2 Vimyene 9
9
Yehu vamuvwavesa kupwa mwene wa mu Isalele
1A simbu ije vene Elisha muka-kwimanena, wasanene mukwenje umo akati ka vaka-kwimanena, wendekele kuli ikeye ngwendi, “Livwaese ngeci uye ku Lamote mu Ngilyande. Ambata eli lilulu lya mazi a olive uye nalyo, 2co omo uketa kuje ukasetela Yehu muna Njosefati, mutekulu wa Nimeshi. Ukamutundisa ku vakwavo, co ukamutwala ku mulili wa ku vushweke, 3co mwitile mazi a olive ku mutwe wendi, co endeka ngwove, ‘Shukulu Kalunga Njambi ya Isalele ikeye nakuvwavesa mazi ngeci upwe mwene wa mu Isalele.’ Co ukatundako vwasi-vwasi.”
4Ngecivene, uje mukwenje muka-kwimanena waile ku Lamote, 5co wawanene vamyata va mashwalale va nzita vali mu cikungulukilo. Co wendekele ngwendi, “Mwane, njinaija nakumileka majwi.”
Yehu wehwile ngwendi, “Iyajo umo wetu iwendeka nendi?”
Co wamukumbulwile ngwendi, “Yeni vene mwane.” 6#1 Vim 19:16 Co muvuvali vwavo vakovelele mu njuvo, uje muka-kwimanena wa mukwenje wetilile mazi a olive a mutwe wa Yehu, co wamulekele ngwendi, “Shukulu Kalunga, Njambi ya Isalele, nendeka ngwendi, ‘Njinakuvwavesa mazi kupwa mwene wa vanu vange va Isalele. 7Unapande kutsiya naanga ya Ahave shukulu yove, ngeci njihise Njezevele akutsiya vaka-kwimanena vange na vangamba vange vakwavo. 8Naanga yoshe ya Ahave na vatekulwila vendi vanapande kutsa, njikatsiya mu cifwa cimolika mwana woshe wa munalume mu naanga yendi, mwanike na mukulunu. 9Njikalinga na naanga yendi ngwe munjalingile na naanga ya Mwene Yelovowame wa mu Isalele, na naanga ya Mwene Mbasha wa mu Isalele. 10#1 Vim 21:23 Njezevele kuvakamutsindi embwe, muvila wendi vakaulya tutali mu lifuti lya Njezelele.’ ” Omo wamanesele kwendeka evi, co uje muka-kwimanena wa mukwenje watuukile, co watewele.
11Yehu welukilile kuli vakwavo vamyata, co vamwihwile ngwavo, “Vyuma vyoshe vinavwaa ndi? Uje cizaluke ashaka vikajo kuli yove?”
Yehu wavakumbulwile ngwendi, “Mwazivuka cifwa cendi.”
12Co vamukumbulwile ngwavo, “Embwe, yetu kutuzivuka. Tuleke vyanendeka!” Co Yehu wavalekele ngwendi, “Nanjileka ngwendi Shukulu Kalunga nendeka ngwendi, ‘Njikuvwavese upwe mwene wa mu Isalele.’ ”
13Aje vene vaje vamyata, vajalele vuzalo vwavo akamwa ya vindendelo ngeci Yehu emaneo, co vembile malupembo, nakutambeka ngwavo, “Yehu ololo napu mwene!”
Yehu atsiya Mwene Njolame wa mu Isalele
14Yehu muna Njosefati mutekulu wa Nimeshi watumbilile vutumbe Mwene Njolame, Njolame na vaIsalele vakele nakunyunga Lamote mu Ngilyande omwo ya Mwene Hazayele. 15Mwene Njolame welukile ku Njezelele kuje vakamusakele vimbandu vyendi vije vyavetwele mu nzita ku Lamote mu Ngilyande omo walwile na Mwene Hazayele wa Silya. Ngecivene, Yehu wendekele kuli vakwavo vamyata ngwendi, “Nga muli amo nange, nyanyameni ngeci kesi kukale umo avomboloke muno mu Lamote aye nakunangula vanu va mu Njezelele.” 16Co walondele mu litemba lyendi waile ku Njezelele, oloni Njolame te kanda acikanguke ku vimbandu vyendi, Mwene Ahaziya wa mu Yunda wakele kuje nakumusikamesa.
17Co muka-kunyunga umo watumbamene a kaposhi ka ku Njezelele omo wamwene Yehu na vanu vendi vakele nakwija, watambekele ngwendi, “Njamono vanu valinakwija.”
Co Njolame wamukumbulwile ngwendi, “Tuma munu alonde a kavalu ngeci akamone nga vakevo vanapu vasamba nambe vanapu vitozi.”
18Co uje munu walondele a kavalu waliwanene na Yehu, wendekele kuli ikeye ngwendi, “Mwene ashaka kuzivuka nga unaija ngwe musamba indi embwe.”
Yehu wamukumbulwile ngwendi, “Kesi cipangi cove oco. Njikave munima.”
