Kutuuka 32
32
Muna ngombe wa nkomba wa ngolinde
(Kwi 9:6-29)
1 #
Vil 7:40; 1 Vim 12:28; Vil 7:41 Omo vanu vamwene ngeci Mosesa kezile vwasi kutunda ku munkinda oloni wakakele kuje simbu yakama manene, co vakungulukilile kuli Alone nakwendeka kuli ikeye ngwavo, “Kutuzivuka cuma mukajo cinalingiwa kuli ou munalume Mosesa, ou watutwamenenene kututundisa mu Ingito, oloni yove unapande kutupangela njambi ngeci atutwamenene.”
2Co Alone wendekele kuli vakevo ngwendi, “Tundiseni vimbilingwa vya ngolinde ku matwi a vanakazi veni, na vana veni va vanalume, na ava va vanakazi vije vanazala, co vineneni kuli yange.” 3Ngecivene, vanu voshe vatundisile vimbilingwa vya ngolinde vije vazalele ku matwi avo, co vavitwalele kuli Alone. 4Alone wanonele vimbilingwa, wavinyongolwele, wetilile ngolinde mu cimungilo, co wamungileo muna ngombe wa nkomba.
Co vanu vendekele ngwavo, “Eni vaIsalele, ou ikeye njambi yeni, uje wamitwamenenene nakumitundisa mu lifuti lya Ingito!”
5Asinoni Alone watungile mutula kulutwe lwa uje ngombe wa nkomba wa ngolinde, co watambekele ngwendi, “Imene kukakala ciwano cakusingimika Shukulu Kalunga.” 6#1 Koli 10:7 Co alikaki mutondo-tondo vanenele tusitu ngeci vavakombelele na tusitu vakwavo vaje valile kupwa milambu ya kulitombola. Co vanu vatumbamene ku ciwano cije, oloni vaciimwisile ciwano ca kupenda nakulinga vupangala.
7Co Shukulu Kalunga wendekele kuli Mosesa ngwendi, “Shelumukila asi vwasi-vwasi, omwo vanu vove, vaje watwamenenene nakuvatundisa mu Ingito, vanalingi vuvi nakunjivyana yange. 8Lajoko vanaseza ngila ije njavashikile kuyikava, vakevo vanamungu ngolinde kuyipwisa muna ngombe wa nkomba, co ikeye valinakulemesa nakukombelelako vin̄ombelo. Co valinakwendeka ngwavo ikeye njambi yavo, uje wavatwamenenene nakuvatundisa mu Ingito. 9Njizivuka kukaluwa kwa vimbunge vya vanu ava. 10Co ololo, njecele kesi unjivindike, omwo njinaluvala navo. Njivanyongesa voshe njwa, asinoni njikakupwisa yove na vatekulwila vove muyati wakama.”
11Oloni Mosesa walambelelele manene Shukulu Kalunga Njambi yendi wendekele ngwendi, “Ove Shukulu Kalunga, omwo vikajo unaluvalela manene ngeci na vanu vove, vaje wapatwile mu lifuti lya Ingito na livoko lyove lya nzili? 12Cikapwa vatijo omo vaka-Ingito vakendeka ngwavo yove watwamenenene vanu vove kuvatundisa mu Ingito, nakuvatsiila mu minkinda nakuvanyongeselamo voshe? Likele kuluvala, co yongolako mweka, kesi unene vukalu ovu ali vanu vove. 13#Kus 12:16-17; 17:8 Anuka vangamba vove, Avilahama, na Isake, na Yakomba. Anuka cikumiiyo cije walikumiiye navo ngwove ukavana vatekulwila vavangi ngwe vingongonosi vya mwilu, nakukaana lifuti kuli vatekulwila vavo lije liwavakulaesele ngeci likapwe vushwana vwavo ku myaka yoshe.” 14#Kul 14:13-19 Co Shukulu Kalunga watengulwile viyongola vyendi, kanenele vukalu ali vanu vendi ngwe mwalishungwiiye.
15Co Mosesa washelumukile ku munkinda, oku nambata vitale vivali vya vukaleo vya mamanya aje vasonekeleo mashiko ku mitambela yoshe noku-noku. 16Vije vitale vya mamanya vyapwile vipangi vya Njambi, co na visoneka vyapwile visoneka vya Njambi vyatalekele a vitale.
17Omo Yoshwa wazivile muyoyo wa vanu valinakujokota, co wendekele kuli Mosesa ngwendi, “Njilinakuziva muyoyo wa nzita mu cilombo.”
