2 Petulu 3
3
Cikulaeso cakwija kwa Mwene
1Vasamba vange, ou ololo unapu mukanda wamucivali njinamisonekela. Mu mikanda yoshe ivali njineseka kwindula viyongola vyakujela mu mana eni akumyanukisa vyuma evi. 2Njishaka mwanuke majwi aje vendekele laja vaka-kwimanena vakujela, na lishiko lyakutunda kuli Mwene na Muyoyesi lije livamyanene miluwa veni. 3#Yun 18 Akulivanga, munapande kuzivisia cuma eci, ngweni a matangwa akukotoka kukasholoka vanu vaje vakayoya yoyesi yakwenda mu mashungu avo amavi. Vakamishendumuna, 4co vakamihula ngwavo, “Ikeye wakulaesele kwija, indi vati? Ali kulijo? Vakukulwila vetu vanatsi laja, oloni vyuma vyoshe vicili ngwe muvyapwile laja tunde akutanga kwa kaye!” 5#Kus 1:6-9 Vakevo vanayengula na cizango ngeci Njambi ku san̄ulu waanene lishiko, co lilu na kaye vavitangele. Kaye katundile mu mema, co vakanyungilile mu mema, kaye ka ku san̄ulu. 6#Kus 7:11 Co lalo a mema vene, mema aje a livazi, akewo aje anyongesele asi a ku san̄ulu. 7Oloni lilu na kaye evi viliko ololo vanavitulika a lishiko lya cifwa cimo lya Njambi, ngeci vakavinyongese na tuhya. Vikevyo vanavitulikila litangwa lije omo vanu vaka-vuvi vakavasompa nakuvanyongesa.
8 #
Mya 90:4
Oloni kesi mwivale cuma cimo vasamba vange vanjazema! Ku mesho a Mwene litangwa limo linapu ngwe myaka yakupwa 1,000, co myaka yakupwa 1,000 kuli ikeye inapu litangwa limo. 9Mwene kesi kwishwala akulinga cije canakulaesa, ngwe muvakayongola vamo. Oloni muka-lukakateya ali yeni, omwo kashaka umo akanyonge, oloni ashaka ngeci voshe vatenguluke kutunda ku vivi vyavo.
10 #
Mat 24:43; Luk 12:39; 1 Tes 5:2; Kuj 16:15 Oloni Litangwa lya Mwene likaija ngwe mwizi. A Litangwa lije kaye kakanyongolokota na cililimo cakama, co vyuma vya mwilu vikenya njwa nakunyonga, co kaye na vyuma vyoshe viliho vikanyongolokota.#3:10 VIKANYONGOLOKOTA: Kunungulula kumo ngwavo, vakaviwana. Kumo ngwavo, vikenya. Kukwavo ngwavo, vikaita. 11Omwo vyuma vyoshe evi vikanyonga mu cifwa eci vene, co yeni munapande kukapwa vanu va muyati uka? Kuyoya kweni kunapande kupwa kwakujela nakulikundika kuli Njambi, 12ngwe omo mucili nakuvandamena Litangwa lya Njambi nakulinga mwamuvwa ngeci liije vwasi, Litangwa lije omo lilu likenya njwa nakunyonga, na vyuma vyakala mwilu vikanyongolokota na ntwima. 13#Isa 65:17; 66:22; Kuj 21:1 Oloni yetu tuvandamena vije vyanakulaesa Njambi, vikevyo, lilu lyaliha na kaye kakaha, muje mukakala vushunga.
14Ngecivene, vasamba vange, omo mulinakuvandamena Litangwa lije, esekeni na nzili yeni yoshe kupwa vakakujela na vaka-kujeneka mulonga ku mesho a Njambi nakukala mu kwoloka amo nendi. 15Kengeni ku lukakateya lwa Mwene yetu ngwe ku simbu yanamyana ngeci mukovoke, ngwe muje mwamisonekelele Paulu musamba wetu itwazema, mukupangesa mana aje amwanene Njambi. 16Evi vikevyo alinakwendeka mu mikanda yendi yoshe omo asoneka a n̄anda eyi. Kuli vyuma vimo mu mikanda yendi vyavikalu vije vinzimba vaka-kujeneka mana vakavinungulula mu ngila ya makuli, ngwe muvakalingi na vin̄anda vyeka vya mu Visoneka. Co eci civanenela kunyonga kwavo vakevo vavenya.
17Oloni yeni, vasamba vange, mwavizivuka laja evi. Ngecivene, nyanyameni kutewa musevuka, co vanu vakujeneka mashiko vakamyungumuna, co mukawa kukukolesa kweni. 18Oloni kakateyeni nakukola mu kutetela na mu mana vya Mwene yetu na Muyoyesi wetu Yesu Kilistu. Kuli ikeye kukale vumpau, ololo na ku myaka yoshe! Ewa.
The Bible in Mbunda ©The Bible Society of Zambia, 2006