Kwituluka mu Mashiko 32

1“Eni melu, tolilileni majwi ange,

asi, zivilila mwamuvwa evi njendeka.

2Vilongesa vyange vipwe ngwe mambase a nyonzi

ije indwekela asi ngwe mume.

Majwi ange akapwe ngwe nyonzi

ije isukwila a vimbuto vya njovolwezi,

ngwe kusukula kwa nyonzi

ilinakunyokela a mwila wauvwa.

3Njikashangazala lizina lya Shukulu Kalunga,

co vanu vendi vakambulula vukama vwendi.

4“Shukulu Kalunga ikeye cimpaka ceni ca nzili

wakulambasa na kwoloka mu vingila vyendi vyoshe.

Njambi yeni wapwa wa kulongwa na vushunga,

akalingi mwamuvwa nakushungama.

5Oloni yeni mwalingile mwamuvi kuli ikeye,

co kumwapandele kupwa mu vanu vendi embwe,

muyati wauvi wa makuli.

6Kuma eyi ikeyo ngila imukapangesa nayo

kuli Shukulu Kalunga ndi?

Eni vikolokomba vakujeneka mana!

Ikeye ishweni, uje wamitangele,

ikeye wamipwisile muyati.

7“Yongoleni a matangwa a kunima,

ihuleni vaishweni vamileke vije vyalingiwile,

ihuleni vakukulwila veni

vamileke vije vyalingiwile laja.

8 # Vil 17:26 Omo Njambi wa Akamwa ya Vyoshe

waanene miyati mafuti avo,

waangunwine vanu,

watavwilile vanu vinginga,

ngwe ku vungi vwa vanu va Isalele.

9Oloni ikeye walyangwilile vatekulwila va Yakomba,

wavaangwile kupwa vushwana vwendi.

10“Ikeye wavawanene vendangana

mukati ka mambo,

mu mambo, mwakuhuwa lihunzi, mwakujeneka mema.

Ikeye wavanyungile nakuvalela,

ngwe munu mwakanyungu lisho lyendi.

11Ngwe ngonga alongesa vana vendi kupulula,

avatundisa mu lishwa,

co avakavwila a mambava endi,

ngeci kesi vawe,

Shukulu Kalunga wanyungile Isalele ngeci kesi vawe.

12Shukulu Kalunga ikeye lika watwamenenene vanu vendi,

kukwakele njambi weka wamukwasele.

13“Ikeye wavatavesele kushwana mafuti a malundu,

valile vije vyamenene mu mahya.

Vawanene vuki mukati ka mamanya,

miti yavo ya olive yakolele mwamuvwa

mu livu lya mamanya.

14Vingombe na vimembe vavo

vakele na mavele amangi,

co vakele na vana va vimanga,

na majamba a vimanga vakununa,

na matanga amavwa a vingombe,

na vimembe va ku Mbashane,

na tiliku yaivwa,

na vinyu vyakutovala manene.

15“Vanu va Shukulu Kalunga, vafukile,

valile manene nakukuta,

oloni vevalele Njambi Ishamatanga wavo,

vavyanene muyoyesi wavo muka-nzili.

16Vashangumwine lifuwa lya Shukulu Kalunga

akulemesa tumponya,

co vamuluvalesele na vilinga vyavo vya vunyengwe.

17 # 1 Koli 10:20 Vakombelelele ku vinjambi

vaje kesi va vushunga,

vinjambi vaje kuvazivukile vakukulwila vavo,

vinjambi vavaha vaje vaIsalele

kuvavononokele akulivanga.

18Co vevalele Njambi yavo,

muyoyesi wavo ikeye muka-nzili,

uje wavanene mwonyo.

19“Omo Shukulu Kalunga wamwene evi,

co waluvalele,

omwo vana vendi va vanalume na ava va vanakazi

vamushangumwine.

20Co wendekele ngwendi,

‘Kunjikavakwasa lalo embwe,

ngeci njikamone vije vikalingiwa kuli vakevo,

vanu vakukaluwa vimbunge,

vanu vakujeneka kulongwa.

21 # 1 Koli 10:22; Lom 10:19 Vananjiluvalesa na tumponya twavo,

nakunjilingisa lifuwa na vinjambi vavo va makuli,

vinjambi vaje kesi vinjambi va vushunga embwe.

Ngecivene, njikashangumwina vaIsalele

muyati wa vanu veka ngeci vavaluvalese,

co njikavashangumwina lifuwa na muyati

wa vulema.

22Vukalu vwange vukashukuma ngwe tuhya,

vukenyeka vyuma vyoshe vya ano asi.

Co vuketa na mu vukalo vwa vatsi,

nakunyongesa luvula lwa minkinda.

23“ ‘Co njikanena tuyando

twakujeneka kuhwa ali vakevo,

co njikapangesa vukalu vwange vwoshe ali vakevo.

24Co vakalanduka ku njala na ku lilanga,

mishongo yakukomokesa ikavalya.

Njikatuma vikashama va mu shwata nakuvatsiya,

na manyoka va vushungu vwavuvi vakavashuma.

25Vanu vakatsa mu vitapalo ku moko ya mukwale,

na munjunju ukakala mu membo.

Vakwenje na vambanda vakatsa,

co vimbututu na tukulukazi vakatsa.

26Njayongwele kuvanyongesa voshe njwa,

ngeci kesi kukakale umo lalo akavanuke.

