2 Mizimbu 22
22
Mwene Ahaziya wa mu Yunda
(2 Vim 8:25-29, 9:21-28)
1Co vanu va mu Yelusalema vashwanesele Ahaziya munendi wa mutinikila kupwa mwene, omwo mbunga imo ya vanu vezile na vaAlambe ku cilombo vatsiile vana vendi voshe va vakulunu. Ngecivene, vashwanesele Ahaziya kupwa mwene.
2Ahaziya wakele na myaka makumi awana na myaka ivali omo vamushwanesele, co washwanene mwaka umo mu Yelusalema, lizina lya vaina lyapwile Ataliya muna Omeli.
3Ahaziya lalo watembunwinine vingila vya naanga ya Mwene Ahave, omwo vaina Ataliya, vapwile muna Mwene Ahave mutekulu wa Mwene Omeli wa mu Isalele, co vaina vamunangwile nakumukovelesa mu vuvi. 4Walingile vuvi ku mesho a Shukulu Kalunga, omwo ishe watsile, vanu va ku naanga ya Mwene Ahave vakevo vapwile vaka-kumunangula, co vamunyongesele. 5Mukukavangeya kunangula kwavo, walipandakanene na Mwene Njolame wa mu Isalele mu nzita yakulwisa Mwene Hazayele wa Silya. Co valwililile nzita ku Lamote mu Ngilyande, Njolame wavetwele mu nzita. 6Co welukile ku nganda ya Njezelele ngeci akakanguke ku vimbandu vyendi vije vyavetwele, Ahaziya waileko nakukamumona.
7Kuhwa kwa vumwene vwa Ahaziya kwapwile kwakutunda kuli Njambi omwo waile nakukamona Njolame. Omo Ahaziya wakele kuje, waile na Njolame nakuliwana na Yehu muna Nimeshi, uje yavwavesele Shukulu Kalunga ngeci anyongese naanga ya Ahave. 8Co capwile ngeci omo cihiso ca Njambi cezile a naanga ya Ahave, Yehu waliwanene na mbunga ya vantwama va vaYunda na ije ya vehwa va Ahaziya vaje valipandakanene na Ahaziya a vungenzi ovu. Ngecivene, Yehu wavatsiile voshe. 9Co vashakezekele Ahaziya, vamuwanene navanda mu Samaliya. Ngecivene, vamutwalele kuli Yehu, co wamutsiile. Vatsindile muvila wendi mukusingimika kuku yendi Mwene Njosefati, uje walingile vyavingi omo wapangelele Shukulu Kalunga.
Naumo wai wa ku naanga ya Ahaziya wasaleleo ngeci ashwane vumwene.
Vamwene Ataliya wa mu Yunda
(2 Vim 11:1-3)
10Omo Ataliya vaina ya Mwene Ahaziya wazivile kutsa kwa munendi, co washikile ngeci vatsiye vanu voshe va ku naanga ya vumwene. 11Ahaziya wakele na ndokazi yendi ishavo umolika, lizina lyendi Njehoshemba, washombokele kuli muka-kwimanena lizina lyendi Yehoyanda. Wavombolweleo mwana umo wa munalume wa Ahaziya lizina lyendi Yowashe, wamutwalele kulyala kumutundisa kuli vana va vimyene vakwavo vaje vashakele kutsiya, co wamushwekele ku mulili amolika na ndezi yendi mu Njuvo ya Shukulu Kalunga. Co Ataliya kamutsiile. 12Co a myaka itanu na umo wakele mu Njuvo ya Shukulu Kalunga muvamushwekele, omo Ataliya wapwile vamwene.
The Bible in Mbunda ©The Bible Society of Zambia, 2006