2 Samwele 15
15
Avisalome ayongola kutengulukila ishe Ndaviti
1Munima yevi, Avisalome walivwaeselele litemba na tuvalu, na vanalume makumi atanu vakumutwamenena. 2Ikeye wendukile mutondo waile nakwimana kumukulo wa ngila ya ku cikolo ca nganda. Co oshe aje ezila munu uje ali na n̄anda ngeci mwene aisompe, omo eta kuje, co Avisalome amusana amwihula oku kwatunda. Co nga uje munalume amuleka muyati kuje kwanatundu, 3co Avisalome endeka ngwendi, “Kenga, n̄anda yove inavwaa, co lalo inashungama, oloni kukwesi muka-kwimanena mwene ngeci azive n̄anda yove.” 4Co lalo wendekele ngwendi, “Nga njapwile muka-kusompa! Munu na munu woshe ali na mulonga nambe n̄anda nga aija kuli yange, co njikamuvatwila n̄anda yendi kujeneka civembulu.” 5Omo munu ashwenya kuli Avisalome, co akulama nakukandelela, co Avisalome amushwenya, olola livoko lyendi amukwata, co amutsemba. 6Avisalome walingile eci kuli vaIsalele voshe vaje vezile kuli mwene nakuvasompa, akulinga ngacije wakokweyeye vimbunge vyavo.
7Omo kuneti myaka iwana Avisalome wendekele kuli Mwene Ndaviti ngwendi, “Shukulu, njitave njiye ku Hevelone njikashulise cikulaeso cinjalingile kuli Shukulu Kalunga. 8Omo njakele mu Ngeshule mu Silya, njakulaesele Shukulu Kalunga ngwange nga akanjiilwisila ku Yelusalema, co njikamukombelela n̄ombelo ku Hevelone.”
9Co mwene wendekele ngwendi, “Ya mu kwoloka.” Co Avisalome waile ku Hevelone. 10Oloni Avisalome watumine miluwa ku miyati yoshe ya Isalele nakwendeka ngwendi, “Omo mukaziva kwoya kwa malupembo, co mukolumwina vingunda ngweni, ‘Avisalome ololo napu mwene ku Hevelone!’ ” 11Co kwakele vanalume 200 valanyele Avisalome kuya amolika nendi ku Hevelone, co vakevo kuvazivukile cuma cimo a vutumbe ovu, voshe vaile na mbunge imo. 12Co omo wakombelelele vin̄ombelo, Avisalome watumine lalo vanu ku nganda ya Ngilo nakusana Ahitofele, uje wapwile umo wa vaka-kunangula Mwene Ndaviti. Co vutumbe vwakulwisa mwene vwakolele, vanu vakavangeyeye Avisalome vapwile vavangi.
Ndaviti atewa kutunda mu Yelusalema
13Co umo muluwa wanenele vukaleo kuli Ndaviti ngwendi, “VaIsalele vanatengulukila kuli Avisalome.”
14Ngecivene, Ndaviti wendekele kuli vamyata vendi voshe vaje vakele amo nendi mu Yelusalema ngwendi, “Tuyeni vwasi nga tushaka kuputumuka kuli Avisalome! Zambuleniko! Amo ololo aija kuno nakutufungulula nakutsiya vanu voshe muno mu nganda!”
15Co vamukumbulwile ngwavo, “Eyo, shukulu, twalivwaesela cimweja kulinga vyoshe viwendeka.” 16Ngecivene, mwene waile, na naanga yendi, na vamyata vendi voshe vamukavele, kuvanga mashano va mbanja likumi, vakevo vasezele vanyunge lipela.
17Omo mwene na vanu vendi voshe vatundile mu nganda, vemanene ku njuvo ya mamaneselelo. 18Co vamyata vendi voshe vemanene kuyehi nendi omo vaka-kunyunga mwene vetile kulutwe lwendi. Mashwalale 600 va ku Ngate vaje vamukavele navo lalo vetile, 19co mwene wendekele kuli ntwama yavo Itai ngwendi, “Omo vika ulinakuya amo netu? Iluka ngeci ukatumbame na mwene wamuhwa. Yove u muka-kwija, weja nakuliita kutunda ku lifuti lyove. 20Yove unakala muno simbu yaindondo lika, co omwo vikajo njikwendanganesela? Yange kunjizivuka noku njilinakuya. Iluka na vavushoko vwove, co ngozi ya Shukulu Kalunga na kulongwa kwendi vikale amo nove.”
