1 Tesalonika 1
1
1 #
Vil 17:1
Mukanda wakutunda kuli yange Paulu na Silasi na Timateo.
Kuli vanu va cikungulukilo ca mu Tesalonika, vaje vanakundama kuli Njambi Tate na Mwene Yesu Kilistu.
Kutetela na kwoloka vikale neni.
Mwonyo nakukulaela vya vaka-Tesalonika
2Simbu yoshe tukakandelela kuli Njambi ali yeni voshe, co simbu yoshe tukamitumbula mu malombelo etu. 3Omwo tukanuka ku mesho a Njambi yetu na Tatetu vipangi vya kukulaela kweni nakuundangana kwa cizemo na cinyangavili cakukola mbe muli Mwene Yesu Kilistu. 4Vakwetu, twazivuka ngwetu Njambi wamizema, co namyangula ngeci mupwe mu vendi vavenya. 5Omwo twaminenelele Vin̄anda Vyavivwa, kesi na majwi lika, oloni na nzili na Munzinzime Wakujela, co na lukakateya lwa vushunga vwavyo. Mwazivuka vati twayoyele omo twakele amo neni, eci capwile ngeci omwo yeni. 6#Vil 17:5-9 Mwatembunwinine yetu na Mwene, co nambe mwamwene tuyando twakama, oloni mwatambwile lijwi nakujolela kuje kukatundu kuli Munzinzime Wakujela. 7Ngecivene, yeni mwapwile cimweso kuli voshe vaka-kukulaela mu Masendoniya na mu Akaya. 8Omwo kesi lika ngwe lijwi lya Mwene lyatundile kuli yeni mu Masendoniya na mu Akaya embwe, oloni lutsimo lwa kukulaela kweni kuli Njambi lunashandokela kwoshe-ikwoshe. Ngecivene, nacimo cai citwasa kwendeka. 9Vanu voshe valinakwendeka vati yeni mwatutambwile omo twezile nakumimona, co lalo vati mwatengulukile kutunda ku tumponya nakwija kuli Njambi, nakupangela Njambi wa vushunga wakuyoya, 10nakuvandamena Munendi omo akaija kutunda mwilu, Munendi Yesu, uje yasangwile ku vatsi, co akatupatula ku vukalu vwa Njambi vuje vulinakwija.
The Bible in Mbunda ©The Bible Society of Zambia, 2006