2 Mizimbu 35
35
Yosiya alisamba Ciwano ca Pasovala
(2 Vim 23:21-23)
1Mwene Yosiya walisambele Ciwano ca Pasovala mu Yelusalema kusingimika Shukulu Kalunga, co a litangwa lyamulikumi na awana ku ngonde yakulivanga,#35:1 NGONDE YAKULIVANGA: Kenga 29:3. vatsiile vimuna va a ciwano. 2Co mwene waanene vaka-kukombelela vipangi vya mu Njuvo ya Shukulu Kalunga, nakuvaleka ngeci vapange mwamuvwa. 3Co lalo washikile vaLevi, valongisi va Isalele voshe, vaje vavakundikile kuli Shukulu Kalunga ngwendi, “Akeni Cikasa ca Cikumiiyo cakujela mu Njuvo ya Shukulu Kalunga ije yatungile Mwene Solomoni, muna Ndaviti, kumukacambata lalo a vitsili vyeni kutunda ku mutambela umo nakuya ku mutambela ukwavo embwe, oloni mukapangela lika Shukulu Kalunga Njambi yeni na vanu vendi va Isalele. 4#2 Miz 8:14 Tumbameni mu Njuvo ya Shukulu Kalunga mu myela yeni ngwe ku vikota vyeni, ngwe ku vipangi vije vyamyanene Mwene Ndaviti na munendi Mwene Solomoni, 5mukemana ku mutambela wakujela mukemanene vimbunga vya naanga ya vavushoko vweni vanu va Isalele. VaLevi vakakwase mutambela umo na umo wa naanga ya Isalele. 6Munapande kutsiya vana va vimanga na vimembe va a Ciwano ca Pasovala. Lijeleseni nakuvwaesa vyakukombelela ngeci vavushoko vweni vaIsalele vakakave vilongesa vije vyaanene Shukulu Kalunga kuli Mosesa.”
7Mwene Yosiya waanene vanu vyakuvakwasa ku Ciwano ca Pasovala, wavanene vimanga na vana va vimanga na vana va vimembe vakupwa 30,000, na vingombe va nkomba vakupwa 3,000 va ku matanga endi na ku malimba endi. 8Co vamyata vendi lalo vaanene milambu kuli vanu, na kuli vaka-kukombelela, na kuli vaLevi ngeci valikwase nayo. Co lalo vamyata vaje vapwile vakulunu va ku Njuvo ya Shukulu Kalunga mazina avo, Hilikiya Muka-kukombelela Wakama na Zekaliya na Njehiyele, vaanene kuli vaka-kukombelela vana va vimanga na vana va vimembe vakupwa 2,600, na vingombe va nkomba vakupwa 300 vakukombelela a simbu ya ciwano. 9Vantwama va vaLevi mazina avo, Konaniya na Shemaya na ndolome yendi Netanela na Hashaviya na Njeyele na Yozavande vakevo vaanene vana va vimanga na vana va vimembe vakupwa 5,000, na vingombe va nkomba vakupwa 500 kuli vaLevi ngeci vakombelele kupwa vin̄ombelo.
