Ndanyele 10
10
Cimona ca Ndanyele ku ngenge ya Ndonga ya Tingelise
1(Mu mwaka wamucitatu omo Siluse wapwile mwene wa Pelesha, co lijwi lyezile kuli Ndanyele uje ivatumbwile Mbeletesezale. Lijwi lije lyapwile lya vushunga oloni lyapwile lyalikalu kulizivisisa.#10:1 LYAPWILE LYALIKALU KULIZIVISISA: Nambe, lyapwile lijwi lya nzita yakama manene. Ngecivene, valilumbunwine kuli ikeye mu cimona.)
2A simbu ije vene, yange Ndanyele, njalinyengele na vusiwa visimano vitatu. 3Kunjalile vyakulya vyavivwa nambe kulya situ, nambe kunwa vinyu, nambe kusakula vin̄ambu vyange noo visimano vitatu vyetile.
4A litangwa lyamumakumi avali na matangwa awana ku ngonde yakulivanga ku mwaka,#10:4 NGONDE YAKULIVANGA KU MWAKA: Ngonde ya Nisane (ikeyo lalo Avive). Mu ciHevelu inapu ngonde yakulivanga, kutunda akati ka Kuwana nakweta akati ka Kuhu. njemanene ku ngenge ya ndonga yakama, Ndonga ya Tingelise. 5#Kuj 1:13-15; 2:18; 19:12 Njakengele, co njamwene munalume umo wazalele vuzalo vwa linyu na mwiva wa ngolinde yaivwa. 6Muvila wendi wavyazimine ngwe limanya lya seo. Cihanga cendi cavyazimine ngwe muhyato, co mesho endi alengenyene ngwe tuhya tushukuma. Mavoko endi na mendi endi vyavyazimine ngwe vunengu, co lijwi lyendi lyafwile ngwe muyoyo wa mbunga ya vanu vavangi.
7Yange lika njamwene cimona cije. Vanu vaje njakele navo kuvamwene cuma cimo cai, oloni vakele na lyova manene, co vatewele nakukavanda. 8Njasalele kuje ange lika mukumona cimona eci cakukomokesa. Kunjakele na nzili lalo yai, co cihanga cange cemukile mweka ngeci naumo wai wasale kunjizivuka. 9Omo njazivile lijwi lyendi, co njawililile asi njatsilemo kavela-vela, njavulumanene nakukengesa cihanga cange asi. 10Asinoni livoko lyanjikwatele nakunjimika, oloni anga njakele nakujaja vene.
11Uje kangelo wendekele ngwendi, “Ndanyele, Njambi wakuzema. Katuka utolilile mwamuvwa evi vinjendeka kuli yove. Yange vananjitumu kuli yove.” Omo wendekele majwi awa, co njakatukile oku njilinakujaja.
12Asinoni wendekele ngwendi, “Ndanyele, kesi uzive lyova. Njambi nazivi malombelo ove kutunda a litangwa lyakulivanga lije wayongwele kulikeesa ngeci wase kuzivisisa. Yange njinaija mukukumbulula ku lilombelo lyove. 13#Kuj 12:7 Kangelo muka-kunyunga vumwene vwa Pelesha wanjivindikile matangwa makumi avali na limo. Asinoni Mingeli, uje mukulunu wa tungelo, wezile nakunjikwasa, omo njasalele ange lika muje mu vumwene vwa Pelesha. 14Yange njinaija ngeci uzivisise vije vikalingiwa kuli vanu vove kulutwe. Eci cikeco cimona ca vyuma vya kulutwe.”
15Omo wakele nakwendeka majwi awa kuli yange, co njakengele asi kunjasele kwendeka. 16Asinoni kangelo uje wafwile ngwe munu, wolwele livoko lyendi nakukwata ku kanwa kange. Co njendekele kuli ikeye ngwange, “Shukulu, cimona eci cinanjizeyesa manene, kunjasa kusimpa. 17Yange njinapu ngwe ndungo uje nemana ku mesho a shukulu yendi. Vikajo njendeka kuli yove? Yange kunjesi na nzili nambe muku wakwendeka nawo.” 18Co wanjikwatele lalo, asinoni njakele na nzili. 19Co wendekele lalo ngwendi, “Njambi wakuzema, ngecivene, cuma cimo kesi cikupese nambe kukuzivisa lyova embwe.”
Omo wendekele evi, njazivile nzili yakama manene, co njendekele ngwange, “Shukulu, njileke viwushaka kwendeka. Ololo njili na nzili oni.”
20Co wendekele kuli yange ngwendi, “Yove uzivuka omwo vikajo njinezila kuli yove? Njinaija mukusholola vije vivanasonekele mu Livulu lya Vushunga. Co ololo njilinakwiluka nakukalwa nzita na uje kangelo muka-kunyunga Pelesha. 21Co munima yevi, kangelo muka-kunyunga wa ku Ngelese akasholoka. Co kukwesi weka akanjikwasa wai kuvanga Mingeli,
The Bible in Mbunda ©The Bible Society of Zambia, 2006