2 Samwele 11
11
Ndaviti na Mbateshemba
1 #
1 Miz 20:1
Kukuhwa kwa mwaka, simbu ije vimyene vakele nakuya nakulwa nzita, Ndaviti watumine Yowave na vamyata vendi na mbunga ya mashwalale vaIsalele, vafungulwile vaMowavi nakuzengeleka nganda ya Lamba. Oloni Ndaviti wasalele mu Yelusalema.
2Litangwa limo, ku cingwezi, omo Ndaviti wakasumukile a tulo waile akamwa ya njuvo yendi. Omwo wakele nakwenda akamwa ya ciluli#11:2 AKAMWA YA CILULI: Mu lifuti lya Isalele viluli vya vinjuvo vyapwa vyakusivama. ca lipela lyendi, wamwene munakazi alinakujwela. Uje munakazi wapwile wamuvwa manene. 3Ngecivene, Ndaviti watumine muluwa nakumona ngeci uje munakazi ikeye iyajo, co Ndaviti wawanene ngeci kuma uje munakazi ikeye Mbateshemba, muna Elyame munakazi wa Uliya kaHiti. 4Ngecivene, Ndaviti watumine miluwa kukamushaka, co vamunenele kuli Ndaviti, co walalele nendi. (Omo nalijelesa laja.) Mbateshemba welukile ku njuvo yendi. 5Munima yevi Mbateshemba walimwene ngeci kuma ali na kafumba, co watumine lijwi kuli Ndaviti nakumuleka. 6Co Ndaviti watumine lijwi kuli Yowave ngwendi, “Njitumine Uliya kaHiti kuno.” Ngecivene, Yowave watumine Uliya kuli Ndaviti. 7Omo Uliya wetele, Ndaviti wamwihwile ali Yowave na mashwalale nga valimwamuvwa, nomu muyilinakwendela nzita. 8Asinoni Ndaviti wendekele kuli Uliya ngwendi, “Ya ku njuvo ucikahwimeko kasimbu tai.” Co Uliya waile, Ndaviti wamutuminine vwana ku njuvo yendi. 9Uliya kaile ku njuvo yendi embwe, oloni walalele ku cikolo ca lipela amo na vaka-kunyunga mwene. 10Omo Ndaviti wazivile ngeci Uliya kaile ku njuvo yendi, wamwihwile ngwendi, “Kuma yove waile vungenzi, omwo vika kuwaile ku njuvo yove?”
11Uliya wamukumbulwile ngwendi, “Vanu va Isalele na vanu va Yunda valinakulwa nzita, Cikasa ca Cikumiiyo cili kuli vakevo, co Yowave muka-kushika na vamyata vendi vanatungu cilombo cavo mushandangala yangoco. Co vatijo njasa kuya kwimbo, nakulya nakunwa, nakulala na munakazi wange? A vyoshe vije vyapwa vyakujela, njilisinga ngeci kunjikalingi cuma ca cifwa cangacije!”
12Ngecivene, Ndaviti wendekele ngwendi, “Nga ngoconi, kala kuno litangwa lyoshe lyamutunu, co imene njikakushuula, co ukeluka.” Ngecivene, Uliya wakele mu Yelusalema litangwa lije na alikaki. 13Ndaviti walanyele Uliya kukulya kwa cingwezi, co wamupendesele. Oloni vutsiki vuje lalo Uliya kaile ku njuvo yendi, oloni walalele a kambilititi kendi mu lipela ku mulili wa vaka-kunyunga.
14Alikaki mutondo, Ndaviti wasonekelele Yowave mukanda wautumine na Uliya. 15Ndaviti wasonekele ngwendi, “Twameka Uliya kulutwe lwa mukana, kuje kuyinaamena manene nzita, co yeni ilukeni vuseta-nima ngeci Uliya vamutsiye.” 16Omo Yowave wakele nakuzengeleka nganda, co watumine Uliya ku mutambela kuje kwazivukile ngwendi kuli vitozi va nzili. 17Co vanalume va muje mu nganda vezile nakulwa na mashwalale va Yowave, vamyata vamo va Ndaviti vavatsiile, co na Uliya lalo vamutsiile. 18Asinoni Yowave watumine lijwi kuli Ndaviti lyakumuleka a vya nzita, 19co Yowave wasin̄ikile uje muluwa ngwendi, “Omo unamanesa kuleka mwene vyoshe vya a nzita, 20amo mwene akaluvala, co akakwihula ngwendi, ‘Omwo vikajo mwashwenyelele kuyehi na nganda nakulwa navo? Kuma yeni kumwazivukile ngeci vakevo vakamyasha mikili oku vali mu vivumbe ndi? 21#Maa 9:53 Kuma yeni munevala muje mwatsile Avimeleke muna Ngilyone ku Tembeze ndi? Kesi munakazi wamwandumwinine limanya lyakulola vunga lije lyatundile kwilu ku civumbe nakumutsiya ndi? Omwo vikajo mwashwenyelele kuyehi na civumbe?’ Nga mwene akakwihula a evi, co ukamuleka ngwove, ‘Ngamba yove Uliya lalo vanamutsii!’ ”
22Ngecivene, uje muluwa waile kuli Ndaviti wamulekele vije vyamushikile Yowave. 23Co uje muluwa walekele Ndaviti ngwendi, “Vitozi vetu vakele na nzili manene kuhyana yetu, vatundile mu nganda vezile nakutulwisa mushandangala yangoco, oloni twavashekele nakuvelwisila ku cikolo ca nganda. 24Co vatwashele mikili oku vali ku civumbe, vamo vamyata va shukulu yange vanavatsii, na ngamba yove Uliya lalo vanamutsii.”
25Co Ndaviti wendekele kuli uje muluwa ngwendi, “Ya ukatakamese Yowave ukamuleke kesi alinyenge, omwo naumo wai azivuka ngeci iyajo umo akatsa mu nzita. Muleke atumeko mashwalale va nzili ngeci valwise oyo nganda nakuyitambula.”
26Omo Mbateshemba wazivile ngeci munalume wendi vanamutsii, wamulilile. 27Omo simbu yakulila yahwile, Ndaviti wanenele Mbateshemba mu lipela lyendi, wapwile munakazi wendi, co wakitile mwana wa munalume. Oloni Shukulu Kalunga kavwaelelele a vije vyalingile Ndaviti.
The Bible in Mbunda ©The Bible Society of Zambia, 2006