Esita 2
2
Esita apwa lishano
1Munima ya vyuma evi, vukalu vwa mwene vwahwile, oloni mwene anga vene wanukile vije vyalingile Lishano Vashiti, na lishiko lije lyasonekele mwene ali ikeye. 2Ngecivene, vamo vaka-kunangula mwene vendekele ngwavo, “Shukulu, kucitava ngeci vakushakezekele mumbanda umo wamuvwa uje kanda alimone na munalume? 3Shukulu, imika vamyata mu lifuti limo na limo lya vumwene vwove ngeci vawane vambanda vavavwa vaje kanda valimone na vanalume nakuvanena muno mu Susa, mu nganda, ku njuvo ya vambanda, ngeci kayunuke Hengai muka-kunyunga vanakazi vove akavanyunge, co vakavane mazi akunika lwengo lwaluvwa ngeci vavwave. 4Asinoni mumbanda woshe uje aya mwene ku mbunge, co apwe lishano ainge mu mwela wa Vashiti.”
Ciyongola eci cavwaelesele mwene ku mbunge, co walingile ngwe muje vamulekele.
5Co mu Susa mwakele kaYunda umo lizina lyendi Molendekai muna Njaile, Njaile muna Shimei, Shimei muna Kishe, kaMbenjemani. 6#2 Vim 24:10-16; 2 Miz 36:10 Omo Mwene Nevukaneza wa ku Mbambilone watwalele Mwene Yehoyakine wa mu Yunda ku vunzinda kutunda mu Yelusalema, amolika na munga ya vinzinda, co na Molendekai wakele akati kavo. 7Molendekai wakele na shongo yendi, lizina lyendi Esita, mu ciHevelu lizina lyendi ngwavo Handasa. Ikeye wapwile mumbanda wamuvwa manene, co wakele na cifwa cacivwa. Co omo visemi vendi vatsile, Molendekai wamulelele kupwa ngwe munendi vene.
8Omo mwene washikile lishiko lyendi, co vambanda vavangi vavanenele ku Susa, na Esita wakele akati kavo. Co nendi lalo vamwakele mu lipela mukumunyunga kuli Hengai, uje wapwile muka-kunyunga vambanda va ku lipela. 9Hengai wazemene Esita, wamuvwasele ku mbunge. Co wamwanene vwasi mazi akuvwava akunika lwengo lwaluvwa, na vyakulya vyendi vyapwile vyavivwa. Co wamwanene mwela wauvwa amo na vangamba va vambanda vatanu na vavali ngeci vamupangele muje mu njuvo ya vambanda. 10Molendekai wasin̄ikile Esita ngeci kesi alekeko vanu ngeci ikeye wapwa kaYunda. 11A litangwa na litangwa Molendekai wakele nakwendangana kulutwe lwa cipango ca njuvo ya vambanda, ngeci awane vati mwalinakuyoyela Esita, na cuma muka cikalingiwa kuli ikeye.
12Co omo simbu ya mumbanda na mumbanda woshe yetele yakuya kuli Mwene Sheleshe, omo vanalingi nendi laja ngwe ku vilongesa vya vambanda a simbu yavo yakulivwaesa, vingonde vitanu na imo na mazi a miila, co vingonde vitanu na imo na mazi akunika lwengo na vikwavo lalo vyakulivwaesa navyo vanakazi. 13Omo mumbanda atunda ku njuvo ya vambanda aya ku lipela, vamwanene vyoshe vyashakele ngeci atwale kuli mwene. 14Mumbanda wasele kuya ku lipela ku simbu ya cingwezi, co alikaki mutondo vamutwala ku njuvo ikwavo ya vambanda nakumwana kuli kayunuke Shaashengaze, muka-kunyunga mashano va mbanja. Co ikeye kakelukilako lalo, kuvanga mwene ashaka kusimutwiya nendi nakumusana a lizina.
15Omo simbu ya Esita yetele yakuya kuli mwene. Esita, muna Avihaile shongo ya Molendekai, uje wamulelele ngwe munendi vene, munu na munu washakele Esita omo wamumwene. Omo simbu yendi yetele, co wazalele ngwe muje mwamunangwile kayunuke Hengai muka-kunyunga vambanda. 16Ngecivene, mu mwaka wamucitanu na ivali ku ngonde yamulikumi, ngonde ya Tembete,#2:16 TEMBETE: Mu ciHevelu inapu ngonde yamulikumi, kutunda akati ka Nzimbi nakweta akati ka Kavalana. vanenele Esita kuli Mwene Sheleshe ku lipela. 17Co Mwene washakele manene Esita kutuvakana vakwavo vambanda voshe, nakutuvakana voshe veka vaje vavwaelesele Mwene ku mbunge nakuvazema. Co wamuzikile cilongo ca vumwene ku mutwe wendi, nakumupwisa lishano mu mwela wa Vashiti. 18Asinoni mwene walingile ciwano cakama manene mukusingimika Esita, nakulanya vamyata vendi voshe na vaka-kwendesa vipangi. Co mwene wemikile litangwa lyakuhwima#2:18 LITANGWA LYAKUHWIMA: Nambe ngwavo, kutundisa milambu ivakafwete vanu mu lifuti. mu vumwene vwendi vwoshe nakwana vwana kwesekesa na muje muvakaanena mwene.
Molendekai amena mwonyo wa mwene
19A simbu ije Molendekai vamwimikile kuli mwene kupwa muka-kwendesa vipangi. 20Oloni Esita kalekeleko munu umo ngeci ikeye wapwa kaYunda. Omwo Molendekai wamulekele ngeci kesi alekeko munu umo, co wamwononokele, ngwe muje mwamwononokele simbu ya vwanike omo wamulelele.
21A simbu ije Molendekai wapwile mukulunu mu lipela, co Mbingetane na Teleshe, vayunuke vavali va ku lipela vaje vanyungile ku cikolo ca ku milili ya mwene, vakele na vutozi kuli Mwene Sheleshe, co vatumbile vutumbe vwakumutsiya. 22Molendekai wazivile cuma eci, co walekele Lishano Esita, co Esita wakalekele mwene vije vyamulekele Molendekai. 23Omo valohwelelele n̄anda eyi, co vawanene ngeci vukaleo vwa Molendekai vwapwile vwa vushunga, ngecivene, vanalume voshe ava vavali vavashukikile a viti. Co mwene washikile ngeci vasoneke n̄anda eyi mu livulu lya vumwene.
The Bible in Mbunda ©The Bible Society of Zambia, 2006