2 Mizimbu 20
20
Nzita yakulwisa Endome
1A simbu imo mashwalale va Mowavi na Amoni, amolika na vasamba vavo, vaMeuni,#20:1 VAMEUNI: Mu ciHevelu ngwavo, VaAmoni. vezile nakulwisa Yunda. 2Co miluwa vamo vezile nakuleka Mwene Njosefati ngwavo, “Mbunga ya mashwalale vavangi, vanatundu ku Endome ku mutambela wa Lishali lya Mwongwa vanaija nakukulwisa. Co vanafungulula laja Hazazone Tamale.” (Ikeyo Engendi.) 3Njosefati wajajele manene, co walombelele kuli Shukulu Kalunga ngeci amutwamenene. Washikile lifuti lyoshe lya Yunda ngeci valikele kulya. 4Vanu va mu Yunda valikungulwile amo vatundile mu vinganda vyoshe vya mu Yelusalema vehwile Shukulu Kalunga ngeci avatwamenene, 5co vakevo, amolika na vanu va mu Yelusalema vakungulukilile mu cipango caciha ca Njuvo ya Shukulu Kalunga. Co Mwene Njosefati wemanene kulutwe lwavo, 6walombelele na lijwi lyakama ngwendi, “Yove Shukulu Kalunga Njambi ya vakukulwila vetu, yove washwana mwilu na mafuti oshe a mu kaye. Yove wakala na nzili, naumo wai asa kukuyeluwisa. 7#Isa 41:8; Yak 2:23 Yove Njambi yetu, washekele vavenya lifuti lino kulutwe lwa vanu vove va Isalele nakulyana kuli vatekulwila va Avilahama musamba wove, ngeci vakalemo ku myaka yoshe. 8Vakevo vanakala mu lifuti lino, co vanatungu Njuvo nakukusingimika, 9ngeci nga vukalu vumo vuvakovelela nakuvahisa, nambe nzita, nambe mushongo wakulitambwisa, nambe njala, vakevo vakaija nakwimana kulutwe lwa Njuvo eyi muvakakulemesela. Co mu vukalu vwavo vakalombela kuli yove, co ukavaziva nakuvapatula.”
10 #
Kwi 2:4-19
“Co ololo, vanu va Amoni, na Mowavi, na Endome vanatulwisa. Omo vakukulwila vetu vatundile mu Ingito, kuwavatavesele kukovela mu mafuti aje embwe, ngecivene, vakukulwila vetu vavazengulukile lika oloni kuvavanyongesele. 11Co kenga muvali nakutulinga, vanaija nakutusheka mu lifuti lije liwatwanene. 12Yove u Njambi yetu! Vahise, omwo yetu kutwesi na nzili ku mbunga ya mashwalale ava vavangi ngacije ava valinakutulwisa. Kutuzivuka vatijo tulinga, oloni tulinakukenga mesho kuli yove ngeci utukwase.”
13Vanalume voshe va mu Yunda, na vanakazi vavo, na vanike, vemanene ku Njuvo ya Shukulu Kalunga. 14Co Munzinzime wa Shukulu Kalunga wakovelele muli umo kaLevi wakele mu mbunga ya vanu. Lizina lyendi Njazele muna Zekaliya, Zekaliya muna Mbenaya, Mbenaya muna Njeyele, Njeyele muna Mataniya wa ku cikota ca Asafe. 15Co Njazele wendekele ngwendi, “Yove shukulu Mwene Njosefati na vanu voshe va mu Yunda neni vanu va mu Yelusalema tolilileni, Shukulu Kalunga nendeka kuli yeni ngwendi kesi muzeye nambe kesi muzive lyova omo mbunga ya mashwalale eyi yakama embwe. Nzita eyi kesi yeni embwe, oloni inapu ya Njambi. 16Imene yeni mukavalwise omo vezilila ku ngila ya ku Zize. Mukaliwana navo ku shongo ya cana ku mambo ya Njelwele. 17#Kwi 20:1-4; Kut 14:13-14 Yeni kumukalu nzita eyi embwe. Oloni mukakale lika mu myela yeni nakuvandamena, mukamona Shukulu Kalunga mwakamihyanesa ku vitozi veni. Yeni vanu va mu Yunda na vanu va mu Yelusalema, kesi muzeye nambe kesi muzive lyova. Yeni ku nzita, Shukulu Kalunga akakala amo neni!”