18Oloni Mosesa wamukumbulwile ngwendi, “Owo kesi muyoyo wakuhyana embwe, nambe mutambi wakutufungulula embwe, oloni njilinakuziva muyoyo wakwimba.”
19Omo Mosesa washwenyele kuyehi na cilombo wamwene muna ngombe wa nkomba, co lalo wamwene vanu valinakukina, co waluvalele manene-nene. Ngeci wombilile asi vije vitale wambatele mu mavoko endi, kwisi ya munkinda, co vyatavozokele. 20Ngecivene, wanonele uje muna ngombe wa nkomba yamungile Alone, wamwenyekele, co wamutwile vunga, wavushingile na mema. Asinoni wavunwisile vanu va Isalele. 21Co Mosesa wendekele kuli Alone ngwendi, “Vikajo vanalingi vanu ava kuli yove, ngeci uvakovelese mu vuvi vwakukomokesa ngacije?”
22Alone wamukumbulwile ngwendi, “Shukulu kesi unjiluvalese embwe. Wazivuka kukaluwa kwa ava vanu omo vakalingi vuvi. 23Vakevo vanendekele kuli yange ngwavo, ‘Kutuzivuka cuma mukajo cinalingiwa kuli ou munalume Mosesa, uje watutundisile mu Ingito, oloni yove unapande kutupangela njambi ngeci atutwamenene.’ 24Ngecivene, njavalekele kunjinenela ngolinde yavo, co vaje vakele nayo vainenele kuli yange, ngeci yange njayumbilile mu tuhya, co mwatuukile muna ngombe wa nkomba!” 25Co Mosesa wamwene ngeci Alone nongumuna vanu nakuvatundisa mu ngila yaivwa nakulinga vyangoco ku mesho a vitozi vavo. 26Co wemanene ku cikolo ca cilombo nakutambeka ngwendi, “Munu woshe uje nakundama ku mutambela wa Shukulu Kalunga aije kuno!” Ngecivene, vaLevi voshe vakungulukile nakumuzengeleka. 27Asinoni Mosesa wendekele kuli vakevo ngwendi, “Shukulu Kalunga Njambi ya vaIsalele nashiki ngwendi munu na munu ambate mukwale wendi, co iteni mu cilombo kushangumukila ku cikolo cino nakweta ku cikolo cikwavo, tsiyeni vandolome veni, na vasamba veni, na vandambo veni.” 28Co vaLevi vononokele, vatsiile makulukazi atatu a vanalume ku litangwa lije vene. 29Co Mosesa wendekele kuli vaLevi ngwendi, “Lelo munalijelesa yeni vavenya kupwa vaka-kukombelela kuli Njambi akupangela Shukulu Kalunga akutsiya vana veni va vanalume, na vandolome veni, co Shukulu Kalunga namivezikisa litangwa lya lelo.”
30Co alikaki Mosesa wendekele kuli vanu ngwendi, “Munalingi vuvi vwakukomokesa manene. Oloni ololo njilinakulamata lalo ku munkinda kuli Shukulu Kalunga, amo njikasa kuwanako kwambesa vuvi vweni.” 31Co Mosesa lalo welukilile kuli Shukulu Kalunga nakwendeka ngwendi, “Ava vanu vanalingi vuvi vwakukomokesa manene. Vakevo vanamungu njambi wa ngolinde nakumulemesa. 32#Mya 69:28; Kuj 3:5 Shukulu vasambese ku vuvi vwavo, oloni nga shove, co tundisa lizina lyange mu livulu lije wasoneka mazina a vanu vove.” 33Co Shukulu Kalunga wamukumbulwile ngwendi, “Kuvanga avalika vanalingi vuvi kuli yange vakevo vanjikatundisa mazina avo mu livulu lyange. 34Ololo iluka, ukatwamenene vanu nakuvatwala ku mwela uje unjakulekele. Kenga, kangelo kange ikeye akakutwamenena, oloni simbu ikaija omo yange njikanyanyamesa vanu ava a vuvi vwavo.”
35Ngecivene, Shukulu Kalunga watuminine vanu mushongo wakulitambwisa#32:35 MUSHONGO WAKULITAMBWISA: Walifwa na mushongo wa kahwenya. omwo vasindiiye Alone kuvamungila muna ngombe wa nkomba wa ngolinde.
Currently Selected:
Kutuuka 32: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
