2 Mizimbu 32
32
VaAsilya vashungwiya Yelusalema
(2 Vim 18:13-37, 19:14-19, 35-37; Isa 36:1-22, 37:8-38)
1Munima ya vilinga evi vyavivwa, omo Mwene Hezekiya wapangelele Shukulu Kalunga nakukulaela, Senakelivi mwene wa Asilya wafungulwile Yunda. Co wazengelekele vinganda vya mu vimpaka, co washikile mbunga ya mashwalale vendi ngeci vatuve vivumbe. 2Omo Hezekiya wamwene ngeci Senakelivi ashaka kulwisa Yelusalema lalo, 3co ikeye na vamyata vendi vayongwele kuzika tuvwelu-vwelu twa mema twakele anja ya nganda ngeci vaAsilya kesi vawane mema omo veta kuyehi na Yelusalema. 4Ngecivene, vanu vavangi vakungulukile, co vazikile tuvwelu-vwelu twoshe twakele anja ya nganda. 5Mwene wapangele manene, co wavwaesele mitambela yoshe ya civumbe, ije yatavukile myanzi, co vatungilileo tuposhi, watungile lalo civumbe ca anja. Co lalo watungulwile civumbe cije vatungilile mu ngangela ku mutambela walaja wa mu Yelusalema. Co lalo wafulile makunga amangi na vintelo. 6Co mwene waangwile vamyata va nzita vashike vanu, co wavashikile vakungulukile mushandangala yangoco ku cikolo ca nganda. Co wendekele kuli vakevo ngwendi, 7“Pweni vaka-kusimpa na vaka-lukakateya, kesi muzive lyova lya mwene wa vaAsilya nambe mbunga ya mashwalale ava vaalinakutwamenena. Omwo ou tuli nendi ali na nzili kutuvakana uje ali kuli ikeye. 8Ikeye ali na nzili ya vunu, oloni yetu tuli na Shukulu Kalunga Njambi yetu ikeye atukwasa kulwa nzita yetu.” Co vanu vakanyamene omwo majwi endekele mwene yavo.
9Munima yevi, omo Senakelivi na mbunga ya mashwalale vendi vakele ku Lakishe, co watumine lijwi kuli Hezekiya na kuli vanu va mu Yunda vaje vakele mu Yelusalema ngwendi, 10“Yange Senakelivi, mwene wa Asilya, njimihula ngwange cuma mukajo munayongola omo munalishokela mu Yelusalema mu cimpaka? 11Hezekiya alinakumikwisa ashaka ngeci amitsiise ku njala na ku lihwila, omo alinakumileka ngwendi Shukulu Kalunga Njambi yeni akamyamena kuli yange mwene wa Asilya. 12Ikeye vene Hezekiya uje wasiwile tuzangu twa Shukulu Kalunga na mitula, co walekele vanu va mu Yunda na vanu va mu Yelusalema kulemesa nakwenyekela insense a mutula umolika. 13Kuma kumwazivukile vije vinjalingile yange na vakukulwila vange kuli vanu va ku mafuti eka ndi? Kuma kwakele vinjambi veka lalo vaamenene vanu vavo kuli mwene wa Asilya ndi? 14Simbu mukajo vinjambi va mafuti oshe awa vaamenene lifuti lyavo kuli yetu? Cooni cuma mukajo cinamiyongwesa ngeci njambi yeni akasa kumyamena? 15Ngecivene, kesi mutave Hezekiya amikwise embwe nambe amitwamenene mu ngila yeka. Kesi mumukulaele embwe! Omwo kukwesi njambi wa ku muyati umo wasele kwamena vanu vendi ku livoko lyange nambe ku livoko lya vakukulwila vange. Ngecivene, mwa vushunga njambi yeni kasa kumyamena ku livoko lyange!”
16Vamyata va vaAsilya vendekele vyuma vyavivi manene ali Shukulu Kalunga Njambi na ali Hezekiya, ngamba ya Shukulu Kalunga. 17Co mwene wasonekele mukanda wakupopolola Shukulu Kalunga, Njambi ya Isalele, nakumushaula ngwendi, “Vinjambi va vaka-mafuti kuvaamenene vanu vavo ku livoko lyange, nameme njambi ya Hezekiya kasa kwamena vanu vendi ku livoko lyange.” 18Vaje vamyata vatambekele manene mu ciHevelu ngeci vajujwise vanu vaje vakele mu Yelusalema vaje vatumbamene a civumbe ca nganda, ngeci cipwe cacasi kufungulula ije nganda. 19Vendekele ali Njambi wa Yelusalema ngwe muje muvakendeka na vinjambi va miyati ya vanu va ano asi, vaje vakushonga na mavoko a vanu.