10Omo vamanesele kuvwaesa vyoshe vya Ciwano ca Pasovala, vaka-kukombelela na vaLevi vaile mu myela yavo, ngwe muje mwashikile mwene. 11Omo vamanesele kutsiya vana va vimanga na vimembe, co vaLevi vavajuvile, co vaka-kukombelela vashamwinine maninga a mutula. 12Asinoni vapangelele vanu mu vimbunga vya naanga yavo, tusitu va vin̄ombelo vya kwenyeka, ngwe ku Lishiko lya Mosesa. 13#Kut 12:8-9 Co vaLevi vocele situ ya Ciwano ca Pasovala, ngwe ku mashiko, co vatelekele situ ya vin̄ombelo vyakujela mu vindeo na mu vivela na a vikango, co vwasi-vwasi vaanene ije situ kuli vanu. 14Omo vamanesele kulinga evi, vaLevi valipangelele situ na vaka-kukombelela vatekulwila va Alone, omwo vaka-kukombelela vaungamene noo vutsiki, mukwenyeka vimuna vaje venyekele vamutunu na mazi akukombelela. 15#1 Miz 25:1 Co vaLevi vaka-kwimba va ku cikota ca Asafe vakele mu myela yavo ngwe muvavaaneneyo ngwe ku mashiko a Mwene Ndaviti mazina avo, Asafe na Hemane na Njendutune, muka-kwimanena wa mwene. Co vaka-kunyunga ku vikolo vya Njuvo ya Shukulu Kalunga kuvatundile mu myela yavo, omwo vaLevi veka vavavwaeselele Ciwano ca Pasovala. 16Ngecivene, vyuma vyoshe vavilingile a litangwa lije, vyakulemesa Shukulu Kalunga, vyakunyunga Ciwano ca Pasovala, nakukombelela vin̄ombelo vya kwenyeka a mutula ngwe muje mwashikile Mwene Yosiya. 17#Kut 12:1-20 Co a matangwa atanu na avali vanu voshe va Isalele vaje vakeleko valisambele Ciwano ca Pasovala na Ciwano ca Makende Akujeneka Musima. 18Kutunda a matangwa a Samwele muka-kwimanena, kuvalisambele Ciwano ca Pasovala ngwe eci. Kukwakele mwene umo mu Isalele walisambele Ciwano ca Pasovala ngwe eci calisambele Mwene Yosiya na vaka-kukombelela, na vaLevi na vanu va mu Yunda na mu Isalele na mu Yelusalema. 19Ciwano eci vacilingile mu mwaka wamulikumi na itanu na itatu wakushwana kwa Yosiya.
Kutsa kwa Yosiya
(2 Vim 23:28-30)
20Omo Mwene Yosiya wamanesele kuvwaesa vyoshe vya mu Njuvo ya Shukulu Kalunga, Mwene Neko wa ku Ingito watwalele mashwalale vendi nakulwa ku Kalekemishe ku Ndonga ya Yufuleti. Yosiya waile nakumulwisa, 21oloni Neko watumine majwi kuli Yosiya ngwendi, “Eyi nzita njilinakulwa kuyakundamene kuli yove Mwene wa mu Yunda embwe. Yange kunjezile nakulwa nove, oloni njinaija nakulwa na vitozi vange, co Njambi nanjileka ngeci njizambule. Njambi nanjimanena, ngecivene, kesi unjipopolole, kutewa akakunyongesa.” 22Oloni nameme ngoco Yosiya washakele manene kulwa. Wavyanene kutolilila ku vije vyendekele Njambi muli Mwene Neko, co walimwisile mweka, wakovelele nakulwa nzita mu cana ca Mengindo.
23A simbu ya nzita, Mwene Yosiya vamwashele mikili kuli vaka-Ingito. Co washikile vangamba vendi ngwendi, “Njitwaleni, njavetwa mwamuvi manene!” 24Co vangamba vendi vamutundisile mu litemba lyendi, vamwakele mu litemba lyamucivali lyakele nalyo kuje, co vamutwalele ku Yelusalema. Wakatsililile kuje vene, co vamutsindile mu vimbumbo vya vumwene. Co vanu voshe va mu Yunda na mu Yelusalema vamulilile.
25Co Njelemiya muka-kwimanena wasonekele mbimbi yakulila ali Mwene Yosiya. Eci capwile cilika mu Isalele kuli vaka-kwimba, vanalume na vanakazi, vembile ou mwaso wa mbimbi omo vamulilile. Co mwaso ou wa mbimbi vausoneka muLivulu lya Mbimbi.
26Vyuma vyoshe vije vyalingile Mwene Yosiya, vyakulikundika kuli Shukulu Kalunga, nakwononoka kwendi ku Mashiko, 27na vin̄anda vyendi kutunda kukushangumukila nakweta ku shongo, vyoshe vavisoneka mu Livulu lya Mizimbu ya Vimyene va mu Isalele na mu Yunda.
The Bible in Mbunda ©The Bible Society of Zambia, 2006