Kwituluka mu Mashiko 27
27
Vasoneka mashiko a Njambi a vitale vya mamanya
1Asinoni Mosesa na vantwama va Isalele vendekele kuli vanu ngwavo, “Nyungeni mashiko oshe awa njilinakumyana ku litangwa lya lelo. 2#Yos 8:30-32 A litangwa lije yeni mukajavuka Ndonga ya Yondau nakukovela mu lifuti lije lyakamyana Shukulu Kalunga Njambi yeni, mukemika mamanya amo akama nakuwasalimba. 3Asinoni mukasonekao mashiko oshe awa na vilongesa vyoshe evi. Omo mukakovela mu lifuti lije lyakamyana Shukulu Kalunga Njambi yeni, lifuti lije lyalivwa nevi vyakujenekamo vyai, ngwe muje mwamikulaesele Shukulu Kalunga Njambi ya vakukulwila veni, 4co omo munajavuka Ndonga ya Yondau, mukemika mamanya awa a Munkinda wa Evale nakuwasalimba, ngwe omo njinamishiki ku litangwa lya lelo. 5Co mukatunga mutula wa mamanya aje kuvapangesele na vikuvo. 6#Kut 20:25 Mukatungila mutula Shukulu Kalunga Njambi yeni na mamanya kesi akushonga. Co aje a mutula mukakombelelao vin̄ombelo vya kwenyeka. 7Co lalo mukakombelela nakulya milambu yeni ya kulitombola, nakuvwaelela ku mesho a Shukulu Kalunga Njambi yeni. 8Co aje a mamanya akusalimba mukasonekao mwamuvwa majwi oshe a mashiko a Njambi.”
9Asinoni Mosesa amolika na vaLevi vaka-kukombelela vendekele kuli vanu va Isalele voshe ngwavo, “Yeni vanu vaIsalele njitolilileni. Litangwa lya lelo yeni munapu vanu va Shukulu Kalunga Njambi yeni. 10Ngecivene, ononokeni nakunyunga mashiko endi na vizilika vyendi evi vinjimileka ku litangwa lya lelo.”
Visingo vya vaka-kujeneka kwononoka
11Co a litangwa lije vene, Mosesa wendekele kuli vanu va Isalele ngwendi, 12#Kwi 11:29; Yos 8:33-35 “Omo yeni munajavuka Ndonga ya Yondau, vaka-miyati eyi vakemana a Munkinda wa Ngelizime omo vambulula vivezikiso vya ali vanu, Simyoni, na Levi, na Yunda, na Isakale, na Yosefa, na Mbenjemani. 13Co miyati eyi vakemana a Munkinda wa Evale omo vambulula visingo, Luvena, na Ngande, na Ashele, na Zembuloni, na Ndani, na Nafetali. 14Co vaLevi vakatambeka majwi awa ngwavo,
15 #
Kut 20:4; 34:17; VaLe 19:4; 26:1; Kwi 4:15-18; 5:8 “ ‘Cisingo ca Njambi cikale ali munu woshe uje ashonga kamponya ka limanya, nambe ka citi, nambe ka cikuvo, nakukalemesela mu vushweke, cuma eci cinapu ca vunyengwe kuli Shukulu Kalunga.’
“Co vanu voshe vakakumbulula ngwavo, ‘Ewa!’
16 #
Kut 20:12; Kwi 5:16 “ ‘Cisingo ca Njambi cikale ali munu woshe uje kasingimika va ishe nambe vaina.’
“Co vanu voshe vakakumbulula ngwavo, ‘Ewa!’
17 #
Kwi 19:14
“ ‘Cisingo ca Njambi cikale ali munu woshe uje atundisa nginga ya mukwavo.’
“Co vanu voshe vakakumbulula ngwavo, ‘Ewa!’
18 #
VaLe 19:14
“ ‘Cisingo ca Njambi cikale ali munu woshe uje atwamenena kapuputwa kweka, nakuseza ngila.’
“Co vanu voshe vakakumbulula ngwavo, ‘Ewa!’
19 #
Kut 22:21; 23:9; VaLe 19:33-34; Kwi 24:17-18 “ ‘Cisingo ca Njambi cikale ali munu woshe uje ahengesa vin̄anda vya vaka-kwija, na visiwa, na vifwile.’
“Co vanu voshe vakakumbulula ngwavo, ‘Ewa!’
20 #
VaLe 18:8; 20:11; Kwi 22:30 “ ‘Cisingo ca Njambi cikale ali munu woshe uje azivisa shwamwa ishe akulala na munakazi wendi.’
“Co vanu voshe vakakumbulula ngwavo, ‘Ewa!’
21 #
Kut 22:19; VaLe 18:23; 20:15 “ ‘Cisingo ca Njambi cikale ali munu woshe uje alala na kasitu.’
“Co vanu voshe vakakumbulula ngwavo, ‘Ewa!’
22 #
VaLe 18:9; 20:17 “ ‘Cisingo ca Njambi cikale ali munu woshe uje alala na ndokazi yendi nambe wa ku vuyishe nambe wa ku vuyina.’
“Co vanu voshe vakakumbulula ngwavo, ‘Ewa!’
23 #
VaLe 18:17; 20:14 “ ‘Cisingo ca Njambi cikale ali munu woshe uje alala na vainamweno.’
“Co vanu voshe vakakumbulula ngwavo, ‘Ewa!’
24“ ‘Cisingo ca Njambi cikale ali munu woshe uje atsiya mukwavo munu mu vushweke.’
“Co vanu voshe vakakumbulula ngwavo, ‘Ewa!’
25“ ‘Cisingo ca Njambi cikale ali munu woshe uje atambula lizika-kanwa ngeci atsiye munu uje kesi na mulonga.’
“Co vanu voshe vakakumbulula ngwavo, ‘Ewa!’
26 #
Ngala 3:10
“ ‘Cisingo ca Njambi cikale ali munu woshe uje kononoka majwi a mashiko a Njambi nakuwanyunga.’
“Co vanu voshe vakakumbulula ngwavo, ‘Ewa!’
Currently Selected:
Kwituluka mu Mashiko 27: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
