1 Samwele 3
3
Shukulu Kalunga asana Samwele
1A matangwa aje, omo mwanike Samwele wakele nakupangela Shukulu Kalunga mwisi ya Eli, majwi kuli Shukulu Kalunga apwile lika amandondo, co vimona vyakutunda kuli ikeye kuvyatumine. 2Ku vutsiki vumo, omo mesho a Eli ashangumukile kutsitsivala, walalele mu mulili wendi, 3ndeya yakele nakushukuma, co Samwele walalele mu Mbalaka yakujela, muje mwakele Cikasa ca Cikumiiyo. 4Asinoni Shukulu Kalunga wasanene Samwele. Co watavele ngwendi, “Ewa mwane!” 5Co washatukilile kuli Eli wendekele ngwendi, “Yange uno omwo unanjisana.”
Oloni Eli wamukumbulwile ngwendi, “Kunjakusanene, ya ukalale.” Ngecivene, Samwele waile nakulala.
6Co Shukulu Kalunga wasanene Samwele lwamucivali lalo, Samwele wendukile, waile kuli Eli, nakwendeka ngwendi, “Yange uno omwo unanjisana.” Oloni Eli wamukumbulwile ngwendi, “Kunjakusanene munange, ya ukalale.” 7Samwele kazivukile ngeci uje wamusanene wapwile Shukulu Kalunga, omwo Shukulu Kalunga kendekele kuli ikeye akulivanga.
8Shukulu Kalunga wasanene lalo Samwele simbu yamucitatu, Samwele wendukile, waile kuli Eli, wendekele ngwendi, “Yange uno omwo unanjisana.”
Co Eli wanangukile ngwendi kuma Shukulu Kalunga ikeye nakala nakusana-sana mukwenje. 9Ngecivene, Eli wendekele kuli Samwele ngwendi, “Ya ukalale, nga akusana lalo, co kumbulula ngwove, ‘Endeka Shukulu Kalunga, ngamba yove alinakukutolilila.’ ” Ngecivene, Samwele waile nakulala.
10Co Shukulu Kalunga wezile nakwimana kuje, wamusanene ngwe mwalingile akulivanga ngwendi, “Samwele! Samwele!”
Samwele wamukumbulwile ngwendi, “Endeka, ngamba yove alinakukutolilila.”
11Co Shukulu Kalunga wendekele ngwendi, “Litangwa limo njikalinga cuma cimo cakukomokesa kuli vanu va Isalele ngeci munu woshe uje akaciziva cikamukomokesa. 12A litangwa lije vene njikalinga kuli Eli vyoshe vije vinjinendeka a naanga yendi, kutunda kukushangumuka kweta na ku shongo. 13Njinamuleke ngeci njikanyanyamesa naanga yendi myaka yoshe, a vuvi vuje vwazivukile, omwo vana vendi vakele nakunjishaula, oloni ikeye kavavindikile. 14Ngecivene, njinalisingi ngeci ku naanga ya Eli kukwesi kukombelela nambe n̄ombelo ikasa kutundisa vuvi vwangacije.”
15Co Samwele walalele noo mutondo, asinoni wendukile nakushokolola vikolo vya ku Njuvo ya Shukulu Kalunga. Co ikeye wakele na lyova akwambulula cimona kuli Eli. 16Oloni Eli wasanene Samwele ngwendi, “Samwele munange!” Co Samwele wamukumbulwile ngwendi, “Ewa mwane.”
17Co Eli wamwihwile ngwendi, “Vikajo vyanakuleke Shukulu Kalunga? Kesi unjishwekele cuma cimo, Njambi akakuhisa nga unjishwekela vyoshe vije vyanakuleke.” 18Ngecivene, Samwele wamulekele vyuma vyoshe, kamushwekeleleko cuma cimo cai. Eli wendekele ngwendi, “Ikeye napu Shukulu Kalunga, akalinga vyoshe vyashaka kulinga.”
19Omo Samwele wakolele, co Shukulu Kalunga wakele amo nendi nakulingisa vyoshe vije vyendekele Samwele ngeci vipwe vya vushunga. 20Ngecivene, vanu voshe va Isalele, kutunda ku shongo imo ya cifuti nakweta ku shongo ikwavo, vazivukile ngeci kuma Samwele ololo napu muka-kwimanena wa Shukulu Kalunga. 21Co Shukulu Kalunga washolokele ku Shilo, kuje wendekele na Samwele simbu yakulivanga. Omo Samwele wendekele, co Isalele yoshe vamutolililile.
The Bible in Mbunda ©The Bible Society of Zambia, 2006