2 Samwele 8
8
Kuhyana kwa mashwalale va Ndaviti
(1 Miz 18:1-17)
1Munima yevi, Mwene Ndaviti walwile na vaFilisitiya lalo, wavafungulwile, co wamanesele kushwana kwavo mu lifuti.
2Wafungulwile lalo vaMowavi. Washikile vinzinda valale asi mu mikana itatu, co vaje vakele mu mukana wamucivali wavatsiile. Co vaje akele mu mukana wamucitatu, kavatsiile. Ngecivene, vaMowavi vapwile vindungo va Ndaviti, vafwetele lisimu kuli ikeye. 3Co lalo wafungulwile Mwene Handandezele, muna Lehombe wa mu lifuti lya Zova mu Silya, omo Handandezele waile nakwilwisa vumwene vwendi mu lifuti lya Ndonga ya Yufuleti. 4Co Ndaviti watambwile vanu va Handandezele 1,700 vaka-kwenda a tuvalu na mashwalale vendi 20,000 vaka-kwenda asi. Co wasezele lika tuvalu vakupwamo vakupwa mu matemba 100, co vaje vasaleleo voshe wavatetangele matenga.
5Omo vaSilya va ku Ndamasiku vatumine mbunga ya mashwalale vakakwase Mwene Handandezele, co Ndaviti wavalwisile, watsiileo vanu 22,000. 6Asinoni ikeye watungile vilombo vya mashwalale#8:6 WATUNGILE VILOMBO VYA MASHWALALE: Nambe, waakeleko vantwama va mashwalale. mu lifuti lyavo, co vanu vamwo vapwile vindungo vendi, co vafwetele lisimu kuli ikeye. Ngecivene, Shukulu Kalunga wahyanesele Ndaviti kwoshe-ikwoshe kwaile. 7Co Ndaviti wafungulwile vintelo vya ngolinde vije vivambatele vamyata va Handandezele, wavitwalele ku Yelusalema. 8Co lalo wambatele vunengu vwavungi vwa ku Mbeta, na ku Mbelotai, vinganda vije vyashwanene Handandezele.
9Omo Mwene Toi wa ku Hamate wazivile ngeci Ndaviti nafungulula mashwalale voshe va Handandezele, 10co watumine munendi Njolame nakwindwisa Mwene Ndaviti nakumushangazala akuhyana nakufungulula Handandezele, omwo Handandezele walwisile Toi visimbu vyavingi. Co Njolame watwalelele Ndaviti vwana vuje vuvapangesele na ngolinde, na siliva, na vunengu. 11Co Mwene Ndaviti wavukundikile kuli Shukulu Kalunga mukuvupangesa akulemesa, amo na siliva, na ngolinde ije yatambwile ku miyati ije yafungulwile, 12miyati ya vaEndome, na vaMowavi, na vaAmoni, na vaFilisitiya, na vaAmaleke, na litambelo lije vapukwile lyatambwile kuli Handandezele.
13 #
Mya 60 (Mutwe wa n̄anda) Co Ndaviti watsimanene manene omo welukile nakutsiya vaEndome vakupwa 18,000 mu Cana ca Mwongwa. 14Watungile vilombo vya mashwalale mu Endome mwoshe, co vanu vamwo vapwile vindungo vendi. Co Shukulu Kalunga wahyanesele Ndaviti kwoshe-ikwoshe kwaile. 15Ngecivene, Ndaviti washwanene Isalele yoshe, co walingile mwamuvwa na vushunga kuli vanu vendi. 16Yowave, muna Zeluya, wapwile muka-kushika mashwalale, co Njosefati muna Ahilunde ikeye wapwile muka-kusoneka mizimbu, 17Zandoke muna Ahituve, na Ahimeleki muna Aviyatale vapwile vaka-kukombelela, co Selaya wapwile muka-kusoneka wa mu mbanja, 18Mbenaya muna Yehoyanda wapwile muka-kushika vaKelete, na vaPelete va ku lipela lya Ndaviti, co vana va Ndaviti vapwile vaka-kukombelela.
The Bible in Mbunda ©The Bible Society of Zambia, 2006