1 Samwele 28
28
1A matangwa aje, vaFilisitiya vakungulwile mashwalale vavo va nzita ngeci vakalwe na vaIsalele, co Akishe wendekele kuli Ndaviti ngwendi, “Mwa vushunga wazivuka ngeci yove na vanu vove mukaya nange ku nzita.”
2Co Ndaviti wamukumbulwile ngwendi, “Yange nji ngamba yove, ukalimwena yove vavenya vije vinjikalinga.”
Akishe wendekele ngwendi, “Mwamuvwa, njikakupwisa muka-kunjinyunga ku myaka yoshe.”
Saulu ehula muka-kwendeka na vakulu
3 #
VaLe 20:27; Kwi 18:10-11; 1 Sam 25:1 Omo Samwele natsi laja, co vaIsalele voshe vamulilile, vamutsindile mu nganda yendi mu Lama. Saulu te nasheke laja vaka-kwendeka na vakulu voshe amolika na vaje vaka-kutaa mu Isalele.
4Mashwalale va vaFilisitiya valikungulwile, co vatungile cilombo cavo kuyehi na nganda ya Shuneme, Saulu wakungulwile vaIsalele voshe, vatungile cilombo cavo ku Munkinda wa Ngilembowa. 5Omo Saulu wamwene nzita ya vaFilisitiya, co wajajele manene, 6#Kul 27:21 ngecivene, Saulu wehwile kuli Shukulu Kalunga vije vyanapande kulinga. Oloni Shukulu Kalunga kamukumbulwile, nambe mu vinjozi, nambe kupangesa Ulime na Tumime, nambe a vaka-kwimanena. 7Asinoni Saulu washikile vamyata vendi ngwendi, “Njishakezekeleni munakazi muka-kwendeka na vakulu, ngeci njiyeko nakumwihula.”
Co vamukumbulwile ngwavo, “Kwali umo mu Endole.”
8Ngecivene, Saulu walimwisile ngwe weka, wazalele vuzalo vweka, co a kavwivwivwi waile na vanu vendi vavali nakumona uje munakazi. Co Saulu wendekele kuli uje munakazi ngwendi, “Njihwileko ku minzinzime, co unjileke evi vikalingiwa. Sana munzinzime wa munu uje injitumbula lizina lyendi.”
9Co munakazi wamukumbulwile ngwendi, “Mwa vushunga wazivuka evi vyanalingi Mwene Saulu, vyakusheka vaka-kutaa na vaka-kwendeka na vakulu mu Isalele. Ngecivene, omwo vikajo ulinakunjitela nganjo ngeci njitse?”
10Asinoni Saulu walisingile cisingo cakujela ngwendi, “Mu lizina lya Shukulu Kalunga wakuyoya, kuukakala na mulonga omwo a cuma eci.”
11Asinoni uje munakazi wamwihwile ngwendi, “Iyajo injikunenela?” Co Saulu wamukumbulwile ngwendi, “Samwele.”
12Omo munakazi wamwene Samwele, co watambekele na lijwi lyakama, wendekele kuli Saulu ngwendi, “Omwo vikajo unanjikwisila? Kuma yove Mwene Saulu!”
13Mwene wendekele kuli ikeye ngwendi, “Kesi uzive lyova. Vika wamono?” Co uje munakazi wamukumbulwile ngwendi, “Njamono munzinzime umo ulinakutuuka mu livu.”
14Co Saulu wamwihwile ngwendi, “Unalifu ngwe vika?”
Co ikeye wamukumbulwile ngwendi, “Kakulukazi alinakutuukako, nazala cikoveyo cacilaja.”
Co Saulu wazivukile ngeci uje wapwile Samwele, co wakulamene asi nakulemesa.
15Co Samwele wendekele kuli Saulu ngwendi, “Omwo vikajo wanjiyandesela? Vikajo unanjituwisila?”
Saulu wamukumbulwile ngwendi, “Njili mu vukalu vwakama manene! VaFilisitiya vanaija nakunjilwisa, co Njambi nanjikengesa nima. Shendi kunjikumbulula lalo, nambe ali vaka-kwimanena, nambe mu vinjozi. Ngeci njinakusana, unjileke vati njinapande kulinga.”
16Co Samwele wendekele ngwendi, “Omwo vikajo unjisanena nga Shukulu Kalunga nakuvyana, co nemuka citozi cove? 17#1 Sam 15:28 Shukulu Kalunga nalingi evi kuli yove ngwe omo mwendekele muli yange, nakunyeke vumwene, nakuvwana kuli Ndaviti. 18#1 Sam 15:3-9 Kuwononokele lishiko lya Shukulu Kalunga, co kuwanyongesele vaAmaleke na vyoshe vije vakele navyo. Mukemwo Shukulu Kalunga nalingi eci kuli yove lelo. 19Shukulu Kalunga akakundika vaIsalele voshe amo nove mu mavoko a vaFilisitiya. Co imene yove na vana vove mukakala amo nange, na Shukulu Kalunga lalo akakundika mashwalale vaIsalele mu mavoko a vaFilisitiya.”
20Co aje vene Saulu wawililile asi, washuluvalele wazivile lyova manene a majwi a Samwele aje endekele kuli ikeye. Saulu kakele na nzili, omwo kalile cuma cimo litangwa lyoshe, na vutsiki vwoshe. 21Co uje munakazi waile kuli Saulu, wamwene ngeci Saulu wakele na lyova lyakama manene, co wendekele kuli ikeye ngwendi, “Shukulu, yange njinononokele majwi ove, kunjashotele mbunge mwonyo wange akulinga vije wanjilombele. 22Co ololo shukulu, tolilila lalo ku lijwi lya ngamba yove wa munakazi, njikuvwaesela vyakulya ulye, ngeci ukale na nzili yakwenda.”
23Saulu wavyanene wendekele ngwendi, “Kunjishaka kulya cuma cimo.” Oloni vamyata vendi, na uje munakazi vamusindiiye ngeci alye. Co akukotoka wavatavele, wendukile asi, watumbamene a vulili. 24Co uje munakazi watsiile vwasi muna ngombe wakununa. Wambatele vunga vwa tiliku, wavutikile, wocele makende akujeneka musima. 25Ngecivene, wanenelele vyakulya Saulu na vamyata vendi, valile. Co ku vutsiki vuje vene, vaile.
The Bible in Mbunda ©The Bible Society of Zambia, 2006