2 Samwele 1
1
Ndaviti aziva kutsa kwa Saulu
1Munima ya kutsa kwa Saulu, Ndaviti welukile kuje waile nakufungulula vaAmaleke, co wakele mu Zikelange matangwa avali. 2Co alikaki, kwezile mukwenje watundile ku cilombo ca Saulu. Wakele na vusiwa, watavwile vuzalo vwendi, walishuwilile livu ku mutwe wendi. Co waile kuli Ndaviti watsikamene asi mukumusingimika. 3Co Ndaviti wamwihwile ngwendi, “Utunda kuli?”
Co ikeye wamukumbulwile ngwendi, “Njapituka ku cilombo ca vaIsalele.”
4Co Ndaviti wendekele kuli ikeye ngwendi, “Njileke, vika vinalingiwako?” Co wamukumbulwile ngwendi, “Mashwalale vetu vanatewa ku nzita, co vanu vetu vavangi vanavatsii. Co lalo Saulu na munendi Yonatana vanavatsii.”
5Co Ndaviti wamwihwile ngwendi, “Wazivuka vati ngeci Saulu na Yonatana vanatsi?”
6Co mukwenje wendekele ngwendi, “Mukwenda cintulu njetele a Munkinda wa Ngilembowa, co njamwene Saulu najendamena ku likunga lyendi, matemba na mashwalale va tuvalu twa vitozi vakele nakushwenya kuli ikeye. 7Co omo wakenukile kunima, wanjimwene, ngecivene, wanjisanene. Co njatavele ngwange, ‘Yange uno shukulu!’ 8Co wanjihwile ngwendi, ‘Yove iya?’ Njamulekele ngwange, ‘Yange nji kaAmaleke.’ 9Asinoni wendekele ngwendi, ‘Ija kuno unjitsule njavetwa mwamuvi manene, njili kuyehi na kutsa.’ 10#1 Sam 31:1-6; 1 Miz 10:1-6 Ngecivene, njaile nakumutsula, omwo njazivukile ngwange kasa kuyoya omwo nau laja. Asinoni njatundisile cilongo ku mutwe wendi na mushele ku livoko lyendi, ngeci njavinene kuli yove, shukulu yange.” 11Ndaviti watavwile vuzalo vwendi mukuviilila, co vanu vendi lalo voshe vatavozwele vuzalo vwavo. 12Valinyengele manene nakulila, valikelele kulya noo cingwezi omwo Saulu, na Yonatana, na vaIsalele, vanu va Shukulu Kalunga, omwo vavangi manene vatsile mu nzita.
13Ndaviti wehwile uje mukwenje wanenele nzimbu ngwendi, “Yove watundu kuli?”
Mukwenje wamukumbulwile ngwendi, “Yange nji kaAmaleke, oloni njakala muno mu lifuti lyove.”
14Co Ndaviti wamwihwile ngwendi, “Omwo vikajo kuwakele na lyova lyakutsiya mwene uje yaangwile Shukulu Kalunga?” 15Co Ndaviti wasanene munalume umo wa akati ka vanu vendi, co wamulekele ngwendi, “Mutsiye!” Co uje munalume wamupupile, co watsile, 16co Ndaviti wendekele ku civimbi ca uje kaAmaleke ngwendi, “Maninga ove akale a mutwe wove vavenya. Yove vavenya walihisa omo walitavela ngwove yove watsiile mwene uje yaangwile Shukulu Kalunga.”
Ndaviti alila Saulu na Yonatana
17Ndaviti wembile mwaso ou wakulila Saulu na munendi Yonatana, 18#Yos 10:13 co washikile ngeci vaulongese kuli vanu va mu Yunda. (Vausoneka mu Livulu lya Njashale.)
19“Vantwama vetu
vanatsila a malundu a Isalele!
Mashwalale vetu vakusimpa vanau!
20Kesi muvyambulule mu Ngate,
nambe mu vitapalo vya Ashekelone.
Kutewa vambanda va vaFilisitiya vavwaelela,
kutewa vambanda va vaje
vaka-kujeneka kukulaela vavwaelela.
21“Nyonzi nambe lime
kesi viwile a malundu a Ngilembowa,
mahya ao kesi akale na vyakulya simbu yoshe.
Omwo vintelo vya vaka-kusimpa
vyapokokelele aje vene na shwamwa,
ntelo ya Saulu kuvakaikwiti mufwitilo
na mazi lalo.
22Vuta vwa lusipa vwa Yonatana
vwapwile vwavukalu,
mukwale wa Saulu kuwatetelele,
wakele nakuwisa vaka-nzili,
nakutsiya vitozi.
23“Saulu na Yonatana,
vapwile vaka-cizemo cakukomokesa manene,
mu mwonyo na mu kutsa kuvalyangunukile,
ku lumbisi vahyanene vingonga,
co ku nzili vahyanene vindumba.
24“Eni vanakazi vaIsalele, lileni Saulu!
Ikeye washoveyeye vuzalo vweni
na mamanya a seo yakama a ngolinde.
25“Vatijo mashwalale vakusimpa
vanau nakuvatsiila mu nzita!
Yonatana nalala ngumbanga mu malundu, natsi.
26“Njikulila yove ndolome yange Yonatana,
njakuzemene manene!
Cizemo cove kuli yange capwile cakukomokesa manene,
capwile cakama manene kutuvakana cizemo ca vanakazi.
27“Vatijo mashwalale vakusimpa vanau,
na vitwa vyavo vya nzita kuvyesi na seo lalo.”
Currently Selected:
2 Samwele 1: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006