Efeso 2
2
Kutunda ku kutsa kukovela ku mwonyo
1 #
Kol 2:13
Laja mwapwile mu vatsi ku munzinzime omwo kumwononokele, co mwalingile vuvi. 2A simbu ije mwakavangeyeye vingila vya vuvi vwa ano a kaye, mwononokele ku mwene wa vushwana vwa mu mukambwila, ku munzinzime ou ololo alinakutwamenena vanu vaje kuvesi nakwononoka Njambi. 3Mwa vushunga vene tuvavoshe twafwile ngwe vakevo, co twayoyele vene ngwe ku cisemwa ca mashungu etu a vunu, twalingile vije vyoshe mivila yetu na mana etu akele nakuvilinga. Ku cisemwa cetu ca vunu ngwe vanu voshe, vatwimikilile tuyande ku vukalu vwa Njambi.
4Oloni Njambi wapwa muka-mema ku mbunge, co na cizemo cendi kuli yetu capwa cakama manene 5ngeci nambe omo twatsile ku munzinzime akujeneka kwononoka kwetu, watuyoyesele amo na Kilistu. Akutetela kwa Njambi ngeci munovoka. 6Akukala kwetu muli Kilistu Yesu watusangwile amo nendi ngeci tukashwane amo nendi mu lifuti lya mwilu. 7Walingile evi kupwa cimweso ku visimbu vyoshe vije vikaijako akumwesa vukama vwa kutetela kwendi kuje kutwasa kuseteka mu cizemo cije catumwesele muli Kilistu Yesu. 8Omwo a kutetela munovoka akukulaela. Eci kesi ngwe a vilinga vyeni embwe, oloni cinapu vwana vwa Njambi, 9kesi a vilinga, kutewa munu alishashe. 10Njambi natupwisa muje mutunafu, co akukala kwetu muli Kilistu Yesu watutangelele mwonyo wa vipangi vyavivwa, vije watuvwaeselelevyo laja ngeci tuvilinge.
Tunapu tu umo muli Kilistu
11Yeni kesi mu vaYunda ku cisemwa, vaje vatumbula ngwavo “vaka-kujeneka kutuuka” ngwe ku futisi ya vaYunda, vaje valitumbula ngwavo vaka-kutuuka (eci cilinakwinika vanu vivalinakulinga ku mivila yavo), anukeni vati mwafwile mu simbu yalaja. 12A simbu ije mwangunukile kuli Kilistu. Mwapwile mu vangenzi kumwakundamene ku vanu va Njambi vakwangula. Kumwakele na mutambela mu mazivasano, aje emanene a vikulaeso vya Njambi kuli vanu vendi, co yeni mwayoyele ano a kaye kujeneka cinyangavili nakujeneka Njambi. 13Oloni ololo muli Kilistu Yesu, yeni mwakele kulyala, vanaminena kuyehi a maninga a Kilistu. 14Omwo Kilistu natunenela kwoloka akupwisa vaYunda na vaje kesi vaYunda kupwa munu umolika. Na muvila wendi vavenya, wavujwile civumbe cije cavangunwine nakuvapwisa vitozi. 15#Kol 2:14 Wamanesele lishiko lya vaYunda amo nakushika kwalyo na futisi yalyo, ngeci muli ikeye a miyati ivali atange muyati umolika, ngeci kukale kwoloka. 16#Kol 1:20 A kutsa kwendi a cilindakano Kilistu wanyongesele cizindo, a cilindakano napandakana miyati ivali nakuyipwisa muvila umolika nakuvanena kuli Njambi. 17#Isa 57:19 Ngecivene, Kilistu wezile nakwambulula Vin̄anda Vyavivwa vya kwoloka kuli voshe, kuli yeni kesi vaYunda, vaje vakele kulyala na Njambi na kuli vaYunda vaje vakele muyehi nendi. 18Ali Kilistu yetu voshe, vaYunda na vaje kesi vaYunda, tunasa kwija mu Munzinzime umolika ku mesho a Tate.
19Ngecivene, yeni kesi vaYunda kumwapwile lalo mu vangenzi nambe vaka-kwija embwe, yeni ololo munapu mu vandambo amo na vanu va Njambi, yeni ololo munapu naanga ya Njambi. 20Neni lalo vanamitungu a luvula luje luvajalele miluwa na vaka-kwimanena,#2:20 LUVULA LUVAJALELE MILUWA NA VAKA-KWIMANENA: Nambe, luvula, lukelwo, miluwa na vaka-kwimanena. limanya lije lya mu mbango likelyo Kilistu Yesu vavenya. 21Muli ikeye njuvo yoshe vanainungasana mwamuvwa, ilinakukola nakuyipwisa njuvo yakujela ya Shukulu Kalunga yakukundika kuli Mwene. 22Muli ikeye neni lalo valinakumitunga mumo na vakweni veka ngeci mupwe njuvo ya Njambi ali Munzinzime wendi.
The Bible in Mbunda ©The Bible Society of Zambia, 2006