Ndanyele 5
5
Ciwano ca Mbeleshazale
1A vutsiki vumo Mbeleshazale walanyele vamyata vendi vakupwa 1,000 ngeci vaye ku ciwano cakama cakulya nakunwa vinyu.
2Omo vakele nakunwa, co Mbeleshazale washikile ngeci vanene vinganja vya ngolinde na siliva na malonga aje akambatele ishe#5:2 ISHE: Kwakele vimyene vavangi mukati ka Nevukaneza na Mbeleshazale. Lijwi eli “ishe” ilumbunuka kwinga, nambe lizina lya Nevukaneza lyasa kupwa lizina lya Navonindase. Nevukaneza mu Njuvo ya Shukulu Kalunga mu Yelusalema. Mwene watumine ngeci vakavishake, anwilemo ikeye na vanu vendi va vulemu na mashano vendi na mashano vendi va mbanja. 3Aje vene vanenele vinganja vya ngolinde na siliva na malonga, co voshe vanwilililemo vinyu. 4Vashangazalele tumponya twavo tuje tuvapangele na ngolinde na siliva na vunengu na vutale na viti na mamanya.
5Vwasi-vwasi livoko lya munu lyasholokele, co lyashangumukile kusoneka a civumbe ca lipela cakusalimba, ku mutambela wa civumbe kuje kwakele ceke cakama. Omo mwene wamwene livoko lilinakusoneka a civumbe, 6co cihanga cendi cafufutukile, wazivile lyova manene, co mavuli endi ajajele. 7Co mwene watambekele na lijwi lyakama ngeci vanene vaka-manseno na valozi na vaka-kulukiya. Omo vezile kuli ikeye, co mwene wavalekele ngwendi, “Woshe uje alava evi vanasoneka aa nakunjilumbunwinavyo, co vakamuzika cikoveyo ca linyu cacilaja ca vumwene, co akazala lalo lilyenge lya ngolinde lya kasingimiko mu mukoshi wendi, co akapwa wamucitatu mukushika mu vumwene vwange.” 8Co voshe vaka-mana va mwene vezile, oloni naumo wai wa ali vakevo wasele kulava vije vivasonekele nambe kuleka mwene muje muvyalumbunukilile. 9Cuma eci cakolesele manene lyova Mwene Mbeleshazale, co cihanga cendi cafufutukile manene, vaje vanu vendi va vulemu kuvasele kuwana ngila yakumukwasela.
10Ngecivene, vamwene, vaina ya mwene vazivile muyoyo walingile mwene na vanu vendi va vulemu, co wakovelele muje mu njuvo ya ciwano. Wendekele ngwendi, “Yove shukulu, yoya ku myaka yoshe! Shukulu, viyongola vyove kesi vikupese, na cihanga cove kesi cifufutuke embwe. 11Kwali munalume umo mu vumwene vwove ali na munzinzime wakujela wa vinjambi.#5:11 MUNZINZIME WAKUJELA WA VINJAMBI: Kenga 4:8. Omo isho wapwile mwene, munalume ou washolwele mana amavwa nakuzivisisa na mana ngwe mana a vinjambi. Co isho Mwene Nevukaneza#5:11 ISHO MWENE NEVUKANEZA: Kenga 5:2. wamupwisile mukulunu wa vaka-kulukiya, na vaka-manseno, na valozi, na vimbanda. 12Ikeye simbu yoshe wakala na mana, nakunyanyama, na vutongwe mukulumbununa vinjozi, nakulumbununa tusau, nakulumbununa mahungu, ngecivene, tuma munu akasane ou munalume Ndanyele uje valukile lizina kuli mwene lya Mbeletesezale, co akukuleka muvinalumbunukila vije visoneka vyasholokele.”
