2 Samwele 13
13
Aminone na Tamale
1Avisalome muna Ndaviti, wakele na ndokazi yendi wamuvwa wa muzike lizina lyendi Tamale. Co Aminone muna Ndaviti wamuzemene manene. 2Wamushungwiiye manene ngeci watundisileo nakuvinja, capwile cacikalu kuli Aminone kuwana Tamale, omwo ikeye wapwile mumbanda uje kanda alimone na munalume, kuvamutavesele kuliwana na vanalume. 3Oloni Aminone wakele na musamba wendi walikeelela lizina lyendi Yonandave, muna Shamema ndolome ya Ndaviti. 4Co Yonandave wendekele kuli Aminone ngwendi, “Yove unapu u muna mwene, oloni omwo vikajo a litangwa na litangwa njikakumono unazeye?”
Aminone wamukumbulwile ngwendi, “Njizema Tamale, ndokazi ya shongo yange Avisalome wa mu limo lyeka.”
5Co Yonandave wendekele kuli ikeye ngwendi, “Likwise kuvinja, ya ku vulili ukalale. Omo isho aija nakukumona, co endeka kuli ikeye ngwove, ‘Shukulu, njilekeleniko ndokazi yange Tamale aije akunjaneko vyakulya. Njimushaka akunjipangeleko vyakulya kuyehi nange kuje njasa kumumona, co anjanevyo!’ ” 6Ngecivene, Aminone walikwisile kuvinja, co waile ku vulili nakulala.
Co Mwene Ndaviti waileko nakumumona, Aminone wendekele kuli ikeye ngwendi, “Shukulu, njilekeleniko ndokazi yange Tamale aije kuno akunjilingileko makende amandondo akutovala kuyehi nange kuje njasa kumumona, co akunjanewo.”
7Ngecivene, Ndaviti watumine lijwi kuli Tamale mu lipela ngwendi, “Ya ku njuvo ya ndolome yove Aminone ukamulingileko vyakulya.” 8Co waileko, wamuwanene nalala a vulili. Tamale wanonele vunga, wavutikile, walingile makende akutovala kuyehi na Aminone ngeci amumone. Asinoni wocele mashama-shama a kuhima, 9co waokwele wawatundisile a cikango ngeci Aminone alye, oloni Aminone wavyanene. Co wendekele ngwendi, “Leka vanu voshe vatuuke.” Co vanu voshe vatuukile. 10Asinoni wendekele kuli ikeye ngwendi, “Nena owo mashama-shama a kuhima kuno ku vulili ngeci unjilisewo.” Co Tamale wanonele aje mashama-shama a kuhima wawatwalele kuli ikeye. 11Oloni omo wamwanenewo, co Aminone wamukwatele wendekele ngwendi, “Ija ku vulili vwange!”
12Co Tamale wamukumbulwile ngwendi, “Embwe ndolome yange. Kesi unjisindiye kulinga cuma ca shwamwa ngacije! Capwa cuma cacivi! 13Nga njilinga ngacije, co vatijo njasa kukenga vanu? Nove ukapwa ngwe cilema umo wa mu Isalele. Ngecivene, njakulombo endeka kuli mwene, co akatava ngeci unjambate.” 14Oloni Aminone katolililile kuli Tamale, co Tamale kakele na nzili yakutuvakana Aminone, ngeci Aminone wakwatele Tamale wamuwisile, co walingile nendi vuvi.
15Aminone wazindile manene Tamale, co cizindo cendi catuvakanene cizemo cije camuzemene akulivanga. Co wendekele kuli ikeye ngwendi, “Tuuka anja!”
16Oloni Tamale wakumbulwile ngwendi, “Embwe, kunjisheka ngacije cinapu mulonga wakama manene kutuvakana eci unalingi!”
Oloni Aminone kamutolililile, 17wasanene ngamba yendi wendekele kuli ikeye ngwendi, “Tundisa ou mumbanda ku mesho ange! Munakwile anja, pata ku cikolo!” 18Co uje ngamba wanakwilile Tamale anja, co wapatele ku cikolo.