21Oloni Itai wamukumbulwile ngwendi, “Shukulu, njilisinga kuli yove mu lizina lya Shukulu Kalunga ngeci simbu yoshe njikaya amo nove kwoshe kuuyila, nameme kutsa, nameme kuyoya, ngamba yove nalivwaesa kuya amo nove.”
22Co Ndaviti wamukumbulwile ngwendi, “Mwamuvwa, tuye.” Ngecivene, Itai waile amo na vanu vendi voshe na vaje vakundamene kuli ikeye. 23Vanu valilile manene omo vanu va Ndaviti vakatukile. Co mwene wajavukile muna ndonga Kindelone, oku vanu vendi valinakumukava, vaile amolika na ku ngila yakuya mu mambo.
24Zandoke muka-kukombelela wakele kuje, co na vaLevi vakele amo nendi, vambatele Cikasa ca Cikumiiyo cakujela. Vacitumbikile asi, co kuvacikakwile noo vanu voshe vatundile mu nganda. Aviyatale muka-kukombelela nendi kwakele. 25Asinoni mwene wendekele kuli Zandoke ngwendi, “Ilwiseni Cikasa ca Cikumiiyo ku nganda. Nga Shukulu Kalunga alinakuvwaelela nange, co litangwa limo akanjitava kwija nakucimona, nakumona lalo mutambela kuje cili. 26Oloni nga kavwaelela nange, co mwamuvwa ikeye alinge mwoshe mwashaka kulinga kuli yange.” 27Co mwene wendekele lalo kuli Zandoke ngwendi, “Kenga, ambata munove Ahimaza, na Yonatana muna Aviyatale mwiluke ku nganda mwende mu kwoloka. 28A simbu ije, njikavandamena ku myava yakujavukila mu mambo noo njikatambula majwi kuli yove.” 29Ngecivene, Zandoke, na Aviyatale velwisile Cikasa ca Cikumiiyo ku Yelusalema, co vakele kuje.
30Ndaviti walamatele ku Munkinda wa Olive nakulila, kazalele vin̄aku ku mendi endi, co wafwikile ku mutwe wendi kupwa cimweso ca vusiwa. Ngecivene, na voshe vaje vamukavele valifwikile ku mitwe yavo, co lalo valilile. 31Omo Ndaviti vamulekele ngwavo Ahitofele nalipandakana na Avisalome mukumutengulukila, co Ndaviti walombelele ngwendi, “Shukulu Kalunga, pwisa kunangula kwa Ahitofele kupwe kwangoco!”
32Omo Ndaviti wetele akamwa ya lilundu, kuje wakele nakulemesela, co musamba wendi wa a mbunge Hushai kaAleki wamusheshele wazalele vuzalo vwendi vwakutavozoka, co walishuwilile livu a mutwe wendi. 33Ndaviti wendekele kuli ikeye ngwendi, “Kuunjikwasa nga yove uya amo nange, 34oloni ukanjikwasa nga wiluka ku nganda nakuleka Avisalome ngwove, ‘Yange njikupangela na kulongwa ngwe munjapangelele isho.’ Co ukalinga mwoshe muunasela kupopolola kunangula kwa Ahitofele. 35Zandoke na Aviyatale vaka-kukombelela, navo kuvakakala, valeke vyuma vyoshe viwuzivuka mu lipela lya mwene. 36Vakevo vali na vana vavo va vanalume, Ahimaza muna Zandoke, na Yonatana muna Aviyatale, co yove wasa kuvatuma kuli yange nakunjileka majwi oshe awuziva.”
37Ngecivene, Hushai, musamba wa Ndaviti, welukile ku nganda a simbu ije yetele Avisalome nayo mu Yelusalema.
The Bible in Mbunda ©The Bible Society of Zambia, 2006