20Asinoni Mwene Hezekiya na Isaya muka-kwimanena muna Amoze valombelele kuli Njambi nakutambeka manene ngeci avakwase. 21Co Shukulu Kalunga watumine kangelo uje wakatsiile mashwalale na vamyata va mbunga ya mashwalale vaAsilya. Ngecivene, mwene welukile na shwamwa ku lifuti lyendi. Co litangwa limo omo wakele mu njuvo ya njambi yendi, vana vendi va vanalume vamutsiile na mikwale yavo.
22Ngecivene, Shukulu Kalunga waamenene Mwene Hezekiya na vanu va Yelusalema ku livoko lya Senakelivi mwene wa vaAsilya, na ku vitozi vavo vakwavo lalo. Co vatumbamene mu kwoloka na vandambo vavo voshe vaje vavazengelekele. 23Vanu vavangi vezile ku Yelusalema, vanenele vin̄ombelo kuli Shukulu Kalunga na vwana kuli Hezekiya, co kutunda a simbu ije miyati yoshe vasingimikile Hezekiya.
Kuvinja kwa Hezekiya na kulyalesa kwendi
(2 Vim 20:1-3, 12-19; Isa 38:1-3, 39:1-8)
24A matangwa aje Mwene Hezekiya wavinjile, co washakele kutsa. Walombelele kuli Shukulu Kalunga, co Shukulu Kalunga wamwanene cimweso ngeci akenduka ku mushongo wendi. 25Oloni Hezekiya walyalesele manene, kamwesele kasingimiko a vije vyamulingilile Shukulu Kalunga, ngecivene, vukalu vwa Shukulu Kalunga vwezile ali ikeye na a Yunda na a Yelusalema. 26Oloni akukotoka, Hezekiya na vanu vaje vakele mu Yelusalema valikeesele, co vukalu vwa Shukulu Kalunga kuvwezile ali vakevo noo Hezekiya watsile.
Vufuko na lutsimo lwa Hezekiya
27Mwene Hezekiya wafukile manene, co voshe vamusingimikile. Watungile vinjuvo mwakutulikila ngolinde yendi, na siliva, na mamanya a seo yakama, na n̄undu, na vintelo, na vyuma vikwavo lalo vya seo yakama. 28Co lalo watungile vishete mwakwaka vimbuto vyendi, na vinyu, na mazi a olive, co wasitile matanga a vingombe vendi, na malimba a vimanga vendi. 29Co lalo Njambi wamwanene vimanga, na vingombe na vufuko vweka vwavungi ngeci watungile vinganda vyavingi manene. 30Ikeye Mwene Hezekiya uje wazikile mwakwitila mema a kavwelu-vwelu kakuya ku Muna Ndonga Ngihone, co wetisile mema mukati ka vivumbe vya Yelusalema. Hezekiya walingile mwamuvwa mu vipangi vyendi vyoshe vyapangele. 31Nameme omo vamyata vaje vatundile ku Mbambilone vezile mukwihula a vije vyalingiwile mu lifuti, Njambi watavele ngeci eseke Hezekiya azivuke vyoshe vije vyakele mu mbunge yendi.
Kutsa kwa Hezekiya
(2 Vim 20:20-21)
32Vyuma vyoshe vije vyalingile Mwene Hezekiya na kulongwa kwendi kuli Shukulu Kalunga vavisoneka muLivulu lya Vimona vya Isaya Muka-kwimanena Muna Amoze na mu Livulu lya Mizimbu ya Vimyene va mu Yunda na mu Isalele. 33Hezekiya watsile, co vamutsindile mu Yelusalema ku lilundu lya ku vimbumbo vya vumwene. Vanu voshe va mu Yunda na mu Yelusalema vasingimikile manene kutsa kwendi. Co munendi Manase wamushwanene kupwa mwene.
The Bible in Mbunda ©The Bible Society of Zambia, 2006