1 Timateo 3
3
Vantwama va mu cikungulukilo
1Evi vinapu vyendeka vya vushunga, nga munu umo ashungwiya vipangi vya vuntwama mu cikungulukilo ikeye ashaka vipangi vyavivwa. 2#Tit 1:6-9 Ntwama wa cikungulukilo napande kupwa munu wakujeneka mulonga, napande kupwa munalume wa munakazi umolika,#3:2 MUNALUME WA MUNAKAZI UMOLIKA: Nambe, munalume uje kanda acambateo luvali. kesi muka-kunwa vyakupendesa, muka-kulinyunga, muka-kulongwa, napande kujumbula vangenzi ku njuvo yendi, uje asa kulongesa vakwavo, 3kapandele kupwa muka-kupenda nambe kupwa munu muka-lwozi, oloni apwe muka-lyovwa-ovwa na kwoloka, kapandele kupwa muka-kuzema vimbongo, 4ikeye napande kupwa muka-kunyunga naanga yendi mwamuvwa na vana vendi vapwe vaka-kumwononoka na kasingimiko koshe. 5Omwo nga munu kasa kunyunga naanga yendi, co vatijo akasa kulela cikungulukilo ca Njambi? 6Kapandele kupwa munu uje nakulaela ololo, kutewa akalyalesa, co akavindama, ngwe mwalingile Liyavola. 7Napande kupwa munalume wa kasingimiko kuli vanu vaje vali anja ya cikungulukilo, ngeci kesi azive shwamwa nakuwila mu mweto wa Liyavola.
Vakwasi va mu cikungulukilo
8Vakwasi va mu cikungulukilo lalo vanapande kupwa va futisi yaivwa na kasingimiko, kuvapandele kupwa vaka-kunwa manene vinyu nambe vapwe vaka-cipululu ca vimbongo, 9vanapande kukakateya vushunga nakusholoka kukulaela na citaku-taku cakutungukwa. 10Vanapande kuvelula akulivanga, asinoni, nga vakevo vakumbulula mwamuvwa, co vanapande kupanga. 11Vanakazi vavo#3:11 VANAKAZI VAVO: Nambe, vakwasi vavo va vanakazi. vanapande kupwa va futisi yaivwa, kesi vaka-lufwe, kesi vapwe vaka-kunwa vyakupendesa, oloni vapwe vaka-vushunga mu vyuma vyoshe. 12Mukwasi wa cikungulukilo napande kupwa muka-munakazi umolika,#3:12 NAPANDE KUPWA MUKA-MUNAKAZI UMOLIKA: Nambe, napande kupwa uje kanda acambateo luvali. uje asa kunyunga vana vendi mwamuvwa amo na naanga yendi. 13Omwo vaje vakwasi vapanga vipangi vyavo mwamuvwa vawanenamo lutsimo lwaluvwa, co vasa kwendeka nakusimpa akukulaela kwavo muli Kilistu Yesu.
Cisin̄iko cakama-kama
14Omo njilinakusoneka ou mukanda kuli yeni, njili na cinyangavili cakwija kuli yeni vwasi nakumimona. 15Oloni nga njishwala, ou mukanda ukewo wakumileka ngeci muzivuke vati futisi yetu inapande kupwa ku vanu mu naanga ya Njambi, ikeyo cikungulukilo ca Njambi wakuyoya, manda na vwimaneno vwa vushunga. 16Naumo wai asa kuvyana a vukama vwa cisin̄iko ca vu Njambi vwetu!
Uje washolokele mu cifwa ca vunu,
Munzinzime wamusholwele kupwa wa vushunga,#3:16 MUNZINZIME WAMUSHOLWELE KUPWA WA VUSHUNGA: Nambe, na mu cifwa ca munzinzime, vamusholwele kupwa wa vushunga.
na tungelo vamumwene.
Vamwambulwile akati ka miyati,
vamukulaelele mu kaye mwoshe,
co vamutwalele mwilu.
Currently Selected:
1 Timateo 3: MBB
Highlight
Share
Copy
Want to have your highlights saved across all your devices? Sign up or sign in
The Bible in Mbunda ©The Bible Society of Zambia, 2006