Kutuuka 17
17
Mema akutunda mu limanya
(Kul 20:1-13)
1Mbunga yoshe ya vaIsalele vatundile ku Mambo ya Sine, co vajalozokele ngwe mwavashikile Shukulu Kalunga. Vakatungile cilombo ku Lefindime, oloni kuje kukwakele mema akunwa. 2Co valinyengelele kuli Mosesa nakwendeka ngwavo, “Twane mema tunwe.”
Mosesa wavakumbulwile ngwendi, “Omwo vikajo mulinakulinyengela kuli yange? Omwo vikajo mulinakweseka Shukulu Kalunga?”
3Oloni vanu va Isalele vakele na lihwila manene, co anga vatwaleleo kulinyengela kuli Mosesa. Vendekele ngwavo, “Omo vikajo watutundisilile mu Ingito ngeci wakututsise na vana vetu na vimuna vetu ku lihwila?”
4Co Mosesa watambekele nakulombela kuli Shukulu Kalunga wendekele ngwendi, “Vatijo njilinga na vanu ava? Vakevo vanesi kunjasha mamanya.”
5Co Shukulu Kalunga wendekele kuli Mosesa ngwendi, “Ya na vantwama vamo va Isalele, twama kulutwe lwa vanu, ambata mulamu wove uje wapupisile a Nailo. 6Yange njikakala kulutwe lwove a limanya a Munkinda wa Sinai. Pupa a limanya, co mema akatuukako ngeci vanu vakanwe.” Co Mosesa walingile ngacije ku mesho a vantwama va Isalele.
7Mwela uje vautumbwile Masa na Meliva,#17:7 MASA NA MELIVA: Awa mazina mu ciHevelu ananunguluka ngwawo, kweseka na kulinyenga. omwo vaIsalele valinyengele nakweseka Shukulu Kalunga omo vehwile ngwavo, “Kuma Shukulu Kalunga ali netu ndi?”
VaIsalele valwa nzita na vaAmaleke
8VaAmaleke vezile nakulwisa vaIsalele ku Lefindime. 9Co Mosesa wendekele kuli Yoshwa ngwendi, “Angula vanalume vamo ngeci imene vaye nakulwa na vaAmaleke. Co yange njikemana a lilundu nakukwatelela mulamu uje wanjilekele Njambi kuwambata.” 10Ngecivene, Yoshwa walingile ngwe mwamushikile Mosesa, co walwile na vaAmaleke, co Mosesa, na Alone, na Hule valamatele akamwa ya lilundu. 11Omo Mosesa wolwele mavoko endi, co vaIsalele vahyanene, oloni omo wawisile mavoko endi, co vaAmaleke vashangumukile kuhyana. 12Omo mavoko a Mosesa ajukile, Alone na Hule vamunenelele limanya ngeci atumbameo, co vakevo vemanene kuyehi nendi vajundwile mavoko endi, vawakwatelele noo litangwa lyatokele. 13Co mu ngila eyi vene Yoshwa wahyanene nakufungulula vaAmaleke.
14 #
Kwi 25:17-19; 1 Sam 15:2-9 Asinoni Shukulu Kalunga wendekele kuli Mosesa ngwendi, “Soneka vin̄anda evi vyakuhyana mu livulu, ngeci vikapwe canukiso. Co lalo leka Yoshwa ngwove njikanyongesa vaAmaleke voshe njwa.” 15Co Mosesa watungile mutula nakuuluka lizina ngwendi “Shukulu Kalunga ikeye Muka-kunjihyanesa.” 16Co wendekele ngwendi, “Eci cinasholoka omwo njakulaelele kuli Shukulu Kalunga! Shukulu Kalunga anga akatwalao kulwa na vaAmaleke ku visemwa vya kulutwe!”
Currently Selected:
Kutuuka 17: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