Tamale wazalele cikoveyo cacilaja mavoko, vuzalo vuvakele nakuzala vana va vimyene va vanakazi va kushomboka a matangwa aje. 19Walishuwilile lito ku mutwe wendi, co watavwile cikoveyo cendi, walikwatele mbimbi-mutwe oku aya nakulila. 20Omo ndolome yendi Avisalome wamumwene, wamwihwile ngwendi, “Aminone nakulingi mwamuvi ndi? Kesi ulinyenge embwe. Ikeye napu ndolome yove wa mu limo lyeka, ngecivene, kesi ulekeko munu cuma eci cinalingiwa.” Ngecivene, Tamale wakele mu njuvo ya Avisalome wombwele.
21Omwo Mwene Ndaviti wazivile vije vyalingiwile, waluvalele manene. 22Co Avisalome wazindile manene Aminone omwo wawisile ndokazi yendi Tamale nakulinga nendi vuvi, co kendekele nendi lalo.
Avisalome alinga shambandinga Aminone
23Omo kwetile myaka ivali, Avisalome watewile vimanga vendi ku Mbale Hazole, kuyehi na limbo lya Efalime, co walanyeleko vana va mwene voshe. 24Co waile kuli Mwene Ndaviti nakwendeka ngwendi, “Shukulu, yange njikateula vimanga vange. Citava yove na vamyata vove kwija nakukala ku ciwano eci ndi?”
25Mwene wamukumbulwile ngwendi, “Embwe, munange. Cikapwa cacikalu manene kuli yove nga yetu voshe twijako.” Co Avisalome wasindiiye mwene, oloni mwene anga vene katavele, oloni wavezikisile Avisalome.
26Oloni Avisalome wendekele ngwendi, “Mwamuvwa, kuma kucitava shongo yange Aminone aye amo netu ndi?”
Co mwene wamwihwile ngwendi, “Omwo vikajo ushaka kuya nendi?” 27Oloni Avisalome wakele nakumusindiya noo mwene watavele Aminone na vana vendi voshe kuya amo na Avisalome.
Avisalome wavwaesele vyakulya vyafwila mwene, 28co Avisalome washikile vangamba vendi ngwendi, “Kengeseseni mwamuvwa Aminone omo nanu manene, co njimishika ngwange mutsiyeni, kesi mukale na lyova embwe. Yange njinamishiki. Pweni vaka-kusimpa kesi muzive lyova!” 29Ngecivene, vangamba vakavele mashiko a Avisalome, vatsiile Aminone. Co voshe vana va Ndaviti vasaleleo valondele a vimulu vavo vatewele.
30Omo simbu vakele mu ngila yakwiluka kwimbo lyavo, valekele Ndaviti ngwavo, “Avisalome natsii vana vove voshe, naumo wai nasalao!” 31Co mwene wakatukile, watavwile vuzalo vwendi mukuviilila, co walalele asi. Co vangamba vaje vakele kuje amo nendi navo lalo vatavwile vuzalo vwavo. 32Oloni Yonandave, muna Shamema mukulunu wa Ndaviti, wendekele ngwendi, “Shukulu, kuvatsiile vana vove voshe embwe, kuvanga Aminone lika ikeye ivanatsii. Avisalome ikeye nashiki cuma eci ngeci cilingiwe, omwo mbunge yendi inakala nakuvavala kutunda a simbu ije Aminone wawisile ndokazi yendi Tamale nakulinga nendi vuvi. 33Ngecivene, kesi ukulaele muzimbu ou ngwavo vana vove voshe vanatsi embwe, Aminone lika ikeye natsi.”
34A simbu ije Avisalome watewele.
Co aje vene uje lishwalale muka-kunyunga wandwile mesho, co wamwene mbunga yakama ilinakushelumuka ku lilundu ku ngila yakutundilila ku Holonaime. Co waile kuli mwene nakwambulula vije namono. 35Co Yonandave wendekele kuli Ndaviti ngwendi, “Vana va mwene valinakwija, ngwe muje mwanendekele ngamba yove.” 36Acimanese vene kwendeka ngacije, vana va Ndaviti vezile, vashangumukile kulila, Ndaviti na vamyata vendi lalo valilile manene.
37 #
2 Sam 3:3
Oloni Avisalome watewele, waile kuli Talemai muna Amihunde, mwene wa ku Ngeshule. Co Ndaviti walilile munendi Aminone simbu yakama. 38Avisalome wakakele kuje ku Ngeshule myaka itatu. 39Oloni omo Ndaviti wamanesele kulila Aminone, wakele nakushungwiya kumona munendi Avisalome.
The Bible in Mbunda ©The Bible Society of Zambia, 2006