Ndanyele alumbununa visoneka vya a civumbe
13Ngecivene, vanenele Ndanyele ku mesho a mwene. Co mwene wendekele kuli ikeye ngwendi, “Yove vene Ndanyele, cinzinda wa kaYunda uje yanenele tate kuno kutunda ku Yunda ndi? 14Njazivi ngwavo munzinzime wakujela wa vinjambi#5:14 MUNZINZIME WAKUJELA WA VINJAMBI: Kenga 5:2. uli muli yove, co lalo yove u muka-vutongwe na mana nakuzivisisa. 15Vaka-kunangula, na vaka-manseno vavanenele ngeci vakulave visoneka evi nakunjileka muvinalumbunukila, oloni kuvasele kunjilumbunwinavyo. 16Ngecivene, njazivi ngwavo yove wasa kulumbununa vyakushweka nakulumbununa mahungu. Nga wasa kulava visoneka evi nakunjilumbunwinavyo, co vakakuzika cikoveyo ca linyu cacilaja ca vumwene, nakukuzika lilyenge lya ngolinde lya kasingimiko mu mukoshi wove, co yove ukapwa wamucitatu mukushika mu vumwene.”
17Co Ndanyele wamukumbulwile ngwendi, “Kunjishaka kutambula vwana vwove. Nga ushaka, vwane kuli munu weka. Oloni yange njikakulavela yove shukulu vije vivanasoneka nakukulumbunwinavyo.
18“Njambi wa Akamwa ya Akamwa wapwisile isho Nevukaneza mwene wakama, co wamwanene vulemu na vukama. 19Ikeye wapwile wakama manene ngeci vanu va mafuti oshe na miyati yoshe ya vanu na vaka-kwendeka mu vindaka vyeka vamutewele nakumuzivila lyova. Nga ashaka kutsiya munu, aje vene asa kumutsiya, nga ashaka kwamena munu, co aje vene asa kumwamena. Ikeye wasele kusingimika munu nambe kumupopolola. 20Oloni omo walyalesele nakukaluwisa mbunge, nakupwa wa muuka, co vamutundisile a litanda lyendi lya vumwene na kasingimiko kendi kahwile. 21Co vamutundisile kuli vanu, mana endi apwile ngwe a kasitu. Wakele amo na vingolo, walile mwila ngwe ngombe, co walalele anja yangoco na muvila wendi wajulile na lime. Akukotoka walilongesele ngeci kuma kukwesi weka lalo kuvanga Njambi wa Akamwa ya Akamwa ikeye uje ashika vumwene vwoshe vwa vanu, co asa kuvwana kuli woshe uje yashaka.
22“Oloni yove munendi, kuwalikeesele, nameme vene wazivukile vyuma vyoshe evi. 23Walingile mwamuvi ku mesho a Shukulu Kalunga wa mwilu akunena vinganja na malonga vya mu Njuvo ya Shukulu Kalunga. Yove, na vanu vove va vulemu, na mashano vove, na mashano vove va mbanja mwanwilililemo vinyu nakushangazala tumponya vakupanga na ngolinde, na siliva, na vunengu, na vutale, na viti, na mamanya, na tumponya vaje kuvesi kumona nambe kuziva, nambe kuzivuka cuma cimo. Oloni kuwasingimikile Njambi uje wanyunga mwonyo wove na vyuma vyoshe vije viwukalingi. 24Eci cikeco cinanenesa ngeci Njambi atume livoko nakusoneka majwi.
25“Evi vikevyo vivasonekele, ‘Kulava, kulava, kupeselesa, kulyangunuka!’ 26Omu mukemwo muvyalumbunukila. Kulava, kulumbunuka ngeci Njambi nalava matangwa a vumwene vwove, co vunahu, 27kupeselesa, vanakupeselesa a cipeseleso, co vanawana ngeci uwamwehu manene, 28kulyangunuka, vumwene vwove vanavwangununa ngeci vavwane kuli vaMende na kuli vaPelesha.”#5:28 VAPELESHA: Mu ciAlamaike lijwi eli lya vaPelesha linalifu na lijwi ngwavo, kulyangunuka.
29 #
Kus 41:42
Aje vene Mbeleshazale washikile ngeci vanenele Ndanyele cikoveyo cacilaja ca linyu ca vumwene, na lilyenge lya ngolinde lya kasingimiko ngeci vamuzike mu mukoshi wendi. Co wamupwisile wamucitatu mukushika mu vumwene vwendi. 30Co ku vutsiki vuje vene Mbeleshazale mwene wa Mbambilone, vamutsiile, 31co Ndalyuse kaMende uje wakele na myaka makumi atanu na limo na myaka ivali, watambwile vumwene.
The Bible in Mbunda ©The Bible Society of Zambia, 2006