Ndanyele 8
8
Cimona ca Ndanyele ca lijamba lya manga na lijamba lya membe
1Mu mwaka wamucitatu omo Mbeleshazale wapwile mwene, yange Ndanyele, njamwene cimona cikwavo lalo camucivali.#8:1 Kutunda ano nakweta ku shongo ya lyangununo 8:1, vanapangesa muyati wa ciHevelu (kenga 2:4). 2Mu cimona eci njamwene njili mu nganda ya cimpaka mu Susa, nganda ije yakele mu lifuti lya Elame. Njemanene ku ngenge ya Ndonga ya Ulai, 3co kuje vene ku ngenge ya ndonga njamwene kunemana lijamba lya manga. Ikeye wakele na vimbinga vivali vyavilaja, imo yapwile yailaja, co lalo yapwile yaiha kutuvakana mbinga ikwavo. 4Co njamwene uje lijamba apikisa vimbinga vyendi mu kangombe ka yambi na ku kunto na mu mbwela. Naumo kasitu wai wasele kumuvindika nambe kuputumuka kuli ikeye. Ikeye walingile vyoshe vije vyashakele, co lalo walyalesele.
5Omo njakele nakuyongola muvinalumbunukila vyuma evi, co lijamba lya membe wezile lumbisi kutunda mu kangombe ka yambi, washatukile vwasi-vwasi ngeci mendi endi asholokele ngwe kuwakele nakulyata asi. Co uje membe wakele na mbinga imo akati ka mesho endi avali. 6Wezile kuli lijamba lya manga uje wakele na vimbinga vivali injamwene nemana ku ngenge ya ndonga, co wamushatukilile na vukalu na nzili yendi yoshe. 7Njamumwene alwisa uje lijamba lya manga. Co wakele na vukalu vwakama manene, watsenene nakupokozola vije vimbinga vivali. Co uje lijamba lya manga kakele na nzili yakulwa nendi. Wamuwisilile asi nakumulyatangela, co naumo wai waamenene uje lijamba lya manga.
8Co uje lijamba lya membe walyalesele manene, oloni omo wakolele, co ije mbinga yendi yakama yapokokele. Co mu mwela wayo mwamenene lalo vimbinga vikwavo viwana, co imo na imo yakengesele mu mutambela weka. 9Akati ka vimbinga evi viwana amenene mbinga imo yaindondo. Yapwile yailaja, yetele mu mbwela na mu ngangela na ku Lifuti lya Cikulaeso. 10#Kuj 12:4 Co yakolele manene na nzili yasele kulwisa mbunga ya nzita ya mwilu, vikevyo vingongonosi vene, co yawisilile vimo asi, co yavilyatangelele. 11Yalyalesele lalo na kuli Ntwama wa nzita ya mwilu, nakuvindika vin̄ombelo vije vakele nakukombelela kuli ikeye, co yajwalesele Njuvo ya Shukulu Kalunga yakujela. 12Vanu valingilile vuvi kuje kutuvakana kukombelela vin̄ombelo vyavivwa vya a litangwa na litangwa, co vombilile kuti kulemesa kwavo kwa vushunga. Co ije mbinga yahyanene mu vyuma vyoshe viyalingile.
13Asinoni njazivile kangelo umo ehula kangelo mukwavo ngwendi, “Vyuma evi vivanamono mu cimona vikahwa simbu ika? Simbu mukajo vukahwa vuvi ovu vwakukomokesa vulinakuvindika vin̄ombelo vya a litangwa na litangwa? Simbu mukajo vakalyatangela mbunga ya nzita ya mwilu na Njuvo ya Shukulu Kalunga?”
14Co njazivile kangelo mukwavo wakumbulwile ngwendi, “Kuvanga kuneti matangwa akupwa 2,300 mutondo na cingwezi, co kuvakakombelela vin̄ombelo. Asinoni vakajelesa Njuvo ya Shukulu Kalunga.”
Kangelo Ngambiliyele alumbununa cije cimona
15Omo yange Ndanyele njamwene cije cimona, co njashakele kuzivuka mucalumbunukilile, co kengeni, kulutwe lwange kwemanene munu umo. 16#Luk 1:19,26 Njazivile lijwi lya munu lyatambekele akamwa ya mema ku Ndonga ya Ulai ngwalyo, “Ngambiliyele, mulumbunwine cimona cije camwene.” 17Co Ngambiliyele wezile nakwimana kuyehi nange, co njazivile manene lyova ngeci njawililile asi.
Co ikeye wendekele kuli yange ngwendi, “Muna munu, zivisisa mwamuvwa mucalumbunukila cimona. Cimona eci cimwesa simbu omo kaye kakahwa.” 18Omo wakele nakwendeka, co njatsilemo kavela-vela. Oloni wanjikwatele ku livoko, co wanjimikile, 19wendekele ngwendi, “Njikumwesa muvukafwa vukalu vwa Njambi. Cimona eci cimwesa simbu yakukotoka.
20“Lijamba lya manga uje iwamwene ali na vimbinga vivali nemanena vumwene vwa Mende na Pelesha. 21Uje membe nemanena vumwene vwa Ngelese, co ije mbinga ya akati ka mesho endi inemanena mwene wakulivanga. 22Co vimbinga viwana vije vyengile mu mbinga ije yapokokele vinemanena vumwene vuwana vuje vukaangununa muyati uje, oloni kuvukakala na nzili ngwe vumwene vwakulivanga embwe.
23“Omo vuje vumwene vuwana vukahwa, co vukapwa vwavuvi ngeci vavunyanyamese, co kukakala mwene wa mbunge yakukaluwa na muuka na makuli. 24Ikeye akakala na nzili yakama, oloni kesi nzili yendi vavenya embwe. Ikeye akaviisa manene vyuma mu ngila yakukomokesa, co akalinga vyuma vyoshe vyashaka. Ikeye akaviisa vanu vaka-nzili na vanu va Njambi. 25Omo akunyanyama kwendi, akavezika mu vilinga vyendi vya makuli. Ikeye akalyalesa nakunyongesa vanu vavangi omo vayongola ngwavo valimwamuvwa. Akavyana nameme Mwene ya vimyene voshe, oloni vakamunyongesa kujeneka kupangesa nzili ya munu. 26Cimona cakukombelela ca cingwezi na mutondo civanakulumbunwina cikapwa ca vushunga. Oloni unapande kucinyunga mu mbunge yove, omo kukaita myaka yaingi simbu kanda cipwe ca vushunga.”
27Co yange Ndanyele, njazeyele manene nakuvinja matangwa amo. Asinoni njendukile, co njapangele vipangi vya mwene vije vyanjikundikile, oloni njalikomokelele a cimona cije kunjasele kucizivisisa.
The Bible in Mbunda ©The Bible Society of Zambia, 2006