2 Vimyene 22
22
Mwene Yosiya wa mu Yunda
(2 Miz 34:1-2)
1 #
Njele 3:6
Yosiya wakele na myaka itanu na itatu omo wapwile mwene wa mu Yunda, co washwanene mu Yelusalema myaka makumi atatu na mwaka umo. Vaina vapwile Njendinda, muna Andaya wa ku nganda ya Mbozekate. 2Yosiya walingile vije vyavwaelelesele Shukulu Kalunga, co watembunwinine kukulwila yendi Mwene Ndaviti, wononokele mashiko oshe a Njambi.
Livulu lya Mashiko valiwana
(2 Miz 34:8-28)
3Mu mwaka wamulikumi na itanu na itatu wakushwana kwendi, Mwene Yosiya watumine Shafane muka-kusoneka wa mu mbanja, muna Azaliya mutekulu wa Meshulame, ku Njuvo ya Shukulu Kalunga, co wamushikile ngwendi, 4“Ya kuli Hilikiya Muka-kukombelela Wakama ukatambule muzimbu wa vimbongo vivanatambula kuli vanu vaka-kukombelela vaje vakapanga ku cikolo ca ku Njuvo ya Shukulu Kalunga. 5Muleke aane vimbongo kuli vanu vaje valinakuvwaesa Njuvo ya Shukulu Kalunga. Vavifwete 6vaka-kushonga mavaya, na vaka-kutunga vinjuvo, co valande mavaya na mamanya akuvwaesesa Njuvo ya Shukulu Kalunga. 7#2 Vim 12:15 Vantwama va vipangi vanapu va kulongwa, ngecivene, naumo wai lalo akalava mavulu avo avakasoneka vimbongo.”
8Shafane watwalele lishiko lya mwene kuli Hilikiya Muka-kukombelela Wakama, co Hilikiya walekele Shafane muka-kusoneka ngwendi, “Njinawana livulu lya Mashiko mu Njuvo ya Shukulu Kalunga.” Hilikiya waanene Shafane livulu, co walilavele. 9Ngecivene, Shafane welukilile lalo kuli mwene, co wamulekele ngwendi, “Vangamba vove vananono vimbongo vije vyakele mu Njuvo ya Shukulu Kalunga, co vanavyana kuli vantwama vaka-kuvwaesa mu Njuvo ya Shukulu Kalunga.” 10Co Shafane wendekele kuli mwene ngwendi, “Livulu eli lyananjana Hilikiya.” Co walilavelele mwene.
11Omo mwene wazivile vije valavele mu livulu lya Mashiko, watavwile vuzalo vwendi mukuviilila, 12co waanene lishiko kuli Hilikiya muka-kukombelela na kuli Ahikame muna Shafane na kuli Akambole muna Mikaya na kuli Shafane muka-kusoneka wa mu mbanja na kuli Asaya katumwa ka mwene ngwendi, 13“Yeni mukanjihwileko kuli Shukulu Kalunga na vanu voshe va mu Yunda a vilongesa evi vili mu livulu eli livanawana. Shukulu Kalunga naluvala netu omwo vakukulwila vetu kuvasele kulinga vije vivasonekele mu livulu eli.”
14Co Hilikiya na Ahikame na Akambole na Shafane na Asaya vaile nakwihula kuli Hulunda, muka-kwimanena wa munakazi wakele mu mutambela wamucivali wa Yelusalema. (Munalume wendi wapwile Shalume muna Tikeva mutekulu wa Halehase, ikeye wakele nakunyunga vuzalo vwa mu Njuvo ya Shukulu Kalunga.) Co vamulekele vije vyalingiwile, 15ngecivene, wavalekele veluke kuli mwene, 16vakamuleke ngeci Shukulu Kalunga nendeka majwi awa ngwendi, “Njikanyanyamesa Yelusalema na vanu vamwo voshe, ngwe muvanasoneka mu livulu lije lyanalava mwene. 17Vakevo vananjivyana, co vanakombelela vin̄ombelo kuli vinjambi veka, co vanashangumuna vukalu vwange a vyoshe evi vivanalingi. Vukalu vwange vunakatuka vwakulwisa Yelusalema, co kunjikavututumwisa embwe. 18Nambe vene ali mwene, evi vikevyo yange, Kalunga Njambi ya Isalele, njinendeka ngwange wazivi mwamuvwa vije vanasoneka mu livulu, 19co watengulukile na kulikeesa ku mesho ange, watavwile vuzalo vwove nakulila, omo wazivile muje njalishungwiiye kunyanyamesa Yelusalema na vanu vamwo. Njikaupwisa mwela wakukomokesa, co vanu vakapangesa lizina lyawo kupwa cisingo. Oloni njazivi lilombelo lyove, 20co cihiso eci njinashakele kunena a Yelusalema kucikaija kuvanga munima ya kutsa kwove. Njikakutava ngeci ukatse mu kwoloka.”
Co vaje vanu velwisile awa majwi kuli Mwene Yosiya.
The Bible in Mbunda ©The Bible Society of Zambia, 2006