Co uje muka-kunyunga watumbamene a kaposhi wambulwile ngwendi uje munu walondele a kavalu netele kuje ku mbunga, oloni kesi nakwiluka embwe. 19Co vatumineko muluwa mukwavo lalo, co wakehwile Yehu cihula cimolika. Yehu lalo wamukumbulwile ngwendi, “Kwoloka cilinge vikajo kuli yove? Njikave lika munima.”
20Uje muka-kunyunga wambulwile vukaleo ngwendi uje munu walondele a kavalu netele kuje ku mbunga, oloni kesi nakwiluka embwe. Co wendekeleko lalo ngwendi, “Uje ntwama wa ije mbunga alinakwendesa litemba lyendi ngwe munu wakuzaluka, cifwa cendi ngwe Yehu!”
21Mwene Njolame washikile ngwendi, “Njivwaeseleni litemba lyange.” Co valivwaesele, aje vene ikeye na Mwene Ahaziya valondele munu na munu mu litemba lyendi, nakuliwana na Yehu. Vakaliwanene nendi ku lihya lije lyapwile lya Navote. 22Co Njolame wamwihwile ngwendi, “Ulinakwija mu kwoloka ndi?” Yehu wamukumbulwile ngwendi, “Vatijo njija mu kwoloka oku anga tucili na vulozi na tumponya vije vivashangumukile vanyoko Njezevele?”
23Njolame watambekele kuli Ahaziya ngwendi, “Eci cinapu kutengulukila!” Co watengulwile litemba lyendi watewele. 24Aje vene Yehu wananele manene vuta vwendi vwa lusipa na nzili yendi yoshe, co washele mukili mukati ka vitsili vya Njolame, co uje mukili wamutivile ku mbunge. Co Njolame wawililile mu litemba lyendi watsile. 25Yehu wendekele kuli mukwasi wendi Mbindekale ngwendi, “Ambata muvila wendi uumbile mu lihya lije lyapwile lya Navote. Anuka omo yove nange twendele amo munima ya Mwene Ahave ishe ya Njolame, Shukulu Kalunga wendekele majwi awa kuli Ahave ngwendi, 26#1 Vim 21:19 ‘Izau njinamwene Navote na vana vendi. Co njikulaesa ngeci nove lalo vakakutsiila mu lihya lino vene.’ ” Co Yehu washikile mukwasi wendi ngwendi, “Ambata muvila wa Njolame uumbile mu lihya lije lyapwile lya Navote, mukushulisa cikulaeso ca Shukulu Kalunga.”
Mwene Ahaziya wa mu Yunda vamutsiya
27Mwene Ahaziya wamwene vije vyalingiwile, ngecivene, watewelele ku nganda ya Mbete Hangane mu litemba lyendi, oloni Yehu wamushekele nakumuwana, washikile vanu vendi ngwendi, “Nendi lalo mutsiyeni!” Co vamwashele mukili omo wakele nakwendesa litemba lyendi mu ngila yakulamata ku Ngule, kuyehi na nganda ya Imbelyange. Oloni watewele manene noo wetele ku nganda ya Mengindo, co kuje vene watsile. 28Vamyata vendi vambatele muvila wendi mu litemba vawilwisile ku Yelusalema, co vakamutsindile mu vimbumbo vya vumwene mu Nganda ya Ndaviti.
29Ahaziya wapwile mwene wa mu Yunda mu mwaka wamulikumi na umo a simbu ije omo Njolame muna Ahave wapwile mwene wa mu Isalele.
Vamwene Njezevele vamutsiya
30Yehu wezile ku Njezelele. Co Njezevele akuziva vije vyalingiwile, wakwitile vyemba ku mesho endi, nakuvwaesa vin̄ambu vyendi, wemanene mu njanena ya lipela nakukengelela ku ngila. 31Omo Yehu wakovelele mu cikolo, co Njezevele watambekele ngwendi, “Yove Zimeli! Yove muka-kutsiya! Vikajo unezila kuno?”
32Yehu wandwile mesho, co wakengele mu njanena, co wehwile ngwendi, “Iyajo ali ku mutambela wange?” Co vamyata vavali nambe vatatu va mu lipela vamushumbililile mu njanena, 33Yehu wendekele kuli vakevo ngwendi, “Mumbileni asi.” Co vombilile Njezevele asi, maninga endi ashamukilile a civumbe na a tuvalu. Yehu wendesele tuvalu twendi na litemba a muvila wendi, 34co wakovelele mu lipela, walile vyakulya. Co Yehu wendekele ngwendi, “Ambateni ou munakazi wakulinduka mukamutsinde, omwo ikeye wapwa muna mwene.” 35Oloni vaje vanu vashakele kukamutsinda kuvawanene muvila embwe kuvanga cikola cendi na vitsiya vya mavoko na mendi. 36Omo vambulwile muzimbu ou kuli Yehu, co ikeye wavalekele ngwendi, “Evi vikevyo vyendekele Shukulu Kalunga ngwendi vikalingiwa, omo wendekele muli ngamba yendi Elinja ngwendi, ‘Tutali vakalya muvila wa Njezevele mu lifuti lya Njezelele. 37Vilyo vyendi vije vikasalao vakavikuva mu lihya ngwe vwilo, co naumo wai akazivuka ngeci vinapu vya Njezevele.’ ”
The Bible in Mbunda ©The Bible Society of Zambia, 2006