Esita 9
9
VaYunda vanyongesa vitozi vavo
1Co litangwa lyamulikumi na atatu lya ngonde ya Andale lyetele, akeo a litangwa lije mutambi wa vumwene walingiwile na nzili, litangwa lije omo vitozi va vaYunda vakele na cinyangavili cakufungulula vaYunda. Oloni omo valingile ngacije, vaYunda vahyanene vitozi vavo. 2VaYunda valikungulwile mu vinganda vyavo vyoshe vya mu mafuti a Mwene Sheleshe, mukulwisa vaje voshe vashakele kuvanyongesa, naumo wai wasele kwimana ku mesho avo nakuvalwisa. 3Co vamyata voshe va mu mafuti, na vanguvulu, na vaka-kwendesa vipangi, na vaka-kwimanena vumwene, vakwasele vaYunda omwo voshe vazivile lyova ali Molendekai. 4Molendekai wapwile munu wa vulemu mu lipela, watsimanene mu mafuti oshe, co vamwamesele manene. 5Ngecivene, vaYunda vasele kulinga mwoshe muvashakele kuli vitozi vavo. Co vavalwisile na mikwale nakuvanyongesa.
6Mu Susa, nganda yakama, vaYunda vanyongesele vanu vakupwa 500. 7Co lalo vanyongesele, Paleshandata, na Ndalefone, na Asepata, 8na Polata, na Andaliya, na Alindata, 9na Palemashete, na Alisai, na Alindai, na Vaizata. 10Ava vakevo vana va Hamane va vanalume likumi vavatsiile, vapwile vana va Hamane uje muna Hamendata citozi ca vaYunda, oloni vije vyakupukula kuvavyambatele. 11Ngecivene, a litangwa lije vukaleo vwa vanu vavatsiile mu Susa vavunenele kuli mwene.
12Co mwene wendekele kuli Lishano Esita ngwendi, “Mu Susa lika vaYunda vanatsii vanu vakupwa 500, kwakao na vana va Hamane va vanalume likumi. Yanini mumunafu mu mafuti ange akwavo! Vikajo lalo vikwavo viwushaka ngeci njikwanevyo? Njileke cuma cikwavo lalo ushaka kulomba, co ukacitambula.”
13Co Lishano Esita wendekele ngwendi, “Nga cinakuvwasa shukulu, tava vaYunda va mu Susa imene valinge lalo ngwe muvanalingi lelo. Co mivila ya vana va Hamane likumi vaishukike a viti.” 14Co mwene washikile ngeci eci cilingiwe, co vatambekele mutambi ou mu Susa. Co mivila ya vana va Hamane likumi vaishukikile, vanu voshe vaimwene. 15Co a litangwa lyamulikumi na awana ku ngonde ya Andale vaYunda va mu Susa valikungulwile amo lalo nakutsiya vanu vakupwa 300 lalo mu nganda. Oloni kuvapukwile vyuma vyavo lalo.
16Co vaYunda vaje vakele mu mafuti akwavo a mwene valikungulwile amo nakulyamena. Co vovokele ku vitozi vavo omo vatsiile vanu vakupwa 75,000. Oloni kuvapukwile vyuma vyavo. 17Evi vyalingiwile a litangwa lyamulikumi na atatu ku ngonde ya Andale. Co alikaki, litangwa lyamulikumi na awana, vahwimine, co litangwa eli valipwisile litangwa lya ciwano nakujolela. 18Oloni vaYunda vaje vakele mu Susa, valikungulwile a litangwa lyamulikumi na atanu, na a litangwa lyamulikumi na awana mu ngonde ije vene, co vahwimine a litangwa lyamulikumi na atatu nakulipwisa litangwa lya ciwano cakulya nakujolela. 19Eci cikeco calingisa vaYunda ava valinakuyoya mu membo kunyunga litangwa lyamulikumi na awana ku ngonde ya Andale kupwa litangwa lyakuhwima nakujolela, simbu ya ciwano cakulya nakulyana mavwana kuli umo na mukwavo.
Ciwano ca Pulime
20Co Molendekai wasonekele vyuma evi nakutuma mikanda kuli vaYunda voshe vaje vakele mu mafuti oshe a Mwene Sheleshe wa Pelesha, na vaYunda vaje vakele muyehi, amo na vaYunda vaje vakele kulyala, 21wavalekele ngeci a mwaka na mwaka vakanyunge litangwa lyamulikumi na awana lya ngonde ya Andale, nakunyunga litangwa lyamulikumi na atanu kupwa matangwa akuhwima. 22Awa akewo matangwa aje vaYunda vafungulwile vitozi vavo, co ku ngonde ije vene kuviilila kwavo kwatengulukile kujolela, vusiwa vwavo vwatengulukile kuvwaelela. Co vavalekele ngeci vaapwise matangwa a ciwano nakujolela, nakulyana vwana vwa vyakulya kuli umo na mukwavo nakwana vwana kuli tuutu. 23Ngecivene, vaYunda vatavele ngeci vakalinge ngwe muje mwavasonekelele Molendekai, co kulisamba kwavo kwapwile futisi yavo ije valingile a mwaka na mwaka.
24 #
Esi 3:7
Co Hamane muna Hamendata mutekulwila wa Angange citozi ca vaYunda watele n̄ela ije vatumbwile ngwavo, “Pulime,” mukuwana litangwa lije vashakele kunyongesa vaYunda, ikeye wakele na vutumbe vwakuvanyongesa njwa. 25Oloni Esita waile kuli mwene, co mwene wasonekele mashiko ngeci vutumbe vwa Hamane vwavuvi vuje vwatumbilile vaYunda vumwilukile ikeye vavenya, co ikeye na vana vendi va vanalume vavashukikile a viti. 26Ngecivene, vatumbwile matangwa aje ngwavo, “Pulime,” lijwi linalumbunuka ngwalyo, “Ngombo.” Omwo a mukanda wa Molendekai nomwo a vyoshe vije vyalingiwile kuli vakevo, 27vaYunda valipwisile lishiko lyavo, na vatekulwila vavo, na munu woshe uje wapwile kaYunda, ngeci simbu ije omo inapumo a mwaka na mwaka a matangwa awa avali, vanapande kuwanyunga ngwe ku vilongesa vya Molendekai. 28Vanapande kwanuka ngeci, naanga ya kaYunda woshe na cisemwa coshe ca kulutwe mu lifuti lyoshe na mu nganda yoshe vanapande kwanuka nakunyunga matangwa a Pulime ku visimbu vyoshe vya kulutwe.
29Asinoni Lishano Esita, muna Avihaile, na Molendekai, vasonekele mukanda, na nzili yoshe mukukolesa mukanda uje wasonekele Molendekai akulivanga a Pulime. 30Mukanda ou vausonekelele vaYunda voshe, co uje mukanda vaunungulwile mu vungi nakutuma ije mikanda ku mafuti oshe aje apwile 127 a vumwene vwa Pelesha. Vashakele ngeci vaYunda vakale mu kwoloka na mu vuvwa, 31nakuvatwamenena vakevo na vatekulwila vavo mukunyunga matangwa a Pulime a simbu yawo, ngwe muvemikilile mashiko akulikela kulya, na visimbu vya kulila. Kushika eci vacilingile muvuvali vwavo Molendekai, na Lishano Esita. 32Co lishiko lya Esita lyakukolesa mashiko a Pulime, valisonekele mu livulu.
The Bible in Mbunda ©The Bible Society of Zambia, 2006