwine cakufwika akamwa ya Mbalaka nakwakao cakufwika ca akamwa, ngwe muje mwamushikile Shukulu Kalunga. 20Asinoni wanonele vitale vivali vya mamanya wavyakele mu Cikasa ca Cikumiiyo. Co waakele mikambo mu makulo a Cikasa, co waakele cifwiko ca mema ku mbunge akamwa yaco. 21Waakele Cikasa mu Mbalaka nakushukikako livamba lyakuvambako. Mu ngila eyi mukemwo mwanyungilile Cikasa ca Cikumiiyo ngwe muje mwamushikile Shukulu Kalunga.
22Co Mosesa waakele mesa mu Mbalaka, ku mutambela wa ku kunto anja ya livamba, 23waakeleo makende aje valambwile kuli Shukulu Kalunga, ngwe muje mwamushikile Shukulu Kalunga. 24Co waakele citumbikilo ca vindeya mu Mbalaka ku mutambela wa mu mbwela, calishungamene na mesa. 25Co Mosesa washwamekele vindeya muje mu Mbalaka ku mesho a Shukulu Kalunga, ngwe muje mwamushikile Shukulu Kalunga. 26Co waakele mutula wa ngolinde mu Mbalaka, kulutwe lwa livamba, 27wenyekeleleo insense yakunika lwengo lwaluvwa, ngwe muje mwamushikile Shukulu Kalunga. 28Asinoni washukikile livamba ku cikolo ca Mbalaka, 29co kulutwe lwa livamba waakeleko mutula wakwenyekela milambu. Wakombeleleleo milambu ya kwenyeka na milambu ya vimbuto, ngwe muje mwamushikile Shukulu Kalunga. 30Co waakele mbashiya yakujwelela mukati ka Mbalaka na mutula, waishulisile na mema. 31Mukemwo vakele nakujwelela Mosesa, na Alone, na vana vendi. 32Vajwelelelemo oshe aje avakovelela mu Mbalaka nambe ku mutula, ngwe muje mwamushikile Shukulu Kalunga Mosesa. 33Co Mosesa washimbikile cipango cakuzengeleka ku Mbalaka Mwakuliwanena na mutula nakushukikako livamba ku cikolo ca cipango. Co wamanesele vipangi vyoshe.
Lishelwa lya akamwa ya Mbalaka Mwakuliwanena
(Kul 9:15-23)
34 #
1 Vim 8:10-11; Isa 6:4; Ezek 43:4-5; Kuj 15:8 Asinoni lishelwa lyafwikile Mbalaka, co ceke ca vumpau vwa ku mesho a Shukulu Kalunga cashulisile Mbalaka. 35Co Mosesa kasele kukovela mu Mbalaka, omwo lishelwa lyafwikile Mbalaka, co ceke ca vumpau vwa ku mesho a Shukulu Kalunga cashulisile Mbalaka. 36Co a vungenzi vwavo vwoshe vuvendele, omo lishelwa lyatundile a Mbalaka, co vaIsalele vendele, 37oloni nga lishelwa kulyatundileo, co kuvendele noo a litangwa lije omo lishelwa lyatundile a Mbalaka. 38Co simbu yoshe mu vungenzi vwavo vwoshe vamwene lishelwa lya Shukulu Kalunga akamwa ya Mbalaka a simbu ya mutanya, co tuhya twakele nakushukuma mu lishelwa a simbu ya vutsiki ku mesho a vanu voshe va Isalele.
Currently Selected:
Kutuuka 40: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006