2 Mizimbu 30
30
Kulivwaesela Ciwano ca Pasovala
1Mwene Hezekiya watumine lijwi mu Isalele mwoshe na mu Yunda mwoshe, co lalo wasonekele mikanda ku miyati ya Efalime, na Manase, ngeci vaije ku Yelusalema ku Njuvo ya Shukulu Kalunga nakulisamba Ciwano ca Pasovala mukusingimika Njambi ya Isalele. 2Co Mwene Hezekiya na vamyata vendi, na vanu voshe va mu Yelusalema valizivasanene kulisamba Ciwano ca Pasovala ku ngonde yamucivali. 3#Kul 9:9-11 Kuvasele kulisamba Ciwano eci a simbu ije omwo vaka-kukombelela te kanda valijelese, na vanu lalo te kanda valikungulwile ku Yelusalema. 4Co mwene na vanu vavwaelelele manene a vutumbe vwavo, 5ngecivene, valanyele vaIsalele voshe, kutunda ku Ndani ku kunto nakweta ku Mbeleshemba mu mbwela, vaije mu Yelusalema nakulisamba Ciwano ca Pasovala ngwe ku Lishiko, vavangi vakungulukile kutuvakana akulivanga. 6Co miluwa vaile mu Yunda mwoshe na mu Isalele mwoshe na mikanda yakutunda kuli mwene na vamyata vendi, co vendekele ngwe mwavashikile mwene ngwavo,
“Eni vanu va Isalele, munovoka kuli vaAsilya vaje vafungulwile lifuti. Co ololo ilukeni kuli Shukulu Kalunga, Njambi ya Avilahama na Isake na Yakomba, co nendi lalo akeluka kuli yeni. 7Kesi mupwe ngwe vakukulwila veni na vavushoko vweni vaIsalele vaje kuvakulaelele kuli Shukulu Kalunga, Njambi yavo. Ikeye wavanyanyamesele visimbu vyavingi ngwe mumunamono. 8Kesi mukaluwise vimbunge vyeni ngwe muvalingile vakukulwila veni, oloni ononokeni Shukulu Kalunga, ijeni ku Njuvo yendi mu Yelusalema, ije yanajelesa Shukulu Kalunga Njambi yeni ku myaka yoshe, co mulemeseni ngeci vukalu vwendi vumitunde. 9Nga mwiluka kuli Shukulu Kalunga, co vaje vatwalele vavushoko vweni ku vunzinda vakavazivila mema ku mbunge, co vakavelwisa. Shukulu Kalunga Njambi yeni wakala na ngozi na mema ku mbunge, nga mwiluka kuli ikeye, co akamitambula.”
10Co miluwa vaile ku nganda na nganda ya mu lifuti lya miyati ya Efalime na Manase, vetele ku kunto ku muyati wa Zembuloni, oloni vanu vavashendumwine nakuvajola. 11Nameme ngoco kwakele vamo va ku miyati ya Ashele na Manase na Zembuloni vakevo vakele na cizango cakwija ku Yelusalema. 12Cizango ca Njambi lalo cakele mu Yunda, co Njambi wavanene mbunge imo ngeci vononoke kukava mashiko a mwene na vamyata vendi.
Kulisamba Ciwano ca Pasovala
13Ku ngonde yamucivali#30:13 NGONDE YAMUCIVALI: Ngonde ya Zive, mu ciHevelu inapu ngonde yamucivali, kutunda akati ka Kuhu nakweta akati ka Kasikana. mbunga yakama ya vanu vakungulukilile mu Yelusalema nakulisamba Ciwano ca Makende Akujeneka Musima. 14Vatundisile mitula yoshe mu Yelusalema ije vapangesele kukombelela vin̄ombelo nakwenyekelao insense, co vayumbilile mu Cana ca Kindelone. 15A litangwa lyamulikumi na awana ku ngonde ije vene, vatsiile vana va vimanga vakukombelela a Ciwano ca Pasovala, vaka-kukombelela na vaLevi vaje kuvajelele vazivile shwamwa, co valikundikile kuli Shukulu Kalunga, co navo lalo vakombelelele vin̄ombelo vya kwenyeka mu Njuvo ya Shukulu Kalunga. 16Co vatumbamene mu myela yavo mu Njuvo ya Shukulu Kalunga ngwe ku vilongesa vya Lishiko lya Mosesa, munu wa Njambi. VaLevi vaanene maninga kuli vaka-kukombelela, co vawashamwinine a mutula. 17Omwo vungi vwa vanu kuvajelele, co kuvatsiile vana va vimanga va Ciwano ca Pasovala, ngecivene, vaLevi vavalingilileko, co vakundikile vana va vimanga kuli Shukulu Kalunga. 18Co vungi vwa vanu vatundile ku miyati ya Efalime na Manase na Isakale na Zembuloni kuvalijelesele, co valisambele Ciwano ca Pasovala mu ngila yeka kesi ngwe muje muvacisonekelele. Co Mwene Hezekiya wavalombelelele ngwendi, 19“Yove Shukulu Kalunga, Njambi ya vakukulwila vetu, vasambese vaje valinakukulemesa na vimbunge vyavo vyoshe, nameme kuvajelele.” 20Co Shukulu Kalunga wakumbulwile lilombelo lya Hezekiya, wavasambesele, kavavulumwine. 21A matangwa atanu na avali, vanu vaje vakungulukilile mu Yelusalema valisambele Ciwano ca Makende Akujeneka Musima nakujolela manene, co a litangwa na litangwa vaLevi na vaka-kukombelela vashangazalele Shukulu Kalunga na visanzi vyakwoya manene.#30:21 VISANZI VYAKWOYA MANENE: Nambe, vembile na nzili yavo. 22Co Hezekiya washangazalele vaLevi a mana avo akupangela mwamuvwa Shukulu Kalunga.
Ciwano camucivali
Omo kuneti matangwa atanu na avali vakombelelele vin̄ombelo nakushangazala Shukulu Kalunga, Njambi ya vakukulwila vavo, 23co voshe vaje vakungulukilile kuje vayongwele ngeci vaakeleko lalo matangwa atanu na avali. Ngecivene, valisambele nakujolela. 24Co Mwene Hezekiya waanene vanu vingombe va nkomba vakupwa 1,000 na vimanga vakupwa 7,000 ngeci vanu vatsiye valye, co vamyata vaanene vingombe va nkomba vakupwa 1,000 na vimanga vakupwa 10,000. Co mbunga yakama ya vaka-kukombelela valijelesele. 25Ngecivene, mbunga yoshe ya vanu va mu Yunda na vaka-kukombelela na vaLevi na vanu vaje vatundile ku kunto, na vaka-kwija vaje vatungile mu Isalele na mu Yunda vavwaelelele. 26Co mu nganda ya Yelusalema mwakele kujolela, omwo kukwakele cuma cimo calingiwilemo cakulifwa neci tunde a simbu ya Mwene Solomoni muna Ndaviti. 27Vaka-kukombelela na vaLevi vemanene, co valombele vivezikiso vya Shukulu Kalunga ngeci viije ali vanu. Njambi wavazivile, omwo malombelo avo etele mwilu, mwimbo lyendi mwakujela.
The Bible in Mbunda ©The Bible Society of Zambia, 2006