18Co Mwene Njosefati watsikamene asi, co na vanu voshe vatsikamene amo nendi nakulemesa Shukulu Kalunga. 19Co vaLevi vaka-cikota ca Kohate na Kola vemanene nakushangazala Shukulu Kalunga, Njambi ya Isalele nakutambeka.
20Alikaki mutondo-tondo vanu vakatukile vaile mu mambo ku Tekowa. Omo vakele nakuya, Njosefati wemanene wavalekele ngwendi, “Vanalume va mu Yunda neni vanalume va mu Yelusalema! Kulaeleni kuli Shukulu Kalunga Njambi yeni, co mukemana mbe. Kulaeleni vivamileka vaka-kwimanena vendi, co mukavezika.” 21Omo mwene wakele nakwendeka na vanu, washikile vaka-kwimba vazale vikoveyo vyakujela, co vatwame kulutwe lwa nzita, nakwimba ngwavo, “Shangazaleni Shukulu Kalunga! Omwo cizemo cendi cakala ku myaka yoshe!”
22Omo vashangumukile kwimba, co Shukulu Kalunga wauya-wuyisile mashwalale vaje vezile nakuvalwisa. 23VaAmoni na vaMowavi valwisile vaEndome nakuvanyongesa njwa, co valitengulukilile vakevo vavenya nakulilwisa. 24Omo mashwalale va vaYunda vezile ku kaposhi mu mambo, vakengele kulutwe kuje kwakele vitozi vavo, co vamwene ngeci voshe vanalala ngumbanga asi vanatsi. Naumo wai wasaleleo na mwonyo.
25Omo Njosefati na vanu vendi vezile nakupukula vivala, vawanene vingombe vavangi manene, na vyakulya, na vuzalo, na vyuma vikwavo vya seo. Co vakele matangwa atatu akukungulula vivala vyakupukula, oloni vyatumine manene kuvasele kwambata vyuma vyoshe. 26Co a litangwa lyamuciwana vakungulukilile mu Cana ca Mbelaka nakushangazala Shukulu Kalunga a vyoshe vije vyalingile. Cana cije mukemwo vacitumbwile ngwavo, “Mbelaka.”#20:26 MBELAKA: Mu ciHevelu ngwavo, kushangazala. 27Co Njosefati watwamenenene vanu vendi, co velukile ku Yelusalema nakuvwaelela, omwo Shukulu Kalunga nahyana vitozi vavo. 28Omo vetele mu nganda, vaile ku Njuvo ya Shukulu Kalunga, oku vemba tulyalya na malupembo. 29Co mafuti oshe valijujukilile omo vazivile ngeci Shukulu Kalunga nahyana vitozi va Isalele, 30ngecivene, Njosefati washwanene mu kwoloka, omwo Njambi yendi wamwanene kuhwima ku mitambela yoshe ije yamuzengelekele.
Kuhwa kwa vumwene vwa Njosefati
(1 Vim 22:41-50)
31Njosefati wapwile mwene wa mu Yunda omo wakele na myaka makumi atatu na myaka itanu, washwanene mu Yelusalema myaka makumi avali na myaka itanu. Vaina lizina lyavo lyapwile Azuva, muna Shilehi. 32Ngwe mwalingile ishe Asa, ikeye walingile vije vyavivwa ku mesho a Shukulu Kalunga, 33oloni kanyongesele ije mitambela vakele nakulemesela vaka-kujeneka kukulaela. Co vanu kuvatengulukile na vimbunge vyavo vyoshe nakulemesa Njambi ya vakukulwila vavo.
34Vyuma vyoshe vije vyalingile Njosefati, kutunda kukushangumukila kutwala ku shongo yakushwana kwendi, vavisoneka mu Livulu lya Mizimbu lya Yehu muna Hanani, lije lyapwa litambelo lya Livulu lya Mizimbu ya Vimyene va mu Isalele.
35A simbu imo Mwene Njosefati wa mu Yunda walingile vusamba na Mwene Ahaziya wa mu Isalele, uje walingile vyuma vyavivi manene. 36Co walikumbasanene nendi nakushonga mato akama a mu mema a kalunga ku Eziongembele. 37Oloni Elyazale muna Ndondavahu, wa ku limbo lya Malesha, wanangwile Njosefati ngwendi, “Omwo unalingi vusamba na Ahaziya, Shukulu Kalunga akanyongesa evi viwunapanga.” Co aje mato atavukile kuvasele kuwapangesa lalo.
The Bible in Mbunda ©The Bible Society of Zambia, 2006