Vilinga vya Miluwa 17

Mu Tesalonika

1Paulu na Silasi vatwaleleo vatuvakanene mu Afipolise na mu Apoloniya, co vezile ku Tesalonika, kuje kwakele sinangonge ya vaYunda. 2Co ngwe ku cilika cendi, Paulu waile ku sinangonge. Co a Matangwa Akuhwima atatu wasimutwiiye na vanu kuvaleka 3nakuvalumbunwina Visoneka, nakuvamwesa vukaleo vwa kutunda mu visoneka ngeci Wakuvwavesa napande kuyanda nakusanguka ku vatsi. Co Paulu wendekele ngwendi, “Ou Yesu njambulula kuli yeni ikeye vene Wakuvwavesa.” 4Co vamo akati kavo vakulaelele, co valikumbasanene na Paulu na Silasi amo na vanakazi vaje vapwile vantwama na mbunga yakama ya vaNgiliki vaje va kulongwa.

5Oloni vaYunda vakele na muuka, co vakungulwile vamo vyendangani va muuka mu vitapalo, co vamungile munga. Vanenele citanga cakama muje mu nganda yoshe, co valwisile njuvo ya Njasone mukweseka kuwana Paulu na Silasi ngeci vavatwale ku mbunga ya vanu. 6Oloni omo kuvavawanene, vakokangeyeye Njasone na vamo vaka-kukulaela vavatwalele kuli vaka-kushwana, co vatambekele ngwavo, “Ava vanalume vananena vukalu kwoshe-ikwoshevanaija kuno lalo, 7co Njasone navatambula mu njuvo yendi. Co voshe valinakupokola mashiko a Nguvulu nakwendeka ngwavo kuli mwene weka lalo lizina lyendi Yesu.” 8Co a majwi awa vanenele citanga cakama ku mbunga na kuli vaka-kushwana. 9Co vaka-kushwana vafwetesele Njasone na vakwavo vimbongo vije vyashakiwile ngeci vavecele, co vaile.

Mu Mbeleya

10Ku vutsiki vuje vene, vaka-kukulaela vatumine Paulu na Sialsi ku Mbeleya. Co omo vetele vakovelele mu sinangonge. 11VaYunda vakuje vapwile vakushokoloka ku vimbunge kutuvakana va ku Tesalonika. Omo vatolililile ku lijwi na vimbunge vyakuzituka, co a litangwa na litangwa valilongesele Visoneka kumona nga vije vyendekele Paulu vyapwile vya vushunga. 12Vavangi vakulaelele, co na vanakazi vavangi va vulemu va vaNgiliki na vanalume vavangi va vaNgiliki vakulaelele lalo. 13Oloni omo vaYunda va ku Tesalonika vazivile ngeci Paulu nambulula lalo lijwi lya Njambi mu Mbeleya, vaile kuje nakushangumuka kushongangeya mbunga. 14Asinoni aje vene vaka-kukulaela vatumine Paulu ku cikuma, oloni Silasi na Timateo vasalele mu Mbeleya. 15Vaje vanalume vasindikiiye Paulu vamwetesele ku Atena asinoni velukile ku Mbeleya, co wavashikile ngwendi, Silasi na Timateo vanapande kuya kuli ikeye vwasi-vwasi.

Mu Atena

16Omo Paulu wakele nakuvandamena Silasi na Timateo mu Atena, wakele na citanga cakama manene omo wamwene muje mu nganda munashulu tumponya. 17Ngecivene, mu sinangonge wasimutwiiye na vaYunda na vaje kesi vaYunda vaje va kulongwa, co a litangwa na litangwa wakele nakusimutwiya na vaje vakele ku mutambela wakulandesela. 18Vamo valongisi va munga ivatumbwile ngwavo Epikulyu na munga ya Sitoike valikananganene nendi. Vamo vavo vehwile ngwavo, “Vika ashaka kwendeka ou cilema wa kulyalesa?”

Veka vendekele ngwavo, “Cisholoka ngwe alinakwendeka vya vinjambi veka.” Vendekele evi omwo Paulu wakele nakwambulula vya Yesu na cisangukilo. 19Ngecivene, vatwalele Paulu ku munga ya mu nganda ya Alepangase, co vendekele ngwavo, “Tushaka kuzivuka eci cuma caciha ciwulinakulongesa. 20Omwo vimo vyuma tulinakuziva viwendeka vinapu vyaviha kuli yetu, co tushaka kuzivuka muvyalumbunukila.” 21(Omwo vaka-Atena voshe na vangenzi vakele muje vazememe kumbila simbu yavo yoshe mukwendeka nakuziva vyuma vyaviha.)

22Ngecivene, Paulu wakatukile wemanene mukati ka munga Alepangase wendekele ngwendi, “Eni vanu va mu Atena, njamono ngwange mu vilinga vyeni vyoshe munapu vaka-kulemesa. 23Omwo njinende mu nganda yeni nakukenga ku mitambela kuje mukalemesela, njawanene a mutula umo aje vanasoneka ngwavo, ‘Kuli Njambi Uje Kutuzivuka.’ Cije mukalemesa, nameme kumucizivuka, cikeco njilinakwambulula kuli yeni ololo. 24#1 Vim 8:47; Isa 42:5; Vil 7:48 Njambi uje watangele kaye na vyoshe vilimo, ikeye Mwene wa lilu na asi, co kesi kuyoya mu njuvo yakutunga na mavoko a vanu. 25Nambe kesi kushaka tumupangele cuma cimo, omwo ikeye akaana mwonyo na muku na vyuma vyoshe kuli vanu voshe. 26Co watangele miyati yoshe kutunda kuli munalume umo ngeci vakale asi oshe. Ikeye vavenya wavwaeselele cimweja visimbu na vinginga vya mitambela kuje vayoyela. 27Walingile evi ngeci vamushakezeke, co omo vamupapateya vamuwane. Oloni nameme ngoco Njambi kakele kulyala netu embwe, 28ngwe umo wendekele ngwendi,

‘Muli ikeye mukemwo mutwayoyela,

mukemwo mutwendela mukemwo mutuli.’

“Ngwe muyinendeka myaso yeni ngwayo,

‘Netu lalo tunapu tu vana vendi.’

29“Ngecivene, omo tunapu tu vana vendi, kutwapandele kuyongola ngwetu cifwa cendi ca vuNjambi cinapu ngwe cifwa ca ngolinde nambe siliva nambe limanya lyakushonga na vutongwe na mana a munu. 30Njambi watetelele vanu omo vakele ku nzimba, oloni ololo alinakushika vanu voshe kwoshe-ikwoshe ngeci vatenguluke ku vilinga vyavo vyavivi. 31Omwo nemika litangwa lije akasompa kaye koshe mu vushunga ali munalume uje yanaangula. Co a cuma eci naana vukaleo kuli munu woshe akusangula munalume uje ku vatsi!”

32Omo vazivile Paulu endeka akusanguka ku vatsi, vamo vamushendumwine, oloni veka vendekele ngwavo, “Tushaka ngeci wendeke vyuma evi lalo.” 33Ngecivene, Paulu wasezele cije cikungulukilo. 34Oloni vamo vanalume valikumbasanene nendi, co vakulaelele, akati kavo umo wapwile Ndiyonisiyase, wapwile umo wa munga ya Elepangase, na munakazi umo lizina lyendi Ndamalise, na vakwavo veka lalo.

Currently Selected:

Vilinga vya Miluwa 17: MBB

Highlight

Copy