2 Kolinte 3
3
Vangamba va cikumiiyo caciha
1Kuma eci calumbunuka ngwe twalishashele lalo yetu vavenya ndi? Kuma cinapande, yetu ngwe vanu veka, kukala na mikanda ya vukaleo vwetu kuli yeni nambe yakutunda kuli yeni ndi? 2Yeni vene munapu mikanda tulinayo, ije vanasoneka mu vimbunge vyetu kuli munu na munu kuyizivuka nakuyilava. 3#Kut 24:12; Njele 31:33; Ezek 11:19; 36:26 Cinasholoka mwamuvwa ngeci Kilistu ikeye vavenya wasonekele uje mukanda nakuutuma amo netu. Uje kuvasonekele na musumbele, oloni na Munzinzime wa Njambi wakuyoya, kesi a vitale vya mamanya oloni mu vimbunge vya vanu.
4Tulinakwendeka evi omwo tunakulaela kuli Njambi ali Kilistu. 5Omwo muli yetu kumwesi cuma cimo cai cije citulingisa ngeci kwambulula kwetu kunapu kwakwasi. Kukwasa kwetu kulinakutunda kuli Njambi. 6#Njele 31:31 Ikeye natwasesa kupangela cikumiiyo caciha, cije kesi cakusoneka mu lishiko, oloni na Munzinzime. Lishiko lyakusoneka linena kutsa, oloni Munzinzime anena mwonyo.
7 #
Kut 34:29
Lishiko valitalekele a vitale vya mamanya, co vumpau vwa Njambi vwasholokele omo vavwanene. Nameme cihanga ca Mosesa cakuvyazima catsitsivalele, oloni cakele na nzili manene nambe vanu va Isalele kuvasele kukenga ku mesho endi. Nga Lishiko lije linena kutsa omo lili na nzili lyezile na vumpau vwakufwa ngacije, 8kuma vumpau vwa Munzinzime kuvwapwile vwakama manene ndi? 9Nga vipangi vije vyanenele cihiso kuli vanu vyakele na vumpau, kuma vipangi vya vumpau vije vinatuvakana kwamena kuvyapwile vyakama manene ndi? 10Twendeka ngeci ngwetu omwo vumpau ovu vuliko vwakuvyazima ololo vunatuvakana vumpau vwakuvyazima vuje vwakeleko laja. 11Omwo nga kwakele vumpau mu vyuma vije vyakele kasimbu lika, kuma vumpau vuje vukakalako myaka yoshe kuvwatuvakanene manene ndi?
12Omo tuli na cinyangavili eci, co tunasimpi manene vene. 13#Kut 34:33 Yetu kutwapwile ngwe Mosesa uje wafwikile lilesu ku cihanga cendi ngeci vanu va Isalele kesi vamone vumpau omo vwakele nakutsitsivala. 14Mwa vushunga vene mana avo vawashokele nakweta ku litangwa lya lelo mana avo anga vanawafwiki na lilesu lya cifwa cije vene ngwe omo valava mavulu a cikumiiyo calaja. Lilesu eli valitundisa kuvanga omo munu ali muli Kilistu. 15Nameme lelo vene, omo valava Lishiko lya Mosesa, co lije lilesu licili nakufwika mana avo. 16#Kut 34:34 Oloni vasa kulitundisa, ngwe muje muvyendeka visoneka ali Mosesa ngwavyo, “Lije lilesu lya Mosesa valitundisile, omo watengulukilile kuli Mwene.”#3:16 VESI 16 VASA KUYINUNGULULA NGECI: Oloni lilesu vasa kulitundisa omo munu atengulukila kuli Mwene 17Co ololo lijwi “Mwene” mu majwi awa linemanena Munzinzime, co kuje kuli Munzinzime wa Mwene, kukekwo kuli kupatuka. 18Ngecivene, yetu voshe tulinakusholola vumpau vwa Mwene yetu na vihanga vyakujeneka kufwika, vumpau vuje vumolika vulinakutunda kuli Mwene, ikeye Munzinzime, uje muka-kutwimukisa mu cifwa cendi, mu vumpau vuje vwahyana simbu yoshe.
The Bible in Mbunda ©The Bible Society of Zambia, 2006