Esita 4
4
Molendekai alomba Esita ngeci amukwase
1Omo Molendekai wazivukile vyoshe vije vyalingiwile, co watavwile vuzalo vwendi wazalele cikeleya nakulishuwila lito ku mutwe, co waile mu nganda nakulila mbimbi-mutwe, 2noo wetele ku vukovelelo vwa lipela. Ikeye kakovelele mukati omwo naumo wai wakuzala cikeleya ivatavesele kukovela mukati. 3Co mu lifuti mwoshe, muje mwoshe muvazivile lishiko lya mwene, mwakele kulila kwakama manene akati ka vaYunda. Valikelele kulya, co valilile manene nakutatoka, co vungi vwavo vazalele vikeleya nakulala mu lito.
4Omo vangamba va Esita va vambanda na vayunuke vamulekele vije vyalingile Molendekai, co mbunge yendi yakaluwile. Co watumine vuzalo kuli Molendekai ngeci azale kutuvakana kuzala cikeleya, oloni kavitambwile. 5Asinoni Esita wasanene Hatake, kayunuke uje yemikile mwene kupwa ngamba yendi, co wamulekele kuya kuli Molendekai nakuwana cuma muka cinalingiwa, co lalo omwo vikajo alinakulinga ngacije. 6Hatake waile kuli Molendekai anja ya nganda ku vukovelelo vwa lipela. 7Co Molendekai wamulekele vyuma vyoshe vije vyalingiwile kuli ikeye, na vimbongo vingai vyanakulaesa Hamane kwaka mu mbango ya vumwene ngeci vanyongese vaYunda voshe. 8Co Molendekai waanene Hatake vukaleo vwa mukanda wa lishiko lije livasonekele mu Susa, lyakushika ngeci vanyongese vaYunda. Molendekai walekele Hatake ngeci akaumwese kuli Esita, nakumunungulwilawo nakumuleka aye kuli mwene nakumulomba ngeci azivileko mema ku mbunge vanu va Esita. 9Co Hatake waile nakuleka Esita majwi a Molendekai, 10co Esita welwisile lalo lijwi eli kuli Molendekai ngwendi, 11“Nga munu woshe, munalume nambe munakazi, akovela mu cipango ca mukati ka lipela nakumona mwene kwakujeneka kumusana, co munu uje vamutsiya. Eli likelyo lishiko lyazivuka munu woshe, kutunda kuli vaka-kunangula va mwene nakweta kuli vanu va mu lifuti. Kukwesi kumo kwakwongolokela lishiko eli, oloni nga mwene ajundula mulamu wendi wa ngolinde nakuwinika kuli uje munu, asinoni uje munu ovoka. Oloni kuneti ngonde tunde aje wanjisanene mwene.”
12Omo Molendekai watambwile lijwi lyakutunda kuli Esita, 13co welwisile lijwi kuli Esita ngwendi, “Kesi uyongole ngwove yove ukovoka kutuvakana vaYunda veka omwo uli mu lipela embwe. 14Nga yove woloka ngoco kuluu a simbu yakufwa ngwe ino, co zivuka ngwove vaYunda vakatambula vukwaso kweka, co yove na naanga ya isho mukanyonga. Oloni iyajo wazivukile ngwendi a simbu ino omo yove unapu lishano kukaija simbu yakufwa ngeci?”
15Co Esita welwisile lalo lijwi kuli Molendekai ngwendi, 16“Kungulula vaYunda voshe amolika mu Susa, co likeleni kulya nakunjilombelelako. Kesi mulye nambe kunwa cuma cimo a matangwa atatu mutanya na vutsiki embwe. Co vangamba vange va vambanda amolika nange tukalinga cuma cimo. Co munima yevi, njikaya kuli mwene, nameme kesi mukemwo munayi mashiko. Nga njikatsa akulinga cuma eci, co njinapande kutsa vene.”
17Asinoni Molendekai waile, co wakalingile vyuma vyoshe vije vyamulekele Esita.
The Bible in Mbunda ©The Bible Society of Zambia, 2006