Kwituluka mu Mashiko 10
10
Mosesa atambula aje mashiko lalo
(Kut 34:1-10)
1“A simbu ije Shukulu Kalunga wendekele kuli yange lalo ngwendi, ‘Lamuna vitale vivali vya mamanya vyakufwa ngwe vije vyakulivanga. Co lalo shonga cikasa ca mavaya ngeci uwaakemo. Co lamata wije kuno ku munkinda kuli yange, 2co njikasoneka aje a vitale majwi aje vene akele a vitale vyakulivanga vije viwapazwile. Asinoni ukavyake mu cikasa.’
3“Ngecivene, njashongele cikasa ca mavaya a mungongo, co njalamwine vitale vivali vya mamanya ngwe vije vyakulivanga. Co njalamatele ku munkinda na vitale vije vivali mu mavoko ange. 4Asinoni Shukulu Kalunga wasonekele a vitale vije majwi a cifwa cimo ngwe aje asonekele a simbu yakulivanga, Mashiko Likumi aje amyanene ku munkinda oku ali mukati ka tuhya, a litangwa lije mwakungulukilile kuje. Co Shukulu Kalunga wanjanene vije vitale vivali. 5Asinoni njatengulukile na kushelumuka kutunda ku munkinda. Co njaakele vije vitale vivali mu cikasa cije njashongele ngwe mwanjishikile Shukulu Kalunga mukemwo vene muvili na lelo lino.”
6 #
Kul 20:28; 33:38 (Co vanu va Isalele vatundile ku masima a vaNjakane, vaile ku Moshela. Oloni Alone watsililile kuje, co vamutsindile, ngeci munendi Elyazale wengile mu mwela wendi kupwa muka-kukombelela. 7Akutunda kuje vaile ku Ngundengonda, co vatundile ku Ngundengonda vaile ku Njotembate lifuti lya vana va vindonga vya mema. 8#Kul 3:5-8 A simbu ije Shukulu Kalunga waangunwine muyati wa Levi kupwa vaka-kwambata Cikasa ca Cikumiiyo ca Shukulu Kalunga, nakwimana ku mesho a Shukulu Kalunga nakumupangela nakuvezikisa vanu mu lizina lya Shukulu Kalunga, ngwe muvali nakulinga na lelo lino. 9Omu mukemwo muyati wa Levi kuvesi na mutambela nambe vushwana akati ka vandolome vavo. Shukulu Kalunga ikeye vushwana vwavo ngwe muje mwavalekele Shukulu Kalunga Njambi yeni.)
10 #
Kut 34:28
“Njakele a munkinda matangwa makumi awana mutanya na vutsiki ngwe munjalingile a simbu yakulivanga. Shukulu Kalunga wanjitolililile lalo a simbu ije. Kucapwile cizango cendi ngeci aminyongese embwe. 11Asinoni Shukulu Kalunga wendekele nange ngwendi, ‘Ya utwamenene vanu va Isalele ku vungenzi vwavo ngeci vakakovele nakushwana lifuti lije linjakulaesele kwana vakukulwila vavo.’
Vije vyashaka Njambi kuli vanu va Isalele
12“Co ololo, yeni vanu va Isalele, tolilileni kuli vije vyashaka Shukulu Kalunga Njambi yeni kuli yeni. Lemeseni Shukulu Kalunga Njambi yeni, nakwenda mu vingila vyendi vyoshe. Muzemeni nakumupangela na vimbunge vyeni vyoshe, na mwonyo weni woshe, 13nakwononoka mashiko endi oshe, na vizilika vije vinjinamishiki ku litangwa lya lelo ngeci mukakale mwamuvwa. 14Kengeni, lilu lya mwilu ya melu, na kaye, na vyoshe vilimo vyapwa vya Shukulu Kalunga Njambi yeni. 15Nameme ngoco Shukulu Kalunga wazemene vakukulwila veni manene, ngeci waangwile yeni vene vatekulwila vavo kutuvakana vanu veka. 16Ngecivene, kutunda ku litangwa lya lelo, pweni vaka-kwononoka kuli Shukulu Kalunga kesi mupwe vaka-kukaluwa vimbunge. 17#1 Tim 6:15; Kuj 17:14; 19:16; Vil 10:34; Lom 2:11; Ngala 2:6; Efe 6:9 Omwo Shukulu Kalunga Njambi yeni ikeye wapwa Njambi ya vinjambi voshe, na Shukulu ya vishukulu voshe, Njambi wakama wakujujwisa. Ikeye Muka-nzili yakukomokesa, kesi na kahangu, co kesi kutambula lizika-kanwa embwe. 18Ikeye akasompela vushunga visiwa na vifwile, co azema vaka-kwija vaje valinakukala akati ketu, avaana vyakulya na vuzalo. 19Ngecivene, zemeni vaka-kwija, omwo neni lalo mwapwile vaka-kwija mu lifuti lya Ingito. 20Ononokeni Shukulu Kalunga Njambi yeni nakumupangela. Kakateyeni kuli ikeye nakulisinga mu lizina lyendi lika. 21Mwaleseni, ikeye wapwa Njambi yeni. Ikeye wamilingilile vikomokeso vyakama vyakujujwisa, vije mwalimwenenene yeni vavenya na mesho eni. 22#Kus 15:5; 22:17; 46:27 Omo vakukulwila veni vaile ku Ingito, vakevo vapwile lika makumi atanu na avali. Oloni ololo Shukulu Kalunga Njambi yeni namitumisa manene-nene ngwe vingongonosi vya mwilu.
Currently Selected:
Kwituluka mu Mashiko 10: MBB
Highlight
Copy
Compare
Share
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006
