Kwituluka mu Mashiko 21
21
Monde ya vukaleo vwavuvwa
1“Nga mukawana munu umo vanamutsiila mu shwata mu lifuti lije lyakamyana Shukulu Kalunga Njambi yeni, co yeni kumuzivuka uje namutsii, 2co vantwama veni na maako vakaya nakweseka nunda, kutunda ku mwela uje vanawana civimbi nakweta ku nganda na nganda ije ili muyehi na uje ivanatsii. 3Asinoni vantwama va nganda ije ili kuyehi kuje vanawana civimbi vakaangula muna ngombe wa lwavo uje kanda vapangese nambe kumulemeka mandauluwa. 4Co vakamushelumwise ku ngenge ya muna ndonga uje kesi kuma mema muje kanda valimemo nambe kukunamo vimbuto, co vakamupokole mukoshi kuje. 5Co vaLevi vaka-kukombelela, navo vakashwenyeko, omwo Shukulu Kalunga Njambi yeni wavaangwile kumupangela nakwambulula vivezikiso mu lizina lyendi, co lalo nakukanda lwozi nakuvatula vin̄anda vyoshe. 6Asinoni voshe vantwama vanatundu ku nganda ije ili kuyehi kuje vanawanene civimbi vakajwelele mavoko avo akamwa ya uje muna ngombe wa lwavo uje vanapokwele mukoshi. 7Vakendeke ngwavo, ‘Kesi yetu tunatsii ou munu embwe, co kutuzivuka ou nacilingi. 8Ove Shukulu Kalunga, sambesa vanu vove va Isalele, vaje vawakulile ku Ingito. Vasambese, co kesi uvahise a kutsa kwa munu ou kakele na mulonga.’ 9Ngecivene, akulinga vyakushungama vije vyashaka Shukulu Kalunga, co kumukakala na mulonga wa a kutsa oku embwe, mukatundisa vuvi vwa cifwa eci mukati keni.
Vanakazi vaje vavanafungulula mu nzita
10“Omo mukaya nakulwa nzita na vitozi veni, co Shukulu Kalunga Njambi yeni akavakundika mu mavoko eni, 11co nga munu umo akati keni akamona munakazi wamuvwa akati kavo, co ikeye amushaka ngeci apwe munakazi wendi, 12co amutwale ku njuvo yendi, co uje munakazi akaliteule mutwe wendi, nakulilenga vyala vyendi, 13akashulule vuzalo vwa vunzinda nakuzala vuzalo vweka. Co akakale ngonde yoshe yamutunu a vusiwa vwa visemi vyendi. Co munima yevi asinoni akamwambata. 14Cooni kulutwe nga kamushaka, co akamwecele aliile ngoco, co kesi akamupangese ngwe ndungo nambe kumulandesa embwe, omwo ikeye namuviisa.
Vushwana vwa va ntwatwa
15“Nga munalume ali na vanakazi vendi vavali, umo wawana vulo, mukwavo kawanene vulo, co voshe vakita nendi vana va vanalume. Oloni nga uje munendi wa ntwatwa kesi wa uje munakazi wawana vulo, 16co a litangwa lije akapangela vufuko vwendi akati ka vana vendi, kesi akapwise mwana wa uje munakazi wawana vulo kutambula vushwana vuje vwapandele kupwa vwa munendi wa ntwatwa embwe. 17Oloni akaane matambelo avali a vufuko vwendi kuli uje munendi wa munalume wa ntwatwa, nameme kesi ikeye mwana wa kuli munakazi uje wawana vulo. Munalume ou napande kutava munendi wa ntwatwa nakumwana vushwana vwa vu ntwatwa vuje vunapu vwendi.
Mwana wakujeneka kwononoka visemi
18“Nga munu ali na mwana wa munalume muka-kalewilizi na likamba, mwana wakujeneka kwononoka visemi vendi, nameme vamunyanyamesa ikeye kavatolilila, 19visemi vendi vakamutwale kuli vakulunu va muje mu nganda muvakala ngeci vakamusompe. 20Co vakevo vakaleke vakulunu ngwavo, ‘Ou munetu muka-kalewilizi, co lalo wakala na likamba, kesi kutwononoka, co ikeye muka-kupenda nakuviisa vimbongo.’ 21Co vanalume voshe va muje mu nganda vakamwashe mamanya nakumutsiya, co yeni mukatundisa vuvi vwa cifwa eci akati keni. Vanu voshe va mu Isalele vakaziva evi vivanalingi, co vakakala na lyova.
Mashiko akuliseza-seza
22“Nga munu vanamutsii a mulonga wanalingi, co muvila wendi vakawushukike a muti, 23#Ngala 3:13 co uje muvila kuwapandele kulala aje vutsiki vwoshe embwe. Vanapande kuutsinda a litangwa lije vene, omwo muvila wakushukika a muti unena cisingo ca Njambi a lifuti. Tsindeni uje muvila ngeci kesi mukajwalese mu lifuti lije lyakamyana Shukulu Kalunga Njambi yeni.
Currently Selected:
Kwituluka mu Mashiko 21: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