27Oloni kunjikecela vitozi vavo

valishashe ngeci vanafungulula vanu vange,

omwo yange vavenya njavatsene.’ ”

28“Isalele wapwa muyati wakujeneka mana,

kuvesi na mana omwo kuvesi kuzivisisa.

29Nga vakele na mana

ngwe vazivukile vije vyalingiwile,

oloni kuvayongwele kuhwa kwavo.

30Omwo vikajo vanu 1,000

vafungulukile kuli munu umo?

Na vanu 10,000 vafungulukile

kuli vanu vavali lika?

Omwo Shukulu Kalunga Njambi yavo

wavakengesele nima,

omwo Njambi yavo muka-nzili

wavakundikile mu mavoko avo.

31Vitozi vavo vazivukile ngeci

vinjambi vavo vapwa vakuzeya,

kuvesi na nzili ngwe Njambi ya Isalele.

32Vitozi vavo vapwa vavavi manene

ngwe Sondoma na Ngomola,

vapwa ngwe mikolovozi ya vushuka vwa vinyu

ije ikemi vushuka vwakulula,

na makasha-kasha avwo apwa akulula,

33Vapwa ngwe vinyu vyakulula ngwe vushungu,

vwa mambwambwa.

34“Shukulu Kalunga alinakwanuka

vije vivalingile vitozi vavo.

Ikeye navandamena simbu yakuvahisa.

35 # Lom 12:19; VaHe 10:30 Shukulu Kalunga akavalinga shambandinga nakuvahisa,

simbu iketa omo vakawa,

litangwa lya tuyando twavo lili muyehi.

36 # Mya 135:14 Shukulu Kalunga akapatula vanu vendi,

omo akamona ngeci nzili yavo inahu.

Ikeye akakala na mema ku mbunge

ali vaje vamupangela,

omo akavamona ngeci vanazeye.

37Asinoni Shukulu Kalunga akehula vanu vendi ngwendi,

‘Vali kulijo vaje vinjambi va nzili vamwakulaelele?

38Mwavalisile na mazi a vije mwakombelelele,

co mwavanene vinyu vyakunwa.

Vaije oni nakumikwasa!

Vaije oni nakumipatula!

39“ ‘Yange, yange lika, njapwa Njambi,

kukwesi njambi weka lalo wa vushunga wai.

Njikatsii, co njana mwonyo,

njikavetwesa, co njikangwisa,

naumo wai asa kupopolola vije vinjinalingi.

40Mwa vushunga yange njapwa Njambi

wakuyoya simbu yoshe,

njikajundula livoko lyange nakulisinga,

41ngeci njikotola mukwale wange wakuvyazima,

njikamona ngeci vushunga vunalingiwa.

Njikalinga shambandinga kuli vitozi vange,

nakuhisa vaje vanjizinda.

42Mikili yange ikandweka na maninga avo,

co mukwale wange ukatsiya voshe vaje

vaka-kunjipopolola.

Naumo wai injikayoyesa akati ka vaje

vaka-kunjilwisa,

nameme vishwalonda na vinzinda vakatsa.’

43 # Lom 15:10; Kuj 19:2 “Yeni miyati munapande kushangazala

vanu va Shukulu Kalunga.

Ikeye akahisa voshe vaje vakatsiya vanu vendi,

omwo ikeye akalinga shambandinga ali vitozi vendi,

nakwamena vuvi vwa vanu vendi.”

44Co Mosesa na Yoshwa muna Nune vatambekelele majwi oshe a mwaso ou, ngeci vanu va Isalele vazive mwamuvwa.

Vilongesa vya Mosesa vyakumanesela

45Omo Mosesa wamanesele kuleka vanu vilongesa vyoshe vya Njambi, 46co wendekele kuli vakevo ngwendi, “Mwa vushunga ononokeni mashiko oshe awa njinamilekawo ku litangwa lya lelo. Alongeseni vana veni, ngeci vakononoke na kulongwa vilongesa vyoshe vya Njambi. 47Vilongesa evi kesi majwi angoco aje kuwesi na seo embwe. Vikevyo vene vinapu kuyoya kweni. Vyononokeni, co mukayoya simbu yakama mu lifuti lije lili musambwa ya Ndonga ya Yondau, lije muli kuyehi nakulishwana.”

48A litangwa lije vene Shukulu Kalunga wendekele kuli Mosesa ngwendi, 49“Lamata a Munkinda wa Nembo uje uli mukati ka Minkinda ya Avalime mu lifuti lya Mowavi, walishungama na Yeliko. Co ukenge lifuti lya Kanana lije linjana kuli vanu va Isalele nakulishwana. 50Ukatsila a munkinda uje vene, ngwe ndolome yove Alone watsililile a Munkinda wa Hole, 51omwo muvuvali vweni kumwanjikulaelele nakunjisingimika ku mesho a vanu va Isalele, omo mwakele ku mema a ku Meliva, kuyehi na nganda ya Kandeshe mu mambo ya Zine, kumwasingimikile kujela kwange ku mesho a vanu. 52#Kul 27:12-14; Kwi 3:23-27 Lifuti lije ulimwena kulyala, oloni kuukakovela mu lifuti lije njilinakulyana kuli vanu va Isalele.”

Currently Selected:

Kwituluka mu Mashiko 32: MBB

Highlight

Copy